Endiliga upprann dagurin, tá 2. lið skuldi spæla sín fyrsta dyst í hesum kappingarárinum. Ólíka 1. liði, so spælir 2. lið hálv kappingarár, soleiðis at tað eru tvær kappingar pr. kalendaraár.
Fyrsti dystur hesuferð var móti BK Skjold, og spælast skuldi á graslíki við Ryparken. Tað var týðiligt at síggja á monnum, at nógv stóð uppá spæl. Ikki bara var hetta fyrsti dystur, men felagið hevði eisini føðingardag, so tað stóð meira uppá spæl enn einans 3 stig. Hesir nervar komu longu til sjóndar ein tíma áðrenn dystarbyrjan, tá ið Teitur ringir til venjaran, og sigur, at hann hevði gloymt gaggurnar eftir á Oyrasundi. Hóast venjarin bjóðaði seg at lána honum sínar gaggur, helt Teitur tað vera best, um hann vendi við aftur, og heintaði tær!
Um dystin er tað at siga, at hóast endaliga úrslitið kanska fortelur eina søgu um ein javnan dyst, so er einki at ivast í, at ÍF Føroyar var nógv tað betra liðið. Tað tók heldur ikki langa tíð áðrenn vit høvdu lagt okkum á odda. Ein bóltur fellur fyri føturnar á Høgna Hansen, sum trygt knallar bóltin í kassan. 1-0. Hóast leiðsluna, so hekk spælið ikki ordiliga saman, men so fáa vit eitt horna. Áðurnevndi Høgni skjýtur bóltin innfyri, og úrslitið er, at vit eru á odda 2-0. Undirritaði minnist ikki slíkt, síðan Jack Jacobsen gjørdi um seg á besta liðnum hjá NSÍ síðst í 80’unum og langt inn í 90’ini! Tá var gamalt at rópa “Hjørna í mál”, hvørja ferð hann skeyt. Kanska vit kunnu vænta somu róp til Høgna framyvir.
Henda leiðslan helt sær til hálvleiks, har avtalað var, at nú skuldi hetta bara koyrast heim. Tó so, mongum brestur ætlan. Gamalt var eisini, at 2-0 er vandamiklasta leiðsla, og hendan gamla søgan vísti seg at vera sonn. Hóast okkara menn vassaðu í stórum málmøguleikum eydnaðist ikki at tryggja sigurin, og so hendi tað, sum ikki skuldi henda. BK Skjold fáa tvey horna, og so var støðan 2-2!
Heldur enn at falla í fátt, brettu vit upp um armar og arbeiddu enn harðari. Svenn stýrdi verjuni fyrimyndarliga, John taklaði sum stóð lívið í vanda, meðan Høgni og hinar offensivu kreftirnar arbeiddu hart fyri tí vinnandi málinum. Gott 20 min áðrenn dystarlok eydnaðist tað so hjá okkum. Eitt horna verður sent innfyri, og so sprakk Sigurð upp sum ein spentur fjøður. 3-2 og nú skuldi tað ikki ganga galið. Sigast skal her, at tað var fult uppiborið at Sigurð fekk sítt mál. Einar 3 ferðir í dystinum gjørdi verjuleikararnir hjá BK Skjold brotsspark móti honum, sum ikki blivu dømt. Tað var tískil ein sera vælnøgdur Sigurð, sum kundi rópa í høvdið á mótstøðuleikarunum.
Aftaná hetta, sá tað út sum, at tað fór at skrædna hjá BK Skjold, men málmaðurin hjá teimum hálaði eina seriu av heimsklassaparadum upp, og sostatt endaði dysturin 3-2 til okkum. Ein fult uppiborðin sigur, sum vit tó sluppu at arbeiða óneyðuga hart fyri.
Dagsins maður bleiv Høgni Hansen við 12 atkvøðum. Honum á baki kom John við 1 atvkøðu. Sum vanligt er, so merkir hetta, at Høgni skal keypa okkurt leskandi við til liðið komandi dyst. Hetta gleða vit okkum sjálvsagt allir til!
Liðið: Heini – Ásbjørn, Svenn, Jákup S., Johannus – Sigurð, Høgni, John, Johan – Bergur,Brian.
Á beinkinum sótu Jóhan Petur og Teitur.
