Kategori: Tíðindi

Udgivet den

2. lið á rættari kós

Aftaná heldur trivaliga byrjan aftaná summarsteðgin tykist tað endiliga at vera komið rætt lag á hjá 2. liði aftur. Hesaferð gekk tað út yvir Østerbro IF, ið blivu sendir heim frá Kløvermarkini við einum 3-2 tapi.

Østerbro IF byrjaðu annars dystin væl, høvdu meira spæl og royndu at trýsta høgt, tó uttan at blíva ordiliga vandamiklir. Hinvegin gav hetta eyka pláss til offensivu leikararnar hjá ÍF Føroyum har bæði Johan, Dion og Jákup D. gjørdu um seg frá byrjan av. Júst hetta gav eisini skjótt úrslit. Fyrsta málið kom aftaná gott gjøgnumbrot og innlegg úr høgru síðu frá Dion. Teirra málmaður fær hondina á bóltin, men fær ikki sligið bóltin longri út enn til ein lúrandi Johan, sum ísakalt temur bóltin og plaserar hann trygt í málið til 1-0.

Tað var tó ikki longi, man slapp at njóta leiðsluna. Fyrst gjørdi eitt bólttap í uppspælinum, at maður hjá teimum bleiv púra leysur við okkara málmann, har Heini heldigvís bjargar í stórum stíli. Men stutt aftaná verður ein maður hjá teimum aftur leysur við Heina, hesaferð takkað verið einari høgari avlevering frá 40-50 metrum. Verjan er ikki klár, avleveringin liggur perfekt, og Heini kann einki stillað upp, 1-1.

Lukkutíð vaknaði alt liðið meira av hesum, og tað vardi ei heldur leingi til vit svaraðu aftur. Fyrst er tað Johan, sum brýtur ígjøgnum og frá baklinjuni av leggur bóltin yvir málmannin og inn til Jákup, men bólturin verður stútaður júst framvið málið. Jákup skuldi tó ikki bíða leingi aftrat fyri at fáa sítt mál. Miðskeiðis í fyrra hálvleiki avgerð Dion at taka sakina í egnar hendur, og frá egnaru hálvu sigur hann pent farvæl við alla verjuna hjá Østerbro. Fyrst brúkar hann bæði teknikk, skjótleika og megi fyri at sleppa framvið 4-5 monnum, og síðani brúkar hann gott yvirblikk til at finna ein púra leysan Jákup Dam, sum stendur á rætta stað, og bert skal seta vinstrafótin á fyri at skora til 2-1. Eitt reint út sagt framúrskarandi einmansavrik frá Dion og samstundis fyrsta (men als ikki síðsta!) málið hjá Jákup fyri ÍF Føroyar hesa hálvuna.

Aftaná at hava verið vitnir til hetta avbera vakra málið, vóru tveir aðrir mans ið gjørdu av, at teir ikki vildu standa nakað aftanfyri. ÍF Føroyar vinna bóltin langt aftur á egnari hálvu. Tá bólturin so endar hjá John tætt við miðjarsirkulin, eru tað bert hann og Johan til at manna álopið. Tað skuldi tó vísa seg at vera meira enn ríkiligt. John velir at spæla bóltin víðari fyrstu ferð til Johan við eini SERA einfaldari avlevering við innarasíðuni av kattepoten og Johan fer sostatt spurtandi avstað við bóltinum, umringaður av tveimum verjuleikarum. Her ger Johan ikki mætari enn at brádliga støðga upp við bóltinum, fyri so at lobba bóltin hegnisliga yvir málmannin frá eini 20 metrum. 3-1 til ÍF Føroyar, og lagið er gott.

Tíverri kann ikki sigast tað sama um lagið hjá hinum ella um dómaraavrikið. Fyrst royna hinir at framprovokera kort til Johan við at provokera hann. Seinni lukkast tað teimum at fáa framprovokerað eitt gult kort til Joseph eftir eina glíðani takkling, har hann rakar bóltin. Til síðst er ein á mótstøðuliðinum, sum fulstendiga óneyðugt rennir eftir Jákup O. og bæði skumpar og hóttir hann. Hetta fekk hann sjálvsagt eisini kort fyri, men onkursvegna fekk Jákup eisini gult kort fyri at vera offur, so ÍF Føroyar endaði fyrra hálvleik og byrjaði seinna við 9 monnum.

Í seinna hálvleiki var tann defensiva konsentratiónin tó væl betri, og tað var ikki nógv teir sloppu fram til av møguleikum. Hinvegin var tætt uppá at vit øktu til 4-1. Serliga fekk Ingi P. ein møguleika, har hann fekk so nógv pláss og tíð einsamallur við teirra málmann, at tað gjørdist torført at bestemma seg fyri, hvat man skuldi gera. Tíverri kom málmaðurin til síðst út og fekk bjargað skotinum, so onkuntíð kann ein málmøguleiki faktiskt gerast OV stórur! Jákup D. var eisini tætt uppá nakrar ferðir at fáa sítt seinna mál, m.a. við einum skoti á yvirleggjaran aftaná gott gjøgnumbrot, men til síðst byrjaðu Østerbro eisini at nærkast einum máli. Faktiskt fingu teir heili tveir gyltar møguleikar tá ið 10-15 min. vóru eftir, men fyrst var tað yvirleggjarin ið bjargaði okkum, og seinni var tað Heini, sum kom framúrskarandi væl út og fekk bjargað einum vandamiklum fríleypara. Til síðst fingu teir tó mál, men tá vóru bert fáir minuttir eftir, og tað var síðstu ferð teir komu í nánd av føroyska málið. Sostatt ein 3-2 sigur til ÍF Føroyar aftaná eitt sera gott avrik.

 

Uppstillingin:

Heini

Bárður – Jákup O. – Teitur – Ásbjørn

Dion – Svenn – John – Jákup D.

Joseph

Johan

Bonkurin: Bartal, Andras, Ingi P.

 

Dagsins Leikari:

Dion var ein støðug hóttan allan dystin og bæði spældi og stríddist væl. So tað var heilt uppiborið, at hann fór avstað við heili 8 atkvøðum og heitinum Dagsins Leikari, ein tangering av metinum fyri hesa hálvuna.

 

Dagsins Detalja:

Dómarin var sera raskur til at seta seg sjálvan í keðiligt fokus og Ingi P. sleppur nokk eisini at hoyra fyri handan málmøguleikan eina tíð aftrat, men hatta er slíkt, sum ofta er komið fyri, og ofta fer at koma fyri aftur. Ein glíðandi takkling frá Joseph, hinvegin, TAÐ er ikki nakað man sær til hvønn fótbóltsdyst! Sum leikari er hann elegantur sum fáur, men at gera glíðandi takklingar… (Indsæt: Smiley ið heldur sær fyri eyguni) Tað minti ikki sørt um ein, sum roynir seg við glíðani takkling fyri fyrstu ferð nakrantíð, og undirritaði hevur eisini ein illgruna um, at tað nokk ei heldur er langt vekk frá sannleikanum 😉 Men sigast skal, at hann rakti bóltin!

Udgivet den

Á rættari kós aftur við manér

Sunnudagin 20/9 fór eitt vælmannað 2. lið hjá ÍF Føroyum til Fælledparkina á Østerbro at vitja Heimdal. Hóast sunnudagsdystir sjáldan eru vælumtóktir, so var tað ein samling av frískum og væluppløgdum monnum ið møtti til dystin (við einum undantaki, men meira um tað seinni) uppsettir uppá at fáa slettað tey seinastu vónbrotini.

Tað tók sína tíð at finna bæði skiftingarrúm og vøll. Undir upphitingini fekk liðskiparin ein lítlan skaða, men tá ið man dugir allar Rocky filmarnar orðarætt, so veit man eisini, at skaðar og pína eru faktorar, ið einki hava at siga, tá ið tað stendur á.

ÍF Føroyar settu seg eisini á dystin frá byrjan av. Heimdal fekk ongantíð tíð ella pláss til at sleppa at spæla fótbólt, ímeðan bæði føroyska verjan og miðjan koyrdu bóltin væl runt. Har frammi stríddist og spældi Johan sum altíð fyrimyndarliga væl, ímeðan einmannsherurin úr Klaksvík var ein trygg og góð spælistatión heilt har frammi. Tað tók ei heldur so langa tíð áðrenn Steffan fekk hol á, hetta eftir innlegg frá Jóhannusi, har Steffan var grammari og giftigari enn danska verjan. Málið til 2-0 var ikki heilt ólíkt. Ingi P. heldur seg vera og spælir eina smarta og góða hælavlevering út til Jóhannus, sum enn einaferð sendir eitt gott innlegg innfyri og enn einaferð megnar verjan hjá hinum ikki at forða Steffan í at fáa mál.

Hálvleiksstøðan var sostatt 2-0 og í seinna hálvleiki var eisini allatíðina ein ávísur klassamunur. Afturvendi Jákup O. helt saman við hinum í verjuni mótstøðuliðnum frá teimum heilt stóru málmøguleikunum, og um tað so onkuntíð var eitt sindur av vanda á ferð, so var eisini nýafturvendi Heini ein sera tryggur síðsti skansi. Teir mitt á miðjuni hildu áfram við at dominera, og vengurnar fingu fleiri gjøgnumbrot, sum kundu elvt til mál, so tað var ikki annað enn uppiborið, tá ið 3-0 málið kom miðskeiðis í seinna hálvleiki. Hetta kom eftir, at Pætur sendi eitt perfekt hornaspark innfyri, har risin úr Vági sjálvsagt var hægstur og stútaði bóltin í netið. Sigast skal, at tað var umvegis ein verjuleikara, men vit eru fitt í felagnum og velja at geva Reidari málið.

Málið gjørdi tó okkara menn nakað ókonsentreraðar, tí lítið bil seinni ger ein feilavlevering frá verjuni, at ein dani fær bóltin mitt á okkara hálvu, og hann høggur bóltin flott í málið til 3-1. Nakað veruligt trýst kom tó ongantíð frá Heimdal. Ístaðinfyri vóru tað ÍF Føroyar, ið fingu fleiri góðar málmøguleikar. Har manglaði tó antin neyvleiki, ella stóð málmaðurin framúr væl fyri. Lukkutíð var Ingi S. fyrstur á bóltinum eftir, at málmaðurin hevði bjargað einum stórum møguleika, so frá einum spískum vinkli fekk Ingi við vinstrafóti skotið bóltin í netið til 4-1 og endaligu støðuna.

Til allarsíðst var tó ovmikið av dramatikki. Mangt kundi bent á, at dómarin hevði latið seg inspirera av Mike Dean og Diego Costa í dystinum móti Arsenal dagin fyri. Ímóti endanum ger ein á mótstøðuliðinum eina regulera svínastriku ímóti Johan, sum uttan iva skuldi givið reytt kort. Dómarin velur ikki at døma, fyrr enn Steffan reagerar uppá áðurnevndu svínastriku, har dómarin so velur at geva Steffan reytt kort fyri sína gerð. Ein keðiligur endi uppá ein annars sera góðan dyst, men tað týdningarmiklasta er, at tey 3 stigini og góða lagið komu trygt við heim aftur úr Fælledparkini.

Uppstillingin:

Heini

Ásbjørn – Jákup O. – Reidar – Jóhannus

Ingi S. – Pætur – John – Jákup D.

Johan

Steffan

Bonkurin: Hanus, Ingi P.

 

Dagsins Leikari:

Inntil víðari í ár hevur tað hvørja ferð verið talan um sannførandi vinnara, men aftaná fleiri sera góð avrik í dagsins dysti, var væl meira spenningur í enn áður. Tað skuldi tó vísa seg, at tvey mál, eitt framúr gott avrik og eitt reytt kort, var nógmikið til, at Steffan, við 5 atkvøðum, vann tann tætta dystin og harvið heiðurin. Steffan fekk 5 atkvøður, ímeðan Pætur var í hølunum við 4.

 

Dagsins Detalja:

Tað er áður komið fyri, at avboð koma í síðstu løtu til sunnudagsdystir og hetta var tíverri ikki nakað undantak. Fyri ikki at útstilla nakran, verður viðkomandi nevndur undir dulnevni. Avboð kom sostatt frá Jacob F. Svennsen, og hetta var kl. 06.48 sunnumorgunin! Lukkutíð var hr. Svennsen so frægur at greiða frá, hví hann var forðaður í at koma til dyst. Hetta kom heilt einfalt av tí, at hann fekk vitjan og ikki kundi stinga av. Ein kundi freistast til at seta spurnartekin við slíka informatión kl. 06.48 ein sunnumorgun, men størri gestablídni skal man so leita leingi eftir og minnir ikki sørt um eina Gevalia reklamu, ”når du får uventede gæster”. J

Udgivet den

Náðisleys lektión í effektiviteti

Leygardagin 12/9 tók 2. liðið hjá ÍF Føroyum ímóti FB á Kløvermarkini. Spælið hjá 2. liðnum hevur verið á góðari leið teir fyrstu dystirnar, men trupulleikar hava tíverri verið við málskjótingini. Hetta skuldi aftur vísa seg at kosta dýrt.

Í fyrra hálvleiki sat ÍF Føroyar á mestsum øllum, bæði viðvíkjandi spæli og møguleikum. Joseph legði út við at hava nøkur nærgangandi langskot, og Johan var um reppið at koma í fleiri vandamiklar støður. Hann og Christian Høgni vóru ein støðug hóttan í álopinum, men tað bleiv tíverri bert til líka við og næstan.

Burturúr ongum fáa FB so mál miðskeiðis í hálvleikinum. Eitt satt dreymainnlegg úr høgru síðu endar hjá einum fríum áloypara, sum bert skal seta pannuna á fyri at skora til 0-1. Hetta broytti tó ikki uppá mynstrið, og m.a. Ingi P. er sera nær við at fáa eitt útjavnandi mál, men skotið sníkir seg júst uppum málið. Stutt aftaná hendir tað sama, FB hava eitt sjáldsamt álop, men hesaferð kemur eitt perfekt innlegg úr vinstru síðu, har áloyparin enn einaferð bert skal seta pannuna á til 0-2.

Áðrenn tað seinna málið var ein støða, har ÍF Føroyar kundi følt seg eitt sindur snýttar fyri eitt straffi, men enn verri var við eini aðrari støðu, lítla løtu eftir; Johan skal úr stuttari fjarstøðu til at seta høvdið á eitt sera gott innlegg, men áðrenn hann nær at fáa nakað burturúr vandamiklu støðuni, fær hann ein fót syngjandi í andlitið, uttan at dómarin lætst um vón. Sostatt 0-2 í hálvleikinum.

Menn høvdu í seinna hálvleiki framvegis góðar vónir um at fáa stig við heim, men hetta skuldi bara ikki bera til hendan dagin. Johan hevði áðrenn dystin skorað tveir dystir á rað, og ilt er at siga um hetta ávirkaði hansara tiltikna málgræðið, tí hann valdi meira enn einaferð at avlevera, hóast hann hevði møguleika fyri at skjóta uppá mál. Tó komu ikki teir heilt stóru málmøguleikarnir burturúr okkara spæli. Sum oftast manglaði neyðugi neyvleikin, tá ið síðsta avleveringin ella trekkið skuldi gerast. FB byrjaðu enntá at spæla seg fram til stórar møguleikar uppá kontra, tó uttan at mál kom burturúr. Dysturin endaði sostatt 0-2.

Høvdu ÍF Føroyar fingið tað fyrsta málið, sum teir høvdu uppiborið, so hevði søgan helst verið ein heilt onnur, men umberingum kann man altíð koma við. Faktum er framvegis, at liðið uttan iva klárar at spæla væl betri enn dagsins avrik, men so er bert at læra av sínum feilum og koma víðari enn sterkari.

 

Uppstillingin:

Sjúrður

Ásbjørn – John – Reidar – Bartal

Jóhan Petur – Jóhannus – Joseph – Jákup D.

Christian Høgni – Johan

Bonkurin: Bárður, Andras, Ingi P.

 

Dagsins Leikari:

Hetta var hansara fyrsti dystur aftaná summarsteðgin, men tað sást absolutt ikki aftur á avrikinum hjá John ”Rambo” Hansen, sum við heili 8 atkvøðum bleiv mest sannførandi vinnarin, av heiðrinum, inntil víðari í ár.

 

Dagsins Detalja:

Dagsins Detalja var at als ongin Dagsins Detalja var.
(Hmm, men tað merkir so, at ein Dagsins Detalja var, ergo kann tað ikki vera Dagsins Detalja… Men um tað ikki kann vera Dagsins Detalja, so er aftur møguleiki fyri at gera tað til Dagsins Detalju? Suk, man skal halda seg langt burtur frá paradoksum!)

Udgivet den

Leikarin á bonkinum: Pætur Jørgensen

Hesaferð er tað havnamaðurin og HB’arin, Pætur Jørgensen, ið er setstur á bonkin. Pætur hevur eftirhondini búðleikast á Kløvermarkini í nøkur ár, har hann fyri tað mest hevur roynt seg á høgra bakki, men eisini sum venjarans darling á sentrala miðvøllinum. Til dagligt lesur Pætur Sport Management og er framvegis“tannáringaforelskaður“ í damuni gjøgnum 8 ár, Jeanni.

 

Vit takka Pæturi fyri samrøðuna, og ynskja honum eitt framhaldandi gott kappingarár.

 

Lýs teg sjálvan sum fótbóltsspælara við 3 orðum:
Treiskur, arbeiðsamur og eitt sindur Illsintur við hvørt.

Svevur tú 8 tímar hvørja nátt?
Eg havi lært frá barnsbeini, at svøvnur er umráðandi, so eg leggi meg altíð eftir at fáa hasar 8-9 tímarnar hvørja nátt.

 

Fleiri lutaseðlar ella hægri limagjald?

Hægri limagjald, sjálvt um tað longu er farið upp (summarhálvuna) 🙂

 

Hvønn sang burdu øll havt hoyrt minst einaferð og hví?
Olé – Adelén, ógvuliga góður til at fyrireika seg til dyst við (PS. Eg brúki hann).

 

Nær vaskaði tú skinnarnar seinast?
Tað gjørdi eg beint eftir seinasta dyst, eg leikti fyri 1 liði ímóti Østerbro.

 

Besti leikari tú hevur leikt við?
Eg vil líka nevna, at eg havi verið so heppin at spælt saman við nógvum ótrúðliga góðum leikarum, men um eg skal taka ein framum aðrar so verður tað Jákup á Borg í kappingarárinum 2006, tá vit blivu FM vinnarar við HB, tá var hann flúgvandi.

Eg vil líka leggja aftrat, at um Ólavur í Ólavsstovu var í toppform og ikki var so nógv darvaður av skaðum tey seinnu árini, hevði hann verið ovast á mínum lista (sum ein annar Paul Scholes).

 

Besta ÍF Føroyar ball?
Nú eri eg ikki tann stóri ballarin, men havi eg tó verið við til tvær ÍF Føroyar ársveitslur, og har var tann seinasta í Føroyingahúsinum heilt klárt tann betra av teimum.

 

Hvat er ein góður kossur?
Hvat ein góður kossur er? Tað finst einki betur enn at fáa ein koss frá tí útvaldu, ið man er góður við (redaktión: nuuuuurh).

Besta minnið av Kløvermarkini?
Tað er uttan iva tey fantastiska flottu málini (2 mál), ið eg havi skotið á Kløvermarkini fyri ÍF Føroyar.

 

Hvør hevur best reyv á liðnum hjá tær?
Tað er hørð kapping ímillum kraftigu og saftigu reyvina hjá Ólavur í Ólavsstovu og Steffan Kalsø.

 

Hvat kundi verði betri í ÍF Føroyum?
Eg haldi, at samanhaldið ímillum øll liðini kundi verið eitt hak betri líka frá 3. lið (eisini kvinnunum) til 1. lið.
Hvat er tað besta við ÍF Føroyum?
Tað er tað sosiala við at vera saman við øðrum føroyingum og spæla saman við spælarum man fyrr plagdi at dystast ímóti, tað haldi eg er ógvuliga stuttligt.

 

Hvat er tað besta skoritriksið?
Eg haldi, at handan spurningin hava vit fleiri betri egnaði fólk í felagnum til at svara uppá enn eg, tað kundi t.d.  verið Mr. Brian Hansen.

 

Hvør ÍF Føroyar leikari er besti tummari?
Einki at ivast í, at tað má vera bóndasonurin Steffan Kalsø.

 

Hvør krønika var tann besta á ársveitsluni?
Tað var heilt klárt tann krønikan hjá Dánial Viðoy á ársveitsluni í Føroyahúsinum, sum bara hann sjálvur helt var stuttlig.
Hvat er eitt tað mest flovisliga, sum hendi tær í summarferiuni?

Tað var heilt sikkurt, tá eg tók feil av tveimum starvsfeløgum á mínum nýggja praktikplássi.

 

Hvat skulu vit spyrja næsta leikara?

Tit skulu spyrja, hvørji ritualir (vanar) hevur tú á dystardegi?

Udgivet den

Kvinnurnar koyra á!

4. umfar – Fremad Valby vs. ÍF Føroyar 0-1

Enn eina ferð var lagt upp til ein tættan dyst, tá ið okkara kvinnur møttu Fremad Valby í Valbyparkini leygarmorgunin.

Stigatalvan áðrenn dystin: Fremad Valby 7 – vit 6.

Útlitini til dystin vóru góð! Coach Hentze hevði givið damunum góð ráð til morgunábitið og helmingurin bleiv koyrdur til dyst. Tó kom fyrsta avbjóðingin longu áðrenn dystarbyrjan – hvar var rætta skiftirúmið? Tá ið koordinatarnir vóru innstillaðir rætt, taktikkurin klárlagdur og einari effektivari upphitin á 15 minuttir, stóðu kvinnurnar klárar at herja á – og tað gjørdu tær í 90 minuttir!

Einasta málið í dystinum kom, tá fyrri hálvleikur var hálvrunnin. Tá velur teirra, framúr góði, málverji at lofta bóltinum, leggja bóltin niður og síðani taka hann upp aftur – indirekta fríspark!! Fríða trillar bóltin til Maluna, sum setir bóltin trygt í netið til 1-0!

Fyrri hálvleikur er annars javnur, bæði liðini hava málmøguleikar við m.a. skotum á tvørstongina. Liðini kempa hvør í sínum lagi við góðum fótbóltsanda. Hetta kann tó ikki sigast um seinna hálvleik, har mótstøðuliðið verður meira og meira trýst, og tær velja at brúka ljót orð og tacklingar í staðin fyri at hugsa fótbólt – teirra illsinnishirs gav okkum stríðsmegi.

Har køvdi eingin eldhugan – lå lå lå lå lå låååå lå

Dagsins gysari kom, tá Gunvá kom í ein nærdyst við eina á mótstøðuliðnum, sum rakti plett, um nakkin á Gunvá var bólturin – og vekk var hon! Gunvá vaknaði við aftur løtu seinni – lidt rundtosset! Hon mátti av tí sama út á bonkin at sita restina av dystinum fyri at koma seg. Hon hevur tað gott í dag 😉

Liðið leygardagin var: Simona, Durita, Monika (C), Sunneva, Turið, Helena J, Gunvá, Malan, Fríða, Silja og Unn. (Helena W, Sanna, Steintóra).

Dagsins leikari gjørdist Malan.

Kvinnurnar liggja nú á einum 4. plássi við 9 stigum, 4 stig aftanfyri oddaliðið.

 

Komandi dystur verður á Kløver leygardagin kl 13, tá ið vit taka ímóti CBS Sport damunum, ið liggja á 8. plássi við 4 stigum fyri 4 leiktar dystir.

Udgivet den

Nevndin skipað av nýggjum

Síðan árið 2015 fór av bakkastokki, eru nakrar broytingar framdar viðvíkjandi limum í nevndini. Í maj mánaði takkaði Bartal Højgaard fyri seg og eftir summarsteðgin valdi Emil N. Leifsson eisini at trekkja seg úr nevndini. Hetta hevði við sær, at nýggjur formaður skuldi veljast. Til seinasta nevnarfund, sum var í vikuni, var greið semja millum nevnarlimirnar, hvør nýggi formaðurin skuldi verða, nevniliga tá verandi næstformaðurin Ólavur S. í Ólavsstovu. Síðani hevur Helena D. Wardum yvirtikið uppgávuna hjá Ólavi, sum PR og varaforkvinna.

Lív E. Olsen er afturkomin eftir at hava verið í praktikk í Føroyum í vár.

 

Vit takka Bartali og Emil fyri gott samstarv og góða eyðnu.

 

 

Býtið sær hervið soleiðis út:

 

Formaður: Ólavur S. í Ólavsstovu

 

Varaformaður, P.R.: Helena D. Wardum

 

Kassameistari, limagjøld: Malan á Dunga

 

Leikaraloyvir: Ásfinnur Sigvardsen

 

Skrivari Høgni Hansen

 

Útgerð: Brian Hansen

 

Nevndarlimur: Lív E. Olsen

Udgivet den

Góða gongdin hjá ÍF Føroyar kvinnunum heldur fram.

Leygardagin vóru kvinnurnar aftur í eldinum og vunnu ikki minni enn 3-1 á Østerbro IF. Dysturin var leiktur á Kløvermarkini í frálíkum fótbóltslíkindum.

Í fyrra hálvleiki stóðu ÍF Føroyar kvinnurnar væl á vøllinum og pressaðu óført, men torført var at fáa spælið at koyra. Sigast skal eisini, at Østerbro IF hevði meginpartin av spælinum í fyrra hálvleiki.

Í steðginum komu greið boð fra venjaranum um, at nú skuldi tað vera, og at tað gott kundi bera til. Við undanvindi fóru kvinnurnar við góðum treysti inn til seinna hálvleik.

Tá 10 min vóru leiktir av seinna hálvleiki, løgdu Østerbro IF seg á odda. Málið kom eftir fríspark, nakað uttan fyri brotsteigin. Eftir hetta fluttu IF Føroyar kvinnurnar seg longur fram á vøllin og megnaðu at skora til 1-1. Eftir gott spæl og avlevering frá Silju, var bara eftir hjá Unn at skjóta bóltin i málið. Síðani fingu kvinnurnar brotsspark, eftir at ein Østerbro leikari hevði hondina á bóltinum. Malan setti bóltin trygt í netið til 2-1. Seinasta málið kom tá 10 min vóru eftir av dystinum. Simona gúppaði bóltin fram til Unn, sum hegnisliga lobbaði bóltin uppum málmannin.

Allar kvinnurnar kempaðu sera væl og stóðu saman sum lið, og vunnu við hesum ein greiðan 3-1 sigur.

Liðið var mannað av: Simonu, Helenu J., Helenu W., Gunvu, Sunnevu, Moniku, Unn, Maluni, Lív og Silju.

Á bonkinum vóru: Sanna, Sára og Elin.

 

Dagsins leikari gjørdist Unn.

 

Kvinnurnar spæla dyst aftur leygardagin í Valby.

 

 

 

Udgivet den

Heim aftur ongul í reyv…

Leygardagin fór 2. liðið allan vegin til Hellerup, har slagið skuldi standað á vakra heimavøllinum hjá B1903. Sólin skein alfagurt og líkindini vóru perfekt til góðan fótbóltsdyst. Hetta bleiv tó væl og virðiliga broytt seinni.


Sjálvur dysturin var sera tættur, uttan at tað hendi stórvegis. Liðini skiftist um at halda uppá bóltin og trekkja seg aftur. Í 1. hálvleiki hevði heimaliðið møguliga sindur meira yvirvág í spælinum, men tað var hinvegin ÍF Føroyar ið stóð fyri teir fáu málmøguleikar ið vóru. M.a. hevði J skot beint framvið málið, JD bleiv takklaður í skotløtuni og Johan var nakrar ferðir um reppið til at koma fram til góðar møguleikar, men tað bleiv allatíðina bert til ”lige ved og næsten”. Í hinum endanum stóð tann defensivi múrurin stinnur, sostatt at tað vandamiklasta hinir komu fram til vóru nøkur innlegg.


Støðan var tískil 0-0 í hálvleikinum, men 2. hálvleikur byrjaði sum eitt óðveður, bókstaviliga! Aftaná fáar minuttir fekk Johan størsta møguleikan í dystinum, aftaná ein tilvildarligur bóltur datt fyri føturnar á honum í fríari støðu fáar metrar frá málinum. Tíverri kom málmaðurin framúrskarandi skjótt og væl út og fekk bjargað skotinum frá Johan. Um hetta mundið var veðurlagið broytt somikið nógv, at sjálvt Móður Føroyar hevði verið æviga stólt. Uppá lítla løtu fór veðrið frá sól og turt til ódn og monsunregn, og tá ið hekklingur og torusláttur eisini kom uppí leikin, noyddist dómarin at steðga dystinum fyribils, til tess at menn kundu fáa tak yvir høvdið eina løtu.


Lagið var tó framvegis gott og skemtiligt og uml. 15-20 min. seinni sloppu menn í aktión aftur. Um okur enn vóru vátir og kaldir er ilt at siga, men faktum er tíverri at heimaliðið kom væl betri frá byrjan aftaná ófrívilliga steðgin. Eitt fríspark tætt uppá miðjarsirkulin bleiv skotið sera væl innfyri og har var ein dani fyrstur og fekk stútað til 1-0. Sum um tað ikki var frustrerandi nokk at B1903 skoraðu uppá sín fyrsta málmøguleika, so var seinna málið óendaliga frustrerandi. Eitt hart innlegg frá 30-35 metrum rakar ein føroyskan verjuleikara, sum stendur 20-25 metrar frá málinum, men málverjin verður fangaður á skeiva beininum og bólturin fer onkursvegna inn í nærmasta horn. Tað gongur long tíð ímillum at man sær heldigari mál.


Aftaná hetta bleiv tað sera torført, tí ódnarveðrið gjørdi tað fulstendiga ógjørligt at spæla fótbólt. Bólturin steðgaði t.d. ofta á tí váta vøllinum og hetta var til stóran fyrimun fyri heimaliðið, av tí at umstøðurnar vóru perfektar til at bert skula verja eina leiðslu, ístaðinfyri at spæla fótbólt. Ein redusering kom tó, aftaná Emil stútaði ein bólt inn um verjuna, har toppskjúttin Johan var ísakaldur (bæði so og so) einsamallur við málverjanum. Trýstið á heimaliðið vaks fyri hvønn minutt, men inn vildi bólturin ikki. Sigurð var so óheppin at glíða í skotløtuni tá ið hann fekk ein stóran málmøguleika og teir flestu hildu eisini at Reidar skoraði ímóti endanum, men hansara stútari fór tíverri beint uppum. Endaligið úrslitið bleiv tí 2-1 til B1903, men ongin ivi er um at ÍF Føroyar høvdu uppiborið betri.

Uppstillingin:
Sjúrður
Ásbjørn – Hanus – Teitur – Jóhannus
Ingi S. – Emil – J – JD.
Jóhan Petur
Johan
Bonkurin: Bartal, Sigurð, Jákup S.

Dagsins Leikari:
Aftaná sera gott avrik í miðverjuni, fór Hanus trygt avstað við heiðrinum við 6 atkvøðum.

Dagsins Detalja:
Sjúrður var offur fyri fúlari stempling á knæið og ongin í øllum Hellerup var í iva um at hann fekk ilt. Hann fekk eisini fríspark, men var sjálvsagt í øðini um at gerningsmaðurin onki kort fekk. Hann fór tí í harðmælt kjak við dómaran um hetta, aftaná hann endiliga var komin á føtur aftur. Dómarin var tó somikið skelkaður av hesum at hann als ikki visti hvat hann skuldi siga. Hann fekk bert mumlað og stamað okkurt ósamanhangandi nonsens út, sostatt at Sjúrður til síðst bleiv so ótolin at hann kølnaði niður aftur og droppaði at skeldast víðari. Ringt er at siga um dómarin valdi hesa mannagongd við vilja, men faktum er so at hann fekk sissað Sjúrða, so tað er væl møguligt at dómarar kring alt Keypmannahavn fara at skriva hesa lítlu fintuna aftanfyri oyra 😉

Udgivet den

Kvinnurnar eru í gongd

Eftir heldur keðiliga byrjan, megnaðu kvinnurnar saman við Tórður Hentze at vinna næsta dystin í kappingini. Mánakvøldið vunnu tær 1-0 á KFUM. Dysturin var spældur í Emdrupparkini.

Málið kom tá fyrri hálvleikur var 7 minuttir gamal. Tað var aftaná eitt gott útspark frá Simonu, sum Gunvá hegnisliga tók ímóti á miðjuni og síðan spældi til Silju, sum so ger eina klassa avlevering til Maluna, sum skýtur bóltin upp í høgra hjørnið. Eitt fantastiska flott mál!!

Fyrsti hálvleikur var rættiliga javnur, bæði liðini royndu at spæla sítt spæl. Í seinna hálvleiki var tað meira KFUM sum hevði bóltin, men okkara kvinnur kempaðu óført og spældu upp til sítt besta og vunnu harvið dystin.

Verjan saman við Simonu spældu ein branddyst (hvis je sjálv skal siga tað ;)) og megnaðu at halda málið reint.

Alt í alt ein góður dystur frá okkara kvinnum, og trý deilig stig at fáa á kontoina.

Liðið henda dystin var mannað av: Simonu, Turið, Sunnevu, Moniku, Helenu W., Silju, Gunvu, Fríðu, Helenu J., Maluni og Unn. À bonkinum: Steintóra og Sanna.

Dagsins leikari gjørdist Monika við 12 stemmum og Gunvá fekk 1.

Kvinnurnar spæla aftur leygard. á Kløvermarkini, har tær taka ímóti Østrebro IF.

Udgivet den

Tættur og vælspældur dystur fekk 2. lið á stigatalvuna!

Veðrið var líka so vakurt sum lagið var gott, tá ið 2. liðið hjá ÍF Føroyum leygardagin tók ímóti Dragør á Kløvermarkini.

Ynskið um at fáa tey 3 stigini var stórt, bæði eftirsum at 2. liðið tapti sín fyrsta dyst, samstundis sum hetta eisini var fyrsti dysturin hjá nýggja venjarinum, Niels S. Rødgaard. Hetta kom eisini til sjóndar á vøllinum.
Dysturin byrjaði tó ikki so sannførandi. Menn skuldi líka koma í gongd aftaná langa summarsteðgin og har var ikki nógv at skriva heim um fyrstu 15-20 minuttirnar, burtursæð frá nøkrum kvalifiseraðum langskotum.
Men so byrjaði nýggja offensiva duo’in, Johan og Joseph, at bíta frá sær og brilliera. Joseph leggur eina perfekta stikning og Johan time’ar eisini sítt løb til perfektión, sostatt at offside fellan verður fulstendiga snýtt. Einsamallur við málmannin er Johan ísakaldur, avdriblar hann og setir bóltin trygt í tóma netið til 1-0. Stutt aftaná býta teir báðir um rollur, har teir aftaná fornemma 1-2 kombinatión skera ígjøgnum verjuna sum heitur grindaknívur gjøgnum bleytt smør, sostatt at Joseph blívur púra leysur við málmannin, har hann er líka ósvikaliga tryggur og økir til 2-0. Synd at Jack & Jones longu hava patent á vørumerkið J&J.

Restina av hálvleikinum royna Dragør at trýsta á, men miðvøllurin stríðist sum úlvar á skóg, samstundis sum sterka verjan stendur stinn og avvísir øllum. Faktiskt var tað bert einaferð vandi á ferð. Hetta var tá ið ein høgur bóltur bleiv lagdur aftur til Sjúrða, men góði og karakteristiski bóltførleikin kom honum enn einaferð til góðar, so hann trygt fekk fluktað bóltin vekk.

Johan hevði enn ein fríløbara ella tveir aftaná bæði gott uppspæl og flott einmansavrik, men hann var ikki áhugaður í at drepa spenningin í dystinum, so farið var til hálvleiks við einari 2-0 leiðslu.
Í seinna hálvleiki var sama mynstur. Dragør høvdu bóltin meira og meira, men ÍF Føroyar stóð gott og kompakt. Hetta fekk Dragør til at senda alsamt fleiri langar og høgar bóltar, men verjan og serliga miðverjan við Teitur og Reidar syrgdu fyri at tað ongantíð bleiv rættiliga vandamikið.
Hinvegin vóru okkara menn sera vandamiklir uppá effektivt umstillingsspæl. Tó kann man eisini mistonkja leikararnar fyri at hava avtalað áðrenn dystin at nýggi venjarin skuldi haldast á pínubonkinum so longi sum gjørligt. Reidar var tætt við at fáa mál aftaná framúrskarandi einmansavrik, Ásbjørn var sera tætt uppá at fáa prikað bóltin í málið og Joseph valdi eisini at skjóta skeivu megin síðunetið frá 1-2 metrum.

Aftaná hetta hendi sjálvandi tað ið ikki skuldi henda: Fyri fyrstu ferð í dystinum verður Sjúrður ordiliga testaður og megnar eisini at gera eina flotta bjarging, men tíverri bleiv returbólturin settur í netið til 2-1 við 15-20 minuttum eftir.

Leikararnir vóru tó trúfastir ímóti áðurnevndu loyniligu avtalu og gjørdu sítt besta fyri ikki at punktera dystin. Samstundis sum teir stríddist fyrimyndarliga væl og framvegis fyri tað mesta spældu gott, so kom tað triðja málið ongantíð. Ingi var annars nær við við einum heilfluktara og Johan fekk eisini tveir møguleikar avtrat, har hann á einum vanligum degi hevði fingið mál. Tað skal tó nevnast at hann sjálvur stóð fyri at skalla seg sjálvan frían til ein fríløbara, ein imponerandi aktión sum man ikki sær ofta.
Men aftaná 5-6 min. av yvirtíð og ið so nógvum spenningi, kundi ein sera fegin venjari hoyra dómaran bríksla fyri síðstu ferð og staðfesta 2-1 sigurin.

Uppstillingin:
Sjúrður
Jákup – Reidar – Teitur – Bartal
Hanus E. – Ásbjørn – Jóhannus – Hanus M.
Joseph
Johan
Bonkurin: Ingi , Bárður, Sigurð

Dagsins Leikari:
Joseph fekk bæði debut, mál, assist og heiðurin sum Dagsins Leikari við 6 atkvøðum.

Dagsins Detalja:
Aftaná horna til ÍF Føroyar endar bólturin hjá einum leikara hjá Dragør, sum spurtandi fer avstað í vandamikið skjótálop gjøgnum síðuna. Venjarin hjá ÍF Føroyum brølar at leikararnir skulu koma aftur, men hetta gjørdi hann eftir øllum at døma so hart og ofta at áðurnevndi leikarin byrjar at skeldast við venjaran, ímeðan hann framvegis hevur bóltin! Hetta distraheraði leikarin somikið nógv at sjálvt Teitur náddi at renna hann uppaftur og fáa bóltin av vandaleið. Hetta elvdi eisini til sindur av balladu aftaná dystarlok, men i krig, kærlighed og Serie 2 gælder alle kneb 🙂

Udgivet den

Leikarin á bonkinum: Jógvan Ósá

Summarið er av og tíð er til nýggjan leikara á bonkinum. Hesuferð er tað jukeboksin og venjarin á 3. liði, Jógvan Ósá, ið hevur sett seg í stólin at svara settu spurningunum. Jógvan má av sonnum metast at vera gamal í garði á Kløvermarkini, men helst er tað í veitslulagi at flest okkara kenna Jógvan í sínum rætta elementi, tá ið hann við gittara í hond spælir klassikarar sum Billie Jean, Black or White og ikki minst Dynamit klassikaran „pápi tín býr ei í Tórshavn“.

Vit takka Jógvani fyri vala svar, og ynskja honum og liði hansara eitt gott kappingarár! 

Lýs teg sjálvan sum fótbóltsspælara við 3 orðum: 

Gekk akkurat ikki 😉

Svevur tú 8 tímar hvørja nátt?
Eg royni, men tað eydnast sjálvdan.

Fleiri lutaseðlar ella hægri limagjald?

Avgjørt hægri limagjald !!! Tað endar altíð við at eg sjálvur má keypa helvtina av seðlinum.


Hvønn sang burdu øll havt hoyrt minst einaferð og hví?
Grøv nr. 13 hjá Dynamit. Tey flestu siga seg ikki dáma teir, men ØLL syngja við tá hann verður spældur 🙂

Nær vaskaði tú skinnarnar seinast?
Tað er eitt sindur síðani. Teir kundu gott trongt til at blivi vaskaðir!

Besti leikari tú hevur leikt við?
Hmm hatta er ringt, har hava verið nógvir góðir leikarar á Kløvermarkini. Men skal ein vejlast burturúr, má tað nokk vera Christian Høgni Jacobsen, hann hevur mest sum alt, og er nokk ein tann besti avsluttarin, íð hevur verið í Føroyskum fótbólti. Tað hevur hann víst, bæði í Føroyum, Danmark og í altjóða høpi.

Besta ÍF Føroyar ball?
Har hava verið nógv góð ball, tað er ringt at velja eitt burturúr. Men seinasta ársveistla, sum var í Føroyingahúsinum var ómetaliga góð.

Hvat er ein góður kossur?
Uhh hatta er ein góður spurningur. Eg vildi sagt at ein góður kossur, er tá man fær hjartabankan, og gummibein. Tá veit man at man hevur rakt plet 😉

Besta minnið av Kløvermarkini?

Aftur her er ringt at velja burturúr. Eitt gott minnið var tá Bergur Strøm kom direkta av skarv, nastan ikki gonguførur.
Tað fyrsta hann gjørdu eftir at hann var innskiftur, var at taka fríspark.
Leikarnir hugsaði sítt, ”hasin bólturin fer av f…. til”, men hann setti bóltin í trykantin. Eg havi sjálvdan sæð ein so fegnan leikara, man skuldi trúð hann hevði vunnið meistaraheiti.

Hvør hevur best reyv á liðnum hjá tær?

Har eru nógvir um boðið, Høgni Hansen og Jákup Andrias hava báðir ein góðan afturpart. Har er ringt at siga hvør hevur munin, men eftir sum at Høgni áður er nevndur, sigi eg Jákup Andrias.

Hvat kundi verði betri í ÍF Føroyum?
Fleiri dystin leygardag og á kunstvølli. Annars er ikki nógv at seta fingurin á.

Hvat er tað besta við ÍF Føroyum?

Tað er samanhaldi í felagnum, og at man kemur at kenna nógvar føroyingar. Har er altíð góðir stemningur, bæði til venjing, dyst, og ikki minst til veistlunar.

Hvat er tað besta skoritriksi?
Eg kenni ikki til øll hesi skoritriksini. Fyrr gjørdu man sum um man skrivaði skeivt til onkra dámu, eg veit ikki ordilig hvat virkar best í dag. Men eitt fitt smíl er altíð gott at byrja við 😉

Hvør ÍF Føroyar leikari er besti tummari?
Tað má óiva vera Steffan Kalsø. (Uttan at fornermað nakran annan) 😉

Hvør krønika var tann besta á ársveitsluni?

Har vóru nógvar góðar, Sjúrður Petersen og Dánial Viðoy høvdu fleiri góðar at fortelja. Men eg haldi ikki, at eg fari at velja nakra serliga burturúr.

Hvat skulu vit spyrja næsta leikara?

Hvat er eitt tað mest flovisliga, sum hendi tær í summarferiuni?