Kategori: Tíðindi

Udgivet den

Totalt avsmyrjing í Tårnby

Leygardagur 13. maj – AB Tårnby vs. ÍF Føroyar II: 0-8 (0-4)

0-1: Sjálvmál (Bárður)

0-2: Dion (Jósup)

0-3: Dion (Jósup)

0-4: Johan (Jósup)

0-5: Dánial (Jósup)

0-6: Jens Michael (Jósup)

0-7: Johan (Dion)

0-8: Johan (Dion)

 

Uppstilling:

Mathias

Bárður – Hanus – Heine – Jóhan

Pætur (c) – Tummas

Jóhan Petur – Dion – Johan

Jósup

Bonkurin: Ásbjørn, Jens Michael, Dánial

 

Aftaná sera sannførandi 6-0 sigurin heima ímóti CSC, so trúðu menn, at ein heilt onnur og størri avbjóðing lá og bíðaði í Tårnby, serliga eftirsum at AB Tårnby júst frammanundan høvdu fingið javnleik ímóti hinum oddaliðnum í deildini, Fremad Amager. Ein sera vælmannaður hópur var tískil gott uppsettur til dystin, men tað skuldi skjótt vísa seg, at dysturin fór at blíva munandi meira stuttligur enn strævin.

Okkara menn settu okkum á dystin beinanvegin, og tað gekk ikki leingi, áðrenn bæði Dion og Johan fingu hvør sín møguleika til at skora, men Dion rakti ikki bóltin nóg reint við sínum fluktara, og Johan rakti ov tætt uppá málmannin við sínum skoti. Tað kom tó skjótt hol á, og tað var ongin annar enn Bárður, ið átti stóran leiklut í hesum. Hann brýtur gott ígjøgnum á høgru síðu og leggur ein somikið vandamiklan bólt innfyri til Jósup, at ein verjuleikari hjá teimum endar við at koma ímillum og sendir bóltin í egið mál til 1-0.

Stutt aftaná brúkar Dion ein hálvfluktara til at skjóta uppum og líka innstilla siktið, tí hareftir var ongin náði. Jósup stútar eitt innlegg úr vinstru víðari til Dion, sum úr høgru síðu høggur til fyrstu ferð og smekkar bóltin í málið til 2-0. Aftaná hetta lat triðja málið bíða eftir sær, men tað var absolutt ikki vegna vantandi málmøguleikar. Aftaná Jósup hevur brent ein fínan møguleika, so loyvir Johan sær at misnýta ein risamøguleika, har hann ópressaður frá stuttaru fjarstøðu hevur gott pláss til at róliga útplasera málmannin, men onkursvegna rakar hann ikki málið. Jósup fær enn ein góðan møguleika, sum ikki gevur mál. Dion roynir seg aftur við einum skoti, og til síðst er tað Jóhan Petur, sum við hørðum skoti aftaná innlegg bert skal raka alla aðrastaðni enn júst á málmannin, sum stendur fulstendiga seldur; men tíverri rakar hann beint á fótin hjá honum.

Ímóti endanum av hálvleikinum bar tó endiliga til aftur. Og aftur var tað Dion ið var uppá spæl. Jósup spælir bóltin til hann uttanfyri brotsteigin, og aftaná nøkur trekk framvið nakrar leikarar, so útplaserar hann málmannin við góðum skoti til 3-0. Beint áðrenn hálvleik eydnaðist tað eisini hjá Johan at koma á máltalvuna. Eitt innlegg frá Jóhan úr vinstru síðu endar í einum nærdysti millum Jósup og ein verjuleikara, har bólturin verður lagdur at til Johan, sum hesaferð fær gagnnýtt stóra møguleikan til at skora til 4-0.

Í seinna hálvleiki vóru fleiri málmøguleikar enn nakar hevur tíð til at skriva ella lesa í hesum eksamenstíðum, men tað kann nevnast at Jósup beinanvegin fekk sín higartil størsta møguleika til at skora, men ei heldur hesaferð var eydnan við honum. Men um tað ikki riggar at skora sjálvur, so er tað týdningarmikið at man kann hjálpa øðrum til at gera tað, og her var hann sera raskur. Fyrst kombinera Jósup og Dánial seg ígjøgnum verjuna í høgru síðu og ístaðinfyri at skjóta sjálvur, so serverar Jósup bóltin fyri Dánial, sum trygt kann skora til 5-0. Stutt aftaná spæla Jósup og Jens Michael saman í vinstru síðu, og hóast har enn var nógv arbeiði at gera, so megnar Jens Michael at fáa gott skot á, so bólturin syngur í málið til 6-0, annar dystur á rað, at hann skorar eitt sera hegnisligt mál.

Aftaná hetta byrjaði ein intens innanhýsis kapping um, hvør kláraði at koma tættast uppá at skora, uttan at skora. Jens var tætt uppá at fáa fleiri mál, og tað sama var Dánial, men síðsti neyvleikin í skotunum manglaði akkurát. Heine var eisini sera nær við aftaná hornaspark, og Jóhan Petur var aftur tætt uppá at koma á máltalvuna. Har var tó ongin, sum kundi kappast við Johan hendan dagin. Aftaná at hava brent nakrar fínar møguleikar aftrat, so endaði hann við at fáa ein møguleika sum (um møguligt) var størri enn tann, sum hann hevði í fyrra hálvleiki. Johan kann av røttum kallast ein málrevur, so hvussu tað eydnaðist honum at standa so leysur og tætt við málið og síðani at skjóta so langt og ófantaligt framvið málinum, má standa eftir sum ein ósvaraður spurningur (uttan so tú spyr Johan, sum ivaleyst hevur eitt skjótt og gott svar!).

Men sum tann málrevur hann er, so lat hann seg ikki ávirka av skommini og stríddist heldur víðari. Hetta gav eisini úrslit, tí ímóti endanum er hann fyrstur á ein langan rennibólt frá Dion og einsamallur við málmannin eydnast tað honum í aðru atløgu at skora til 7-0. Til síðst sendir Dion frá høgru síðu eina meistarliga avlevering inn til Johan sum opnar alla verjuna, og her er Johan endiliga ósvikaliga tryggur og syrgir fyri eitt hattrick til sín sjálvan og endaligu støðuna 8-0.

Fyri annan dyst á rað var tað sanniliga talan um enn ein róligan, vakran og fantastiskan dag á kontórinum. AB Tårnby vóru faktiskt ikki líka so vánaligir sum CSC, men tá ið hendan manningin er í hopla, tá er ikki nógv annað man kann gera enn at standa og njóta tað. Vónandi verður hetta sama mannagongd til næsta dyst, har mótstøðulið verða lokalrivalarnir úr Fremad Amager. Teir royna at fylgja við í hølunum á okkum í tabelluni, men tann jagstranin skal fáa ein bráðan enda komandi sunnudag.

 

Dagsins Leikari: Nógvir mans fingu uppiborðnar atkvøður aftaná hendan dystin, men hóast liðfelagarnir alsamt nærkast Dion, so eydnaðist tað honum fyri triðja dyst á rað at vinna heiðurin, sum Dagsins Leikari, har hann fekk tvær atkvøður meira enn Johan og Pætur.

 

Dagsins Detalja: Her kunnu nevnast fleiri detaljur, bæði áðrenn, undir og aftaná dystin. Av juridiskum orsøkum kunnu vit tó ikki fara í nærri detaljur viðvíkjandi koyritúrin hjá Dánial til Tårnby, men vit eru nakrir ið eru takksamir fyri at vit komu heilskaptir til dystin. Tað kann eisini nevnast, at Ásbjørn fyri fyrstu ferð í næstan 4 ár er sloppin framat aftur at vaksa klæðini, aftaná hann í 2012 á sera taktiskan hátt megnaði at oyðileggja eitt heilt leikarasett og harvið syrgdi fyri, at hann ikki bleiv biðin aftur. Eitt annað stuttligt faktum er at hóast vit hava vunnið tveir teir seinastu dystirnir við samanlagt 14-0, so hevur Jósup sum fremsti maður í álopinum ikki fingið nakað mál í teimum báðum dystunum. Um man er í tí fitta lagnum, so kann man leggja aftrat at hann hinvegin hevur lagt upp til næstan helvtina av teimum 14 málunum. Í sjálvum dystinum var Johan raskur til at stjala uppmerksomheitina og serliga tveir av misnýttu málmøguleikunum fara at liva longi í minninum hjá teimum, ið vóru vitnir. Men um man leggur happingarmentalitetin til síðis eina løtu, so var tað av sonnum ein stór frøi at síggja, hvussu Johan sum fremsti maður í álopinum spurtaði yvir 50 metrar heim fyri at hjálpa til at forða einum kontraálopi hjá hinum, hóast støðan var 6-0 og minni enn 10 minuttir vóru eftir. At Johan so skoraði beinanvegin aftaná vit fingu bóltin, ger handan sekvensin til ein uppibornan vinnara av Dagsins Detalju.

Udgivet den

Kvinnurnar hava skrivað søgu

ÍF Føroyar kvinnurnar eru víðari í steypakappingini. Hetta er fyrstu fer í søgu felagsins, at kvinnuliðið hevur leikt seg víðari.

Dystur var leiktur á Herlev stadion týsdagin. Tað var bakandi sól og upp í móti 20 hitastigum. Móstøðulið okkara, Herlev IF, spælir í Sjællandsseriuni, og hetta er ein deild hægri enn okkara Keypmannahavnsseria. Tískil var lagt upp til eina trupla uppgávu fyri okkum. Men vit vita jú øll, at “alt kan ske i fodbold”.

ÍF Føroyar venjarin stillar upp við spæliskapin : 4-1-4-1

Vit byrja dystin væl og hava bóltin nógv. Ongin opin málmøguleiki er fyrstu 20 minuttirnar. Men so kemur hol á. Vit fáa fríspark á Herlev hálvuni, einar 30-35 metrar frá málinum. Rakul Johannesen tekur sær av støðuni og leggur ein langan bólt inn í feltið har liðskiparin Monika Sumberg vakurt stútar bóltin hart í málið til 1-0 til ÍF Føroyar. 10 minuttir seinni leggja vit okkum á odda 2-0. Rakul Johannesen verður spæld púra leys í feltinum og í tveimum atløgum fær hon skotið ÍF Føroyar ímóti einum stórum bragdi, ið ongantíð áður er sæð hjá kvinnunum hjá ÍF Føroyum. Tó koma vit aftur á jørðina, tá Herlev IF minkar um munin í 35 minutti til 2-1, ið eisini gjørdist hálvleiksstøðan. Flott avrik av okkara kvinnum í fyrra hálvleiki, ið leiktu fótbólt á sera høgum støðið.

Í hálvleikinum var nú lagt upp til, at góður møguleiki var at vinna dystin, um vit hildu fast í okkara spæli. Eisini tosaðu vit um, at umráðandi er at vera til reiðar við aftursvari, um tað skuldi hent, at Herlev IF kom upp á javnt.

Seinni hálvleikur koyrir nógv aftur og fram. Og sum í fyrra hálvleiki eru fáir málmøguleikar at byrja við. Men so hendir tað, sum ikki mátti henda. Í 67 minutti javnar Herlev IF til 2-2. Men tað gongur ikki meira enn 3 minuttir, so vóru vit aftur har. Ása Klakkstein vinnur bóltin mitt á hálvuni hjá mótstøðuliðnum. Hon ger skjótt av og ger ikki mætari enn at skjóta bóltin í móti málinum. Málverjin klárar ikki at halda skotinum frá Ásu og so er 3-2 til okkara, og føroyska stórhendingin lúrir.

Síðstu 20 minuttirnar av dystinum var einastandandi stríðsvilji frá okkara kvinnum. Vit verja væl og tey skotini ið koma móti okkara málið hevur málverjin Nina T. Davidsen fult tamarhald á. Tað hjálpti eisini nógv, at fleiri eyðsýndir føroyskir áskoðarar høvdu leitað sær túrin á Herlev stadion.

Tá dómarin bríkslar dystin av, hava vit vunnið 3-2 á stórfavorittunum úr Herlev IF. Fagnaðurin var ovurstórur á leikarum og áskoðarum. Hetta er nemliga fyrstu fer í søguni, at ÍF Føroyar spælir seg víðari í steypakappingini. Dagsins leikari gjørdist Ása, ið eisini fekk 1 mál.

Nú er bara at vóna, at Brøndby ella Fortuna Hjørring kemur úr pottinum næstuferð.

Udgivet den

Klassamunur ímóti Christiania

Leygardagur 30. apríl – ÍF Føroyar II vs. CSC: 6-0 (4-0)

1-0: Johan (Dion)

2-0: Dion (Johan)

3-0: Dion (Dánial)

4-0: Jens Michael

5-0: Dánial (Jósup)

6-0: Dion (Johan)

Uppstilling:

Mathias

Bárður – Teitur – Kaj – Dánial

Pætur (c) – Ingi S

Jens Michael – Dion – Johan

Jósup

Bonkurin: Ásbjørn, Jóhannus, John

 

Aftaná dramatiska og týdningarmikla sigurin ímóti Union, so skuldi tað visa seg at spæla ímóti Christiania minnir um at vitja Christiania: Tað kann blíva ein harður og villur umgangur um man sjálvur ger tað til tað, men sum oftast er tað bara avslapning og reint hygg. Hesin dysturin var uttan iva tað seinna, tí meira ómaksleysum og tryggum sigri skal man leita leingi eftir.

CSC høvdu áðrenn dystin latið nógv mál inn, so ætlanin var at leggja eitt høgt trýst á teir frá fyrsta bríkslið av, sum so sanniliga eisini gav úrslit beinanvegin. Fyrst brendi Johan ein stóran møguleika, so brendi Dion ein stóran møguleika, so legði Dion upp til 1-0 málið hjá Johan, og so legði Johan upp til 2-0 hjá Dion, alt áðrenn 5 minuttir vóru spældir! Bæði málini komu aftaná góðar avleveringar innum verjuna og verjan hjá teimum var sum heild sera passiv og kláraði yvirhøvur ikki at fylgja við allar yvirspælingarnar, sum komu frá miðjuni og bakkunum. Tað tók ei heldur langa tíð, áðrenn Dánial við framúr avlevering fann Dion, sum trygt kundi skorað til 3-0 áðrenn fyrsta korterið var avrunnið. Miðskeiðis í fyrra hálvleiki vann Jens Michael síðani bóltin á teirra hálvu, sneiddi sær elegant framvið fleiri leikarum og skoraði vakurt til 4-0. Ilt er at siga, um har nakrantíð náddi at vera lív ella spenningur í dystinum, men hetta fjórða málið sløkti ið øllum førum øll lívstekin. Aftaná hetta vóru ymiskir smáir og størri málmøguleikar, m.a. eitt fríspark úr 40-45 metrum frá Kaj, ið hevði uppiborið eina betri lagnu, men fleiri mál komu ikki í fyrra hálvleiki.

Í seinna hálvleiki var enn meira av tí sama, har klassamunurin var so mikið stórur, at tað bleiv torført ikki at taka seg eitt sindur av løttum. Men í minsta lagi royndi dómarin at geva okkum sindur av mótstøðu – tíðliga í seinna hálvleiki dømdi hann brotsspark til CSC í einari støðu, har Teitur átti fríspark. Symptomatiskt fyri dystin, so eydnaðist tað tó ikki CSC at raka málið frá 11 metrum. Restina av dystinum var bert spæl móti einum málið, og málmunurin kundi óivað verðið enn størri. Serliga Dion og Jósup fingu málmøguleikar, har teir á einum øðrum degi høvdu tímað at fingið mál, Dánial var eisini nær við og sjálvt John, Pætur og Bárður endaðu í vandamiklum støðum. Har komu tó bert 2 mál í seinna hálvleiki. Málið til 5-0 kom aftaná forarbeiði frá Jósup, sum Dánial avsluttaði við manér. Til síðsta málið var tað enn einaferð Dion og Johan ið vóru uppá spæl, har Johan syrgdi fyri, at Dion til síðst fekk sítt triðja mál og harvið eitt uppiborið hattrick. Dysturin endaði sostatt 6-0 til ÍF Føroyar, aftaná ein dyst har sjáldsama fáir sveittadropar noyddist at ofrast. Tað skal tó absolutt ikki klagast um manglandi spenningin, tí ofta hevur spenningsstøðið verið alt ov nógv av tí góða á 2. liðnum, so ongantíð betri, um man kann fáa fleiri ”keðiligar” dystir á sama hátt, har man bara kann sleppa at njóta flotta spælið, nógvu málini og tey trý ómetaliga tryggu stigini.

 

Dagsins Leikari: Í dag vóru atkvøðurnar meira javnt deildar enn í seinasta dysti, men hóast hann hevði bæði Inga, Johan og Pætur í hølunum, so endaði heiðurin enn einaferð trygt hjá Dion, sum fekk 7 atkvøður fyri sítt hattrick og sítt sum heild sera góða avrik.

 

Dagsins Detalja: Tað mest merkisverda við dagsins dysti var, at snøgt sagt einki merkisvert hendi. Dómarin hevði nakrar sera løgnar dømingar, men ein vánaligur dómari kann ikki sigast at vera serliga merkisvert á Kløvermarkini, heldur tvørturímóti. Hetta var ein so róligur og góður dagur á kontórinum, sum man kann fáa.

Udgivet den

Drama, vilji og klassi fyri allar pengarnar!

Leygardagur 23. apríl – Union vs. ÍF Føroyar II: 2-3 (1-0)

1-0:

1-1: Sigurð (Dion)

1-2: Dion (Ragnar)

2-2:

2-3: Dion (Jens Michael)

Uppstilling:

Mathias

Sámal – Einar – Jóhannus

Dánial – Pætur (c) – John – Ragnar

Joseph

Jóhan Petur – Dion

Bonkurin: Sigurð, Jens Michael

 

Aftaná sigrar í báðum fyrstu dystunum, so var tað hesaferð ein øðrvísi og størri avbjóðing ið stóð fyri framman hjá ÍF Føroyum. Union hevði undan dystin leikt tríggjar dystir og vunnið allar, so her var lagt upp til eitt satt brak millum tvey lið við fullum stigatali. Uppgávan bleiv ikki gjørd lættari fyri okkara 2. lið, eftirsum liðið var sera hart rakt av mongum avboðum, men tá er tað gott at hava ein bæði breiðan og sterkan hóp.

Til dystin føldi venjarin seg noyddan at eksperimentera við heilt nýggjari spæliskipan, sum teir flestu leikararnir ikki høvdu roynt fyrr. Hetta hevði sjálvandi við sær ein ávísan risiko, men lukkutíð tók tað ikki langa tíð hjá leikarunum at koma inn í skipanina og dystin. Union høvdu møguliga bóltin eitt sindur meira, men teir høvdu stórar trupulleikar við at bróta ígjøgnum defensiva strukturin, samstundis sum okkara menn vóru ein støðug hóttan uppá umstillingar. Í fyrra hálvleiki komu bæði John, Jóhan Petur, Joseph og Dánial í vandamiklar støður, har líka tann síðsta nertingin ella neyðuga hepni manglaði. Einar og Dion høvdu eisini báðir giftig langskot, har sera lítið manglaði í til at geva dreymamál. Union megnaðu sum nevnt ikki at bróta ígjøgnum og beinleiðis spæla seg fram til nakrar opnar málmøguleikar, men harafturímóti vóru teir sera vandamiklir uppá deyðbóltsstøður, har serliga teirra hornaspørk góvu okkum stórar trupulleikar. Tvær ferðir innanfyri stutta tíð noyddist Sámal at bjarga bóltin á strikuni aftaná hornaspark, men til síðst endaði tað galið, tá ið Union beint undan hálvleik endiliga fekk stútað bóltin í netið til 1-0, aftur aftaná hornaspark.

Hóast aftanfyri í hálvleikinum, so høvdu leikararnir gott mót og vóru sera uppsettir uppá at venda gongdini. Nakrar fáar broytingar blivu gjørdar og hesar skuldu vísa seg at fáa stóra ávirkan seinni. Dion spældi sum 10’ari í seinna hálvleiki, og tað tók ikki langa tíð, áðrenn hann gjørdi um seg fyrstu ferð. Ein góð stikning, frá innskifta Sigurð, spælir Dion leysan frá málmanninum og Dion megnar eisini at sneiða seg framvið honum, men tíverri bleiv vinkulin ov spískur, og Dion rakar stongina ístaðinfyri tóma netið. Hesin skaðin skuldi tó skjótt blíva gjørdur góður aftur. Miðskeiðis í seinna hálvleiki fáa okkara menn sostatt 2 mál uppá 2 minuttir. Tað fyrsta kom enntá aftaná hornaspark, so nú sloppu teir at smakka teirra egna heilivág. Dion sendir ein bólt til aftastu stong, har ein leysur Sigurð kemur lúrandi og trygt stútar bóltin í málið til 1-1. Minuttin aftaná endar gott uppspæl við, at Ragnar verður leysur á vinstru síðu og harfrá sendir hann eina flata avlevering inn til Dion, sum stendur beint uttanfyri brotsteigin. Tað kann væl vera, at Dion frammanundan ikki megnaði at skjóta bóltin í tómt mál frá 2-3 metrum við sterka fótinum, men í hesari støðuni gjørdi hann ikki mætari enn at høgga til bóltin fyrstu ferð við veikara fótinum frá 18 metrum og knúsa hann í síðunetið til 2-1.

Viljin var í forvegin ovurstórur, men hann bara vaks aftaná hetta og Union tyktiskt rystir. Tíverri skuldi dómarin og deyðbóltsstøður aftur vísa seg at vera ein stór avbjóðing. Við 20 minuttum eftir velur dómarin fyrst at geva eitt bílligt gult kort til Jóhannus og harvið verða 11 mans skerdir til 10. Fyri at gera ilt verri, so bleiv eftirfylgjandi frísparkið eisini sparkað inn í brotsteigin, har ein hjá teimum er fyrstur á bóltin og skorar til 2-2. Man náddi næstan at stúra fyri tí ringasta, men ístaðinfyri at fella í fátt, so kempaðu allir mans so dúgliga at man skuldi trúð, at vit vóru 12-14 mans ístaðinfyri 10. Union roynir sjálvsagt at leggja trýst á, men hetta opnar fyri kontraálop, og júst hetta skuldi vísa seg at blíva avgerandi. Ein tilfeldigur bóltur á egnari hálvu endar hjá innskifta debutantinum Jens Michael, sum sær Dion byrja sítt løb í djúpdina. Heimaliðið roynir at gera offside-fellu, men timingin av bæði renni og avlevering er perfekt, og Dion blívur sostatt púra leysur við málmanninum í vinstru síðu. Øgiligt trýst er á Dion í støðuni, men hann er ísakaldur á markinum til tað psykopatiska og í besta Henry/Martial/Niels Rødgaard-stíli leggur hann bóltin róligt og trygt í síðunetið í høgru síðu og útloysir harvið fyri aðru ferð eina sanna eksplosión av gleði.

Tíðin gongur ómetaliga seint teir síðstu 10 minuttirnar, og Union trýsta øgiligt á, men har eru ongin sum helst vegur ígjøgnum múrin av føroyskum Mannfólki (við stóra M!), og hóast Pætur noyðist at trekkja eitt gult kort ímóti endanum, so er tað tættari uppá at vit skora uppá kontra enn, at teirra trýst gevur nakað úrslit. Tað var kortini eitt ótrúligt lættilsi at hoyra síðsta bríkslið og fáa staðfest dramatiska sigurin ímóti kappingarneytunum í oddinum. Sjáldan hevur venjarin verið so himmalska lukkuligur aftaná ein dyst, har man noyddist ígjøgnum allar kenslur, áðrenn tað til síðst endaði lukkuligt. Fyri hetta, eigur hvør einasti maður á liðnum, stórt rós uppiborið og meira avtrat, tí hetta var sjálv definitiónin uppá eitt mannfólkaavrik!

 

Dagsins Leikari: Hóast hvør einasti maður hevði uppiborið atkvøðu, so slapp man allíkavæl ikki uttanum at har serliga var ein (leikari) sum átti sera stóran leiklut í sigrinum. Teir defensivu fingu nakrar atkvøður fyri sítt stríð, men aftaná 1 assist og 2 framúrskarandi vøkur og týdningarmikil mál, so bleiv tað ein stórsigur til Dion, sum við 11 atkvøðum setti nýtt met hetta kappingarárið.

 

Dagsins Detalja: Dysturin sum heild var ein stór lekkur fantastisk detalja. Millum áskoðararnir var navnframi John Rødgaard – sum hevur megnað at vunnið greipuna í føroyskum fótbólti sum leikandi venjari hjá TB – og hann segði seg vera beinleiðis ovfarnan av høga støðinum, ið bleiv lagt fyri dagin. Men um ein ávis detalja skal finnast, so vóru teir flestu á einum máli um, at hendan detaljan fann stað aftaná fyrsta málið hjá Dion. Her var venjarin so fegin og kátur, at hann rann inn á vøllin fyri at jubla saman við leikarunum og hetta gekk møguliga ið so hart fyri seg, tí endin var at stakkals Ragnar fekk ein alboga í høvdið og aftaná sá út sum hann hevði tapt ein boksidyst, alt uttan at venjarin varnaðist nakað. Hetta forðaði tó sjálvandi ikki Ragnar ”Lothbrook” í at stríðast víðari á sama hátt.

Udgivet den

Lekkurt liðavrik hjá 2. liði

Leygardagur 16. apríl – ÍF Føroyar II vs. FA 2000: 3-0 (0-0)

1-0: Jósup (Ingi S.)

2-0: Ingi S. (Jósup)

3-0: Dion (Jósup)

Uppstilling:

Mathias

Bárður – Kaj – Svenn – Ragnar

Pætur (c)

Jóhan Petur – Ingi S.

Ingi P. – Jósup – Dion

Bonkurin: Jóhannus, Dánial, Beinir

 

Aftaná ein tepran sigur í ársins fyrsta dysti, so kom túrurin til ársins fyrsta heimadyst á Kløvermarkini. Í fjør taptu okkara menn ímóti gestunum úr FA 2000, so nú skuldi stríðast fyri bæði revansju og 3 týdningarmikil stig. Lukkutíð var føroyska liðið bæði vælmannað og vælupplagt hendan dagin.

Fyrsti málmøguleikin fall tó til FA 2000. Aftaná fáar minuttir fáa vit eitt horna, men hetta endar við einum kontraálopi til hinar og frá nokkso fríari støðu, skjýtir ein hjá teimum bóltin stutt framvið málinum. Ein hampuliga stórur møguleiki, men hann skuldi eisini vísa seg at vera tann einasti teir fingu í øllum dystinum.

Aftaná hetta setti ÍF Føroyar seg á dystin og nærkaðist alsamt meira einum máli. Tann síðsti nertingin manglaði kortini í fyrra hálvleiki, har antin síðsta avleveringin ella avslutningin manglaði neyvleika. Jóhan Petur, Kaj, Dion og Jósup komu allir í slíkar vandamiklar støður har bert tað síðsta manglaði og Ingi S. fekk enntá ein stóran møguleika til at skora, men brendi frá stuttari frástøðu. Tá ið man hugsar um hansara mál seinni í dystinum, so hevur hann sikkurt hildið hendan møguleikan vera ov lættan at skora uppá.

Tann størsti málmøguleikin kom tó í yvirtíðini, tá ið tað bleiv bríkslað fyri brotsspark til ÍF Føroyar. Hóast venjarin ikki var partur av dómaraseðlinum, so eru mangir aðrir góðir skjúttar at velja ímillum, men har var serliga ein sum hevði sjálvsálitið í topp. Kaj hevur sikkurt hugsað, at tá ið hann kann skora frá 40-45 metrum, so burdi 11 metrar verið so lætt, sum at finna ein fullan føroying á Skarv. Kaj fór eisini trygt til bóltin og sendi málmannin skeiva vegin, men tíverri sendi hann eisini bóltin skeiva megin stólpan og framvið málið.

Hálvleiksstøðan var sostatt enn 0-0, men spælið var gott, so venjarin kundi ikki gera nógv annað enn at biðja leikararnar raka málið í seinna hálvleiki og hesum boðunum aktaði teir sera væl. Longu aftaná fáar minuttir verður ein langur bóltur sendur inn í brotsteigin hjá FA 2000, og har var Ingi S. fyrstur á bóltin og við bringuni leggur hann bóltin perfekt av til Jósup, sum líka so perfekt høggur til bóltin fyrstu ferð og fluktar hann í málið við bæði megi og neyvleika. Málmaðurin kann onki gera og 1-0 til stóra frøi á Kløvermarkini.

Armarnir á síðulinjuni vóru illa nokk komnir niður aftur, áðrenn Jósup og Ingi S. aftur vóru uppá spæl, men hesaferð skifti teir leiklut. Aftaná eina fiksa lítla 1-2 kombinatión við Jósup mitt á teirra hálvu, fær Ingi bóltin 20-25 metrar frá málinum og harfrá sendir hann eitt hart, lágt og sera gott skot í síðunetið til 2-0.

Man helt enntá, at tað eisini bleiv 3-0 sera stutt aftaná, men hesaferð gjørdi teirra málmaður eina rimmar bjarging, tá ið hann bjargaði einum annars góðum skoti frá Jósup. 3-0 málið kom tó seinni og enn einaferð varð talan um eina sanna perlu. Dion fær bóltin á egnari hálvu og spælir bóltin til Jósup, sum frá miðjuni leggur ein langan bólt í djúpdina. Har er ongin hjá teimum sum kann fylgja við Dion í fullari ferð og teirra málmaður kennir seg noyddan at koma sindur út úr málið og ímóti Dion. Hetta skuldi hann ikki havt gjørt, tí Dion ger ikki mætari enn at leggja eina følda innarasíðu á bóltin fyrstu ferð og leggur bóltin í ein høgan, bleytan og flottan boga yvir málmannin og í netið til 3-0.

Har vóru eisini málmøguleikar til 4-0, har serliga fríleyparin hjá Dánial kann nevnast, men hann var í tí miskunnsama lagnum og valdi at skjóta bóltin framvið málinum og harvið goyma málskjótingina til okkurt annað og meira týdningarmikið tíðspunkt.

Ein sera uppiborin sigur, har tað defensiva stóð perfekt og tað offensiva spælið riggaði til fulnar, so alt í alt kann ikki sigast annað enn at lovandi byrjanin heldur áfram. Hetta var enntá ímóti einum liði sum vunnu trygt ímóti okkum í fjør, so tað ber eisini vitni um munandi framgongd og eitt spennandi kappingarár fyri framman.

 

Dagsins Leikari: Har vóru fleiri leikarir ið fingu væluppibornar atkvøður aftaná flotta liðavrikið, m.a. Pætur, Dion og Jósup. Kappingin stóð tó ímillum Svenn og Inga Sørensen, og her fekk Ingi akkurát eina atkvøðu meira og harvið eisini heiðurin sum Dagsins Leikari. Ingi hevði bæði flott upplegg, flott mál og flottan avbrennara at vísa á, so tað var eisini ein uppiborin heiður.

 

Dagsins Detalja: Har vóru nakrar smávegis detaljur, m.a. Jóhan Petur sum gjørdi tvær fúlar tunnellir á sama fornermaða leikara og t.d. venjarin ið lukkaðist sum spámaður úti á síðulinjuni (hann spáddi rætt at Ingi fór at skora til 2-0 og at Dion fór at fáa eitt flott mál til 3-0, men tað nýtast vit ikki at nevna), men fyri aðru ferð á rað, so er tað Kaj ið fer avstað við uppmerksumheitini. Hann skoraði sum kunnugt sigursmálið næstan frá miðjuni av í seinasta dysti og til hendan dystin var ongin ivi um, at Kaj hevur fingið blóð uppá tonnina av tí sama. Hóast hann spældi allan dystin í miðverjuni, so hevði hann ikki minni enn 5-6 royndir uppá mál, m.a. ein liggjandi hálvfluktara, eitt fríspark frá 40 metrum langt úti á høgru síðu (!), brotssparkið og nakrar stútarar. Hóast tað ikki eydnaðist honum at fáa mál hesaferð, so var tað áhugavert og stuttligt at uppliva hesa støðugu hóttanina. Um man var ein frekur oddsari, so hevði man nokk koyrt nøkur oyru á Kaj til at gera um seg á toppskoraralistanum í ár.

Udgivet den

Byrjaðu væl, men endaðu illa

 

Leygardagin 16. apríl kl. 11 var dystur millum ÍF Føroyar kvinnurnar og KFUM í Emdrup. Fótbóltslíkindini vóru góð, men føroyska liðið var eitt sindur skert. Føroysku kvinnurnar løgdu út við fínum fótbótsspæli. Emdrup hevði tó trýstið tað mesta av tíðini, men føroyska liðið vardi væl, og Emdrup kom ikki til teir stóru málmøguleikarnar. Tíðliga í fyrra hálvleiki skoraði Sára Samuelsen til 1-0 til okkara kvinnur. Hon fekk bóltin á miðjuni, vendi sær og fór sjálv rekandi fram eftir vøllinum. Hon royndi seg við einum skoti langt úti frá og málmaðurin megnaði ikki at halda bóltinum, og bólturin fór í málið. Beint áðrenn fyrri hálvleikur var lokin, megnaðu KFUM-kvinnurnar eftir horna at javna.

 

Seinni hálvleikur var ikki meira enn byrjaður, tá KFUM tvær ferðir fekk bóltin í málið til 3-1. Hetta tók av álvara luftina úr ballónini hjá føroysku kvinnunum, og tær fullu langt aftur á vøllin. KFUM høvdu trýstið tað mesta av tíðini, sum eftir var. Áðrenn dysturin varð lokin, skoraði KFUM til endaligu støðuna 4-1. Føroysku kvinnurnar fóru sera vónbrotnar heim. Tær spældu ein fínan fyrra hálvleik, men seinni hálvleikur var sera skuffandi.

 

Udgivet den

Føroysku kvinnurnar taptu sín fyrsta dyst

Sunnudagin, 10 apríl, spældu kvinnurnar sín fyrsta árliga landskappingardyst á heimavølli. Tað var Østerbro sum kom á vitjan á Kløvermarkini. Veðrið var av tí allar fagrasta og umstøðurnar fínar.

Sum teimum flestu kunnugt, er fyrsti dystur í kappingarárinum ofta rótutur og spælið ikki av tí allar besta, tá fleiri nýggir leikarar ofta koma til og summir fella frá. Soleiðis var eisini við hesum dystinum. Kvinnurnar hava fingið sera nógvar nýggjar leikarar hetta kappingarárið, og tað kann ein sjálvandi bert frøast yvir.

Føroysku kvinnurnar løgdu varliga út við at liggja heldur defensivt. Fyrri hálvleikur var sera rótutur og spælið hjá báðum liðunum koyrdi sera illa, og tað var nógv gýpparí, har bólturin bara skuldi burtur úr okkara hálvu. Men hóast Østerbro hevði bóltin meir í fyrra hálvleiki, komu tær ikki til nakran mál møguleika, har føroysku kvinnurnar hinvegin fingu fleiri góðar málmøguleikar, men vóru ov óneyvar. Liðini fóru til hálvleik uttan nakað mál, 0-0.

Seinni hálvleikur var ikki meir enn byrjaður, tá Østerbro koma til sín fyrsta møguleika í dystinum við einari langari sending niðan í vinstru síðu og har eitt innlegg síðani kemur. Men skotið fór við síðurnar av okkara máli. Lítla løtu seinni eydnast tað teimum, við júst sama uppspæli, at leggja seg á odda til 0-1.

Føroysku kvinnurnar verða nú meir offensivar og pressa tær tætt uppi í verjuni. Kempað og runnið varð eftir hvørjum bólti, og vit koma til fleiri møguleikar av tí sama, bæði heilt stórar og smærri, men bólturin vil ikki inn í málið. Dysturin endar 0-1 til Østerbro.

Eitt sera keðuligt tap, tá vit høvdu so nógvar málmøguleikar og kempaðu so væl og Østerbro vóru sum heild ófarligar .

Dagsins leikari bleiv Ása Klakstein, sum spældi ein branddyst og kempaði væl mitt á miðjuni allan dystin.

 

Næstu dysturin hjá føroysku kvinnunum er longu leygardagin, 16.apríl, kl. 11.00 móti KFUM á útivølli.

Udgivet den

Kanónin hjá Kaj á muni

Leygardagur 9. apríl – Jægersborg BK vs. ÍF Føroyar II: 1-2 (0-0)

1-0: Jægersborg

1-1: Jóhan Petur (Ingi S.)

1-2: Kaj

Uppstilling:

Mathias

Bárður – Kaj – Svenn – Jóhannus

Pætur (c) – Ingi S.

Dánial – Óli – Dion

Johan

Bonkurin: Sigurð, Jóhan Petur, Ingi P.

 

Aftaná eina langa og góða pre-sesong, so var tað ein svangur og klárur hópur, ið fór at vitja Jægersborg. Liðið hevur ein greiðan málsetning um at stríðast við í oddinum í ár, og tískil var tað sera umráðandi at leggja út við einum sigri. Tíverri var tað ein ræðuligur grasvøllur, ið bíðaði í Gentofte, og hetta setti eisini sín keðiliga dám á dystin.

Tað var sera torført at spæla fótbólt á vøllinum, og hetta gjørdi, at talan bleiv um ein ikki serliga vakran dyst. Í fyrra hálvleiki vóru nógvar langar avleveringar frá báðum liðum, serliga í byrjanini. Sum hálvleikurin fór fram, so royndu okkara menn tó at spæla meira fótbólt og blivu tað betra liðið, men heimaliðið stóð gott og stríddist væl. Hetta gjørdi, at har var fáir málmøguleikar í fyrra hálvleiki.

Tann størsti (og næstan einasti) var longu innanfyri fyrstu 5 min, tá ið Dion driblaði seg til baklinjuna og legði bóltin inn til Johan, men har kom ein donsk stóratá fyri í evstu løtu. Johan fekk faktisk bóltin í málið miðskeiðis í hálvleikinum til stóra frøi fyri útiliðið, men tað bleiv tíverri kolldømt fyri off-side í uppspælinum. Dion og Ingi S. høvdu eisini hvør sína skotroynd, men har komu verjuleikarar fyri. Teirra málmaður bleiv sostatt ikki testaður, men tað bleiv Mathias brádliga í hinum endanum. Jægersborg komu fram til ein málmøguleika, sum var hampuliga stórur, men Mathias bjargaði trygt og gott.

Í hálvleikinum bleiv formatiónin á miðjuni broytt og hetta gjørdi, at føroyska spælið bleiv meira beinleiðis og vandamikið. Tíverri høvdu teir offensivu leikararnir truplar sømdir á vøllinum. Hetta sást, tá ið Óli bleiv spældur púra leysur av Johan, men noyddist at brúka so nógvar berøringar og tíð, at hann bleiv takklaður, áðrenn hann fekk skot uppá mál. Løtu seinni bleiv teirra málmaður so endiliga testaður, aftaná Dion royndi seg við langskoti. Faktiskt sá tað út sum, at tað bleiv mál og fleiri (ið hvussu er Bárður og venjarin) náddu at jubla, áðrenn málmaðurin júst fekk fingrarnar á bóltin út til hornaspark.

Mathias vildi tó ikki standa aftanfyri og stóð fyri einari kanónbjarging, tá ið ein hjá teimum rakti bóltin perfekt og hamraði til frá brotsteiginum av, sera vakurt og sterkt reagerað. Tíverri var onki at gera fáar minuttir seinni, tá ið ein teirra beint uttanfyri brotsteigin skýtur eitt lágt skot, sum rakar stongina og akkurát sníkjir seg inn hinumegna til 0-1.

Lukkutíð svaraði ÍF Føroyar skjótt aftur. Aftaná at hava havt kollektivar trupulleikar í 70 minuttir við at fáa fult tamarhald á bóltin, so vísti Jóhan Petur brádliga, at tað var ikki verri enn so. Ingi S. fær bóltin við brotsteigarmarkið og leggur bóltin út til Jóhan Petur, sum hegnisliga setur innarasíðuna á fyrstu ferð og leggur bóltin trygt í málið til 1-1, sera týdningarmikið og vakurt.

Ongin ivi var um, at ÍF Føroyar ikki vóru nøgdir við bert at fáa eina stigið, so teir fóru eisini eftir sigrinum. Dion var vandamiklasti leikarin gjøgnum allan dystin, og hann hevði fleiri góð langskot, ið tíverri ikki góvu mál. Men tað gjørdi onki, tí 83 minuttir inni í ársins kapping, tá syrgdi Kaj fyri, at tað ikki verður lætt hjá nøkrum øðrum at vinna hvørki Ársins Mál ella Ársins Detalju í ár: Kaj er við miðlinjuna fyrstur á bóltin aftaná langt útspark frá Jægersborg, soleiðis, at bólturin fer trillandi út av miðsirkulin á teirra hálvu. Líka sum við tiltiknu Howitzer kanónini ”Big Bertha” hjá týskarum á sinni, so sá man, at her bleiv lagt an til buldur og brak. 100 kg. av føroyskum gróti fer í fullari ferð ímóti bóltinum, og Kaj ger ikki mætari enn at bomba til frá uml. 45 metrum av, og hetta var málmaðurin als ikki klárur uppá, tí hann kundi bert til fánýtis tveita seg og samstundis hyggja eftir bóltinum fara syngjandi í netið til 2-1 – til óendaliga stóra gleði hjá føroysku monnunum. Sigursmálið var skotið. Seinastu minuttirnar bleiv sigurin koyrdur trygt heim.

Fyri at taka stutt samanum, so spældu verjuleikararnir ein sera góðan dyst, meðan teir offensivu høvdu tað meira trupult á vánaliga vøllinum. Teir royndu tó sum frægast, kempaðu og høvdu til tíðir eisini fínt spæl. Tað var ein strævin og trupul dystur, men tað skal ikki vera nakar ivi í, at ÍF Føroyar vunnu dystin uppiborið og kunnu hyggja frameftir við góðum treysti til næsta dyst.

Dagsins Leikari: Svenn fekk 3 atkvøður fyri ein sera góðan dyst í miðverjuni, men eisini her var tað Kaj, ið stjól yvirskriftirnar. Fyriuttan dreymamálið, so var Kaj eisini sera sterkur í miðverjuni allan dystin, og hetta gav honum heili 10 atkvøður.

 

Dagsins Detalja: Dómarin var sera spesiellur og fekk eisini gjørt vart við seg uppá fleiri (tragi)komiskar mátar. Her kann m.a. nevnast at ístaðinfyri fríspark til Pætur og gult kort til mótsøðuleikaran, so valdi hann at døma dómarakast. Tað var eisini áhugavert, tá ið hann mitt í dystinum valdi at geva Jóhannus undirvísing innanfyri anatomi og vísa hvar ryggur, øksl, nakki og armar eru á mannakroppinum. Stuttligt var tað eisini, at síggja dómaran og Dion kombinera seg frameftir, har teir báðir gjørdu dupulta 1-2 kombinatión, men tíverri rakti tann síðsta avlevering frá dómaranum ikki. Nevnast kann eisini bjargingina hjá Mathias og málið hjá Jóhan Petur, men har er kortini onki ið av álvara kann hótta málið hjá Kaj og jublisenuna eftirfylgjandi. Tað kundi sæð út sum, at Kaj royndi at sleppa sær úr troyggjuni, men tá ið hetta ikki lukkaðist, so valdi hann at tveita seg flatan á vøllin, og tað tók ikki nógv sekund áðrenn ein stórur bunki av ovurfegnum monnum lógu á Kaj. Himmalska lukkuligi venjarin slapp ikki inn á vøllin, men var so ágrýtin eftir at sleppa at mussa málhetjuna at tankarnar hjá Kaj helst eru farnir aftur til hansara tíð undir Mella. Av sonnum ein stórfingin og vøkur løta undir sólini í Gentofte.

Udgivet den

Venjingardystir 2016 hjá 2. liði

                                    Vinardystir 2016                           

Leygardag 30/1 – ÍF Føroyar vs. Christiania: 5-1 (3xCHJ, Øssur, Emil)

Rani

Jákup S – Bárður – Teitur – Thomas

Uni – Erland – Emil – Hanus

Øssur – CHJ

Bonkurin: Mathias

                                                                                   

Leygardag 20/2 – Rødgaard XI vs. CHJ XI: 5-3 (3xKristin, Óli, Sigurð – 2xØssur, Johan)

Uppstilling:

Rani

Ingi S – Bárður D – Reidar – Ragnar

Heine – Emil – Joseph

Óli – Bogi – Kristin

Bonkurin: Høgni, Jákup S, Ingi P, Sigurð

                                                                                   

Leygardag 5/3 – ÍF Føroyar II vs. FC Nyhavn: 6-1 (Óli, Atli, Bogi, CHJ, Ragnar, Bárður)

Uppstilling:

Mathias

Bárður – Kaj – Svenn – Ragnar

Pætur – Ólavur

Óli – Bogi – Atli

CHJ

Bonkurin: Jóhannus, Joseph, Jákup T

                                                                                   

Sunnudag 13/3 – ÍF Føroyar II vs. Arctos: 8-1 (2xReidar, Niels, Høgni, Dion, Johan, Danial, Sigurð)

Uppstilling:

Heini

Jan – Teitur – Jákup S – Høgni

Dion – Ragnar

Ingi P – Johan – Kristin

Reidar

Bonkurin: Jógvan, Sámal, Sigurð, Danial, Niels

                                                                                   

Fríggjadag 18/3 – ÍF Føroyar II vs. CIK: 4-2 (2xDanial, Reidar, Jóhannus)

Uppstilling:

Heini

Ásbjørn – Kaj – Jákup S – Jóhannus

Svenn – Øssur

Danial – Jóhan Petur – Sigurð

Reidar

Bonkurin: Sámal, Thomas, Jákup T, Bárður

                                                                                   

Leygardag 19/3 – ÍF Føroyar vs. Hekla: 8-0 (2xJósup, 2xSteffan, 2xKristin, 2xDion)

Uppstilling:

Rani

Hanus – Teitur – Petur Pauli – Pætur

Erland – Ólavur

Tummas – Heine – Kristin

Steffan

Bonkurin: Mathias, Reidar, Jóhan, Dion, Jósup

                                                                                   

Leygardag 1/4 – ÍF Føroyar II vs. Sundby: 3-0 (Jósup, Danial, Sigurð)

Uppstilling:

Heini

Bárður – Svenn – Bartal – Ragnar

Pætur – Emil

Danial – Johan – Ingi S

Jósup

Bonkurin: Mathias, Thomas, Joseph, Sigurð

                                                                                   

Udgivet den

Nýggjar venjingartíðir á grasi

Vant verður á Kløvermarken á Kløvermarksvej 25, 2300 København S.

Nú farið verður út á gras at leika, eru harvið eisini nýggjar venjingartíðir.
Menn:

Týsdag kl. 17:00 – 18:30

Hósdag kl. 18:00 – 19:30

Vant verður á vølli 5.

Skiftingarrúm nr. 25.

Kvinnur:

Týsdag kl. 18:00 – 19:30

Hósdag kl. 17:00 – 18:30

Vant verður á vølli 5.

Skiftingarrúm nr. 38.

 

Heitt verður á tey, sum ikki hava goldið limagjald, um at fáa tað gjørt umgangandi, um tit framvegis eru áhugað í at venja við og leika dystir.

Eisini verður viðmælt at fáa yvirført leikaraloyvi skjótast gjørligt við at skriva ein meyl til Ásfinnur.

Køvið ikki eldhugan!

Udgivet den

Limagjald 2016

So er tíðin komin til, at allir leikandi limir felagsins skulu gjalda limagjald. Samlaða upphæddin fyri báðar hálvurnar er 900 krónur. Til ber at gjalda í tveimum umførum og harvið gjalda ávikavist

550 krónur fyri várhálvuna

350 krónur fyri heysthálvuna

 

Soleiðis verður limagjaldið goldið:

1. Holdsport:

Rita inn á holdsport og fylg vegleiðingini um, hvussu limagjaldið verður goldið.

2. Heimabanka:

Flyt peningin á kontuna hjá ÍF Føroyum. Kontonummarið er: (reg. 3361) 314.813.120.1

Viðmerk navn og ár.

 

Freistin at gjalda limagjald er 20. mars 2016. Hevur ein ikki goldið limagjald áðrenn kappingin byrjar, verður leikarin útihýstur frá venjing og dysti; viðkomandi verður tí ikki úttikin til dystirnar. Tí vil sitandi nevnd heita á tykkum øll at gjalda skjótast gjørligt og fáa tað yvirstaðið nú, tá SU og løn júst er komið á kontuna.

 

Gott kappingarár!

Køv ikki eldhugan!

Nevndin