Kategori: Menn

Fyrsta manslið hjá ÍF Føroyum spældi leygardagin á útivølli móti Hellas Bk. og endaði dysturin við einum 1-2 sigri til ÍF Føroyar.

Tað var einki serligt fótbóltsveður leygardagin, tað regnaði sera illa og grasvøllurin var tungur at spæla á, men tað sá ikki út til at ávirka leikararnar nakað serligt.

Dysturin byrjaði varliga, og tað mesta av spælinum gekk fyri seg á miðjuni og tað sást væl, at hetta vóru tvey lið, ið ikki hava fingið bestu byrjanina uppá kappingárið. Tað vóru nógvir nærdystir og fleiri feilavleveringar, men sum dysturin leið, blívu føroyingarnir meir og meir spælstýrandi. Til tíðir vísti ÍF Føroyar gott, skjótt og flótandi spæl og spældu vit okkum eisini fram til nakrar heilt góðar málmøguleikar, tó uttan at gangnýta teir. Men beint áðrenn hálvleik vísti Rókur nakrar snildir og snýtti fleiri leikarar áðrenn hann, stille og roligt, setti bóltin í kassan til 0-1. Eitt sera snilt mál.

Hellas royndi eisini at spæla seg fram til onkran møguleika, tó uttan at tað gjørdist vandamikið – ÍF Føroyar verjan stóð stinn og Mathias í málinum var tryggur, tá boð vóru eftir honum.

Í seinna háleiki var myndin hin sama, og menn stóðu nærum i kø fyri at missnýta málmøguleikar, og so hendi tað, sum vanliga hendur, tá ein ikki skorar uppá málmøguleikarnar. 7 min. vóru eftir av dystinum og Hellas, sum lítið og einki hevði at bjóða uppá í seinni hálvleiki, fær ein møguleika og teir taka av beinanvegin og so er støðan 1-1.

Nú legið ÍF Føroyar nógv fyri í eini roynd at fáa øll 3 stigini og 2 min. áðrenn tíð bragdaði. Eitt fríspark verður lyft inn í brotsteigin og við aftaru stong stendur John púra ódekkaður og hann er ísakaldur, tekur eitt trekk út frá og skorar trygt við nærmastu stong – stór frøði á monnum.

Dagsins leikari bleiv John Hammer við 7 atkvøðum og Bárður Danielsen fekk 4.

Hesir byrjaðu dystin: Mathias – Uni, John, Bárður, Jóhan – Erland, Emil, Tummas, Dion, Svenn – Rókur. Á bonkinum sótu: Rani, Sigurð & Steffan.

Skuffandi byrjan uppá nýggja kappingarárið                

Fyrsta manslið hjá ÍF Føroyum hevur leikt 5 dystir í nýggja kappingarárinum og hevur hetta givið liðnum 4 stig. Seinastu 2 dystirnir hava verið ímóti Heimdal og Vigerslev Bk. og niðanfyri eru dystarfrásøgnir frá dystinum.

Heimdal vann tryggan sigur

Fríggjakvøldið 29. august  spældi 1. manslið hjá ÍF Føroyum ímóti Heimdal úti á Østerbro. Um sjálvan dystin er ikki nógv at skriva heim um, vit fingu ongantíð sett okkum á dystin og endaði dysturin við einum lemjandi tapi uppá 4-0.

Hesir byrjaðu dystin: Mathias – John, Kaj, Bárður – Jóhan, Ólavur, Rani, Svenn, Rói – Rókur & Steffan. Á bonkinum sótu: Sigurð, Emil & Hanus.

Dagsins leikari gjørdist Van Gaal við 14 atkvøðum

Ein skuffandi javnleikur ímóti Vigerslev Bk.

Seinni dysturin var týskvøldið 2. septembur móti Vigerslev. Undan hesum dystinum lá Vigerslev á aftasta plássi uttan nakað stig, so vónirnar vóru góðar til dystin.

ÍF Føroyar setti seg á dystin frá byrjan og spældi seg eisini fram til onkran kjans, tó uttan at tað bleiv heilt vandamikið. Tá eini 10 min. vóru farnir av dystinum, endaði ein verjuvilla hjá okkum við, at ein Vigerslev leikari slepp at renna seg leysan í høgru síðu og úr spískum fekk  hann skotið bóltin í málið. Hetta var fyrsti verðuligi málmøguleikin hjá Vigerslev, so tað var ikki heilt í tráð við leikgongdini at Vigerslev kom uppá 0-1. Eftir málið setti ÍF Føroyar seg enn meira á dystin, meðan Vigerslev spældi uppá kontra. Vit spældu okkum fram til fleiri málmøuleikar, men vóru ikki nóg avgjørdir framanfyri málinum.  Tá eini 10 min. vóru eftir til  hálvleiks, fingu vit eitt fríspark beint uttan fyri brotsteigin. Rókur tók sær av sparkinum og sera hegnisliga skeyt hann bóltin í málið til 1-1 og stórur rómur á Kløvermarkini – hendan støðan helt sær til hálvleik.

Í seinna hálvleiki var myndin hin sama, ÍF Føroyar sat á spælinum og spældu seg fram til fleiri kjansir, men tann seinasti neyvleikin manglaði og tískil endaði dysturin 1-1.

Hesir byrjaðu dystin: Mathias – Uni, Kaj, Bárður, Jóhan – Rani, John, Hanus, Ólavur, Rói – Rókur. Á bonkinum sótu: Svenn, Emil & Steffan.

Dagsins leikari gjørdist Jóhan Viderø Gunnarsson við 7 atkvøðum.

1. lið spældi leygardagin móti Dragør. Eftir kærkomna sigurin týsdagin vóru vónirnar góðar, men samstundis vóru menn greiðir um, at mótstøðuliðið – ið hevði lagt væl frá landi við 6 stig í tveimum teimum fyrstu dystunum – helst var betri enn undanfarnu mótstøðulið. Og rætt var! Dragør legði høgt trýst á og við hjálp frá nógva viðvindinum løgdu teir eitt støðugt trýst oman móti málinum hjá Mathiasi. Tó so, vit royndu at koma fram til onkran málmøguleika, men tað var líkasum at síðsti neyvleikin restaði í. Longu tíðliga í 1. hálvleiki fáa Dragør hornaspark í okkara vinstru og vinstri bakkur, ið hevði fleiri vandamikil hornaspørk hendan dystin, ger ikki mætari enn at skjóta bóltin beint í netið. Enn einaferð hjálpti nógvi viðvindurin teimum væl. Hetta var sum at fáa eina kalda spann í høvdið! Gott nokk høvdu teir havt yvirvág, men málið kendist óneyðugt. Eftir hetta byrjaðu vit at koma meiri við í dystin og løtu seinni fáa vit fríspark nakað til vinstru miðskeiðis uttanfyri brotsteigarmarkið. Helst varð væntað, at frísparkið fór at verða sent inn í brotssteigin til stóru menninar Brian og Kaj, men Rókur ger ikki mætari enn at senda bóltin væl og elegant í málið til 1-1. Nú vóru vit við aftur! Men gakk. Stutt seinni gerst støðan 2-1 til Dragør. Okkara menn mettu greitt, at ein av leikarunum hjá Dragør gjørdi fríspark og hóast Rani gav dómaranum nøkur borgarlig – men tó sum altíð vælmeinandi og konstruktiv – orð við á vegnum, so læt hann seg ikki vika. Hálvleiksstøðan var 2-1

Menn fóru við góðum treysti út til seinna hálvleik. Mótvindur var blivin til viðvind og líkindini at fáa okkara spæl at koyra vóru harvið bøtt munandi. Men tað gongur ikki altíð sum ætlað. Tað var sum um at strævni 1. hálvleikur hevði tikið luftina úr monnum, og tí slapp Dragør framhaldandi at hava tað mesta av spælinum. Nakað mitt í 2. hálvleiki hendir so tað, ið ikki má henda. Í mótálopi verður teirra áleypari spældur leysur aftur um okkara verju og skjýtur bóltin í málið til 3-1. Hetta var nærum mønustingurin. Hóast hetta skapa vit sporadiskar málmøguleikar, men tíverri er tað einki, ið endar við máli og endaliga úrslitið gerst tískil 3-1 til Dragør. Eingin ivi var um, at betra venjingarstøðan hjá mótstøðuliðnum var ein av høvuðsorsøkunum til tapið, men tíbetur er hetta nakað, ið vit fáa bøtt um komandi tíðina, so tað fer helst at síggja heilt gott út, tá ið menn koma í betri venjingarstøðu. Næsti dystur hjá 1. liði verður longu komandi fríggjadag á útivølli móti Heimdal.

Dagsins leikarar gjørdust Rókur og Ólavur, ið fingu 4 atkvøður hvør. Næstir teimum vóru Jóhan og John ið fingu 2 og Bárður og Kaj, ið atkvøddu fyri sær sjálvum (ella hvørjum øðrum) 😉

Byrjanarlið: Mathias – Bárður, John, Kaj, Jóhan – Rani, Ólavur, Rókur – Rói, Brian, Hanus

Eykamenn: Emil, Svenn og Ásbjørn

Týskvøldið leikti 1. lið sín næsta dyst í nýggja kappingarárinum. Fyrsti dysturin varð leiktur seinasta leygardag, og bleiv úrslitið 4-2 til Nørrebro United í einum dysti, har okkara lið ikki heilt rakti dagin. Tí máttu aðrir bollar í suppuna týskvøldið, tá grannarnir KFB stóðu fyri tørni, og sigast má, at okkara leikarar vóru klárir frá dystarbyrjan. Frá fyrsta bríksli settu vit okkum á dystin, og við til tíðir sera góðum spæli skaptu vit eisini onkrar kjansir, tó uttan at fáa mál. Hálvleiksstøðan var tískil 0-0.

Seinni hálvleikur helt áfram eins og fyrri við, at vit høvdu bóltin meira. Vit komu fram til onkrar hálvar málmøguleikar, men inn vildi bólturin ikki. Tó so, KFB høvdu eisini onkur innlegg og okkurt langskot, men saman við Mathias tók verjan sær av hesum.

Sum dysturin leið væntaðu nokk tey flestu, at dysturin mundi fara at enda 0-0. Men Sigurð vildi tað øðrvísi. Tá klokkan hevði rundað teir 89 minuttirnar fangar Mathias eitt innlegg. Við sínum ”falke-blikki” sær hann Sigurð longur frammi á vøllinum, og við einari frálíkari sending sendir hann Sigurð avstað. Sigurð fær fatur á bóltinum júst frammanvert miðstrikuna og setur ferð á. Komin fram at málinum eitt sindur til høgru, leggur hann hegnisliga bóltin yvir í handaru síðu á málinum. 1-0 til ÍF Føroyar og øll Kløvermarkin á gosi. Kanska hetta er at taka ov rívan til, men vit vóru í øllum førum fegnir. Og tá dómarin floytaði fyri seinastu ferð nakrar minuttir seinni, vóru 3 stig komin í hús.

Næsti dystur verður komandi leygardag á Kløvermarkini kl. 15.00 ímóti Dragør Bk.

Dagsins maður hendan dystin bleiv Rókur við 7 atkvøðum. Honum á baki komu Ólavur og Bárður við ávikavist 4 og 3 atkvøðum. Leggjast kann afturat, at Rókur eisini bleiv dagsins maður seinasta dyst.

Liðið: Mathias – Rani, Bárður, Kaj, Ásbjørn – Hanus, Ólavur, Svenn, Rói – Rókur, Brian

Eyka: Teitur, Sigurð, Helgi

Teir við lundanum á bringuni taptu tíanverri aftur í gjárkvøldið. Tvey sjálvmál, brotsspark og Guds hond vóru við til tapið, sum tó fekk ein góðan enda, tá ið lundabringurnar fingu tvey mál. Endaliga støðan gjørdist 4-2 til útiliðið.

Fyrri hálvleikur var góður. Útiliðið kom ikki til teir heilt stóru møguleikarnar, og høvdu avleveringarnar fram eftir vøllinum verið eitt sindur neyvari, kundi spurst meira burturúr hjá lundabringunum á Kløvermarkini.

Men marginalarnir hava ikki verið við triðja liðnum í ár og tíanverri fyri Jákup Sørensen, kom hann at standa illa fyri og fekk ikki vart seg fyri einum sjálvmáli. 1-0 til BK Stefan í hálvleikinum.

Í hálvleikinum snúði prátið seg um, hvussu tað allarsíðsta í álopinum, skuldi fáast frá hondini sum best. Eingin veit frá morgni at siga, hvat á Kløvermarkini kann henda.

Seinni hálvleikur

Tí stutt eftir hálvleikssteðg megnaðu Brian og Óli Edvard at spæla seg til eitt sjálvmál, eftir trunkaspæl í brotssteiginum, eftir eitt horna. – Ja, hetta sjálvmálið var avgreitt í allarbesta ’tiki-taka stíli’. Sera harmiligt, tí nú vóru lundabringurnar aftanfyri 2-0, uttan at mótstøðuliðið hevði skorað nakað mál.

ÍF-Føroyar gav ikki upp. Tí enn var góður hálvur tími eftir at leika. – Tað vóru ikki teir villu møguleikarnir, ið teir frá BK Stefan komu fram til. Samstundis var komið eitt sindur meira bit í álopið hjá ÍF-Føroyum við m.a. Briani og Berguri á odda.

Men hóast sólin skein í gjárkvøldið, so skein hon ikki á føroyingarnar. Óli Edvard var sera óheppin at fáa bóltin upp í hondina inni í 16-metrinum, og dómarin ivaðist ikki og peikaði á brotssparksplettin. Brotssparksskjúttin var tryggur. 3-0 og mótbrekkan gjørdist brattari.

Hetta gav teimum við lundabringuni eitt orduligt slag á nevið. Tað vildi bara ikki ganga í dag, heldur ikki í dag! – Stutt eftir brotssparkið fingu teir úr BK Stefan sítt fyrsta mál í opnum spæli og støðan var 4-0 og dysturin avgjørdur. – Men álopið vildi, ið hvussu er pynta upp á úrslitið og spæla skommina eitt sindur av sær.

Seinastu løtuna megnaði ÍF-Føroyar at skora tvey mál. Tað fyrra skoraði viðingurin, Viðoy, tá ið Jaspur Højgaard, ið varð fluttur fram á miðvøllin, hegnisliga sendi ein bólt ímillum verjuni. Danial sneiddi málmannin av og setti bóltin í netið. – Jaspur burdu umhugsað støðuna á bakkinum, tí stutt aftaná var Danial aftur nær við, tá ið Jaspur aftur sendi ein frekan bólt.

Tað seinna málið stóð Bergur Strøm fyri. Hetta kom eftir, at ein langur bóltur var sendur fram. Av berum treiskni trýstu eini tríggjar lundabringur verjuna so mikið nógv, at Bergur kom at standa nokkso leysur úti í vinstru. Við vinstra beini setti Bergur kaldliga bóltin út í høgru síðu.

Enn er vón fyri framman

Endaliga støðan gjørdist sostatt 4-2 til BK Stefan. – Vit kunnu staðfesta, at lundatíðin ikki er byrjað enn. Gamalt var, at lundatíðin ikki byrjar fyrr enn hálvan juli. Tíanverri er eingin dystur á skránni tá. Men ein dystur er áðrenn summarfrítíðina. Áðrenn lundatíðin byrjar, plaga menn at fleyga dimmulunda í skýmingini. So kanska tað er vón fyri sigri áðrenn summarfrítíðina.

Dagsins leikari var Danial Viðoy við 6 atkvøðum. Við honum í hølunum komu Sámal Einarsson og Bergur Strøm, um undirritaði minnist rætt.

Aftur í dag vóru lundarnir hjá ÍF Føroyum tiknir við buksunum niðri. Liðið var fyri einum teprum ósigri. Marginalar og vantandi neyvleiki vóru við til, at ÍF Føroyar tapti 1-3 á heimavølli ímóti B93. – Venjarin metti, at hetta ikki var gott nokk, og hótti leikararnir við eftir dystin, at nú skuldu allir vísa reyv. Um revsingin er førd út í lívið, veit undirritaði ikki. Myndatólið slapp ikki við inn í lundaland nummar 25.

Hálvleiksstøðan var 2-0 til útiliðið, hóast tað ikki var í tráð við leikgongdina. B93 hevði í roynd og veru ein møguleika, sum teir skoraðu uppá, meðan hitt málið var ein gáva frá føroysku verjuni. – Ja føroyingarnir vóru tiknir við buksunum niðri, aftur í dag. Til komandi dyst krevst intensiv skotvenjing á málið.

Fyrri hálvleikur

Tað fyrra málið var sum sagt ein føroysk gáva, tá ið ein verjuleikari spældi ein mótstøðuleikara púra frían. Slíkt hendir, men føroyingarnir kempaðu víðari.

Føroyingarnir komu til opnar málmøguleikar. Tvær ferðir var tvørtræið forðingin fyri máli. Og ein vælspælandi málmaður gjørdi eisini sítt til at føroysku útisetarnir ikki fingu hol á málskjótingina.

Beint áðrenn hálvleik slapp ein 93-leikari innum føroysku verjuna og kølið setti hann innarusíðuna á til hálvleiksstøðuna 0-2.

Annar hálvleikur

Í øðrum hálvleiki hildu føroyingarnir á at trýsta útiliðið. Umframt at hetta gav møguleikar til ÍF Føroyar, gav hetta eisini útiliðnum møguleikar til skjótálop. Men hetta kom ikki at kosta fyrrenn í síðstu løtu. Tá ið eitt korter var eftir av dystinum, fekk ein B93 leikari gult kort. Fær ein leikari gult kort, skal hesin út í tíggju minuttir. Hetta gav føroyingunum enn betri pláss at spæla á, og tá ið 8 minuttir vóru eftir at leika, bragdaði endiliga hjá føroyingunum.

Sigurð Carlsson kom at standa í góðari støðu inni í brotsteiginum og hann smekkaði bóltin inn í málið til støðuna 1-2. – Nú fingu føroyingarnir blóð á tonnina og tað mesta fólkið fór fram. Men tíanverri eydnaðist tað ikki at fáa bóltin innum málmannin, ið til tíðir minti um Jens Martin Knudsen, tá ið hann var upp á tað besta. Hann var sum ein køttur á málstrikuni.

Fótbóltur er eirindaleysur. Tí tá ið tríggir minuttir restaðu fóru B93 í skjótálop. Miðverjin hjá føroyingunum kom eitt sindur skeivur á ein luftbólt og hetta gjørdi, at ein B93-leikari gjørdist púra leysur og kunda staðfesta sigurin til 1-3.

Tað hevur gingið striltið hjá triðja liðnum í ár. Manglandi marginalar og neyvleiki hava verið høvuðsorsøkin til sløku úrslitini. – Men einum føroyingi so líkt, so verður nú bert hugsavnað seg um komandi dyst.

Dagsins leikari fyri ÍF Føroyar gjørdist fyrrverandi KÍ og Víkingaleikarin Kaj Ennigarð við fýra atkvøðum. Honum í hølunum vóru Jósup Henriksen og Jan Nónklett við trimum.

ÍF Føroyar – Fremad Valby 1-2 (0-0)

Hýrurin var góður leygarmorgunin 17. mei, tá menn møttu til dyst móti Fremad Valby á Kløvermarkini. Tað var ilt at siga, um menn vóru spentir til dystin, ella um tað var ÍF Føroyar summarveitslan “SummerShake Down”, sum menn gleddu seg til.

Mótstøðuliðið hendan dagin var topliðið Fremad Valby, sum lá ovast á stigartalvuni. Sjúrður Petersen avloysti 3.liðsvenjaran Andras Thomassen hendan morgunin, og taktiska uppleggið snúði seg um ikki at leypa framav og hava tol.

Fyrri hálvleikur gekk júst sum ætlað. Okkara menn stóðu væl á vøllinum, og mótstøðuliðið kom ikki til teir heilt stóru kjansirnar. Tað, sum riggaði heilt væl hendan dagin, var samanspælið millum verjuna og miðjuna. Karl var sera raskur at rópa allan dystin og syrgdi fyri, at gloppið millum verjuna og miðjuna ikki bleiv ov stórt.

Miðskeiðis í fyrra hálvleiki mundi tolið á lundunum givið úrslit. Sylvi sendi Berg Napoleon avstað í høgru síðu, og hann slapp sær lættliga framvið Fremad verjuleikarinum og sendi eitt gott innlegg innfyri. Bogi søkti nærmastu stong, setti innarusíðu á, og bólturin brast á stongina og út. Farið var til hálvleik við støðuni 0-0.

Seinni hálveikur byrjaði eins og fyrri endaði: Við einum væl skipaðum lundaliði. Nakað inn í seinna hálvleik bleiv Trúgvi feldur inni í feltinum, og dómarin peikaði á plettin. Sylvi bjóðaði seg til at skjóta, og setti bóltin trygt í netið til 1-0. Lundarnir stóðu væl við einum vælspælandi Áslakki í verjuni, einum kontrolerandi Karl á miðjuni og einum útfordrandi Bergi Napoleon í síðuni.

Nú tyktist dystargongdin at venda, og venjarin hjá Fremad Valby hoyrdist yvir alla Kløvermarkina. Fremad Valby boysarnir blivu meira ágrýtnir, og skiftu frá einari 4-4-2 uppstilling til eina 3-4-3. Dómarin lat seg eisini ávirka av garvilla Fremad venjaranum á síðulinjuni, og gav fríspark eftir fríspark til Fremad Valby. Hallur stóð aftur ein brand dyst í málinum, so fríspørkini blivu aldrin vandamikil.

Í 80 min. bragdaði hjá gestunum. Eftir eitt hornaspark í høgru síðu endaði bólturin í netinum til 1-1. Nú ráddi um at verja hetta eina stigið síðstu minuttirnar, og royna at satsa uppá skjótálop. Johan Hendrik bleiv spældur púra leysur, men hann valdi at gera ov skjótt av og skeyt langt við síðurnar av. Ein gyltur møguleiki at koma á odda aftur.

Í tíðini, sum dómarin hevði lagt afturat, kom tann mest umrødda støðan í dystinum. Áslakkur fór niður í eina góða takling, og dómarin peikaði á plettin. “Hånd på bolden”, og føroyingarnir stóðu sum kánus. Hallur í málinum fóru til vinstru, meðan Valby maðurin sendi bóltin í høgru síðu. 1-2 til Fremad Valby og lundarir fóru niður við nevinum.

Dagsins menn blivu Áslakkur og Karl við fýra atkvøðum hvør. Teimum á baki komu Hallur og Bergur N við hvør sínum trimum atkvøðum.

Liðið: Hallur – Johan Hendrik, Sylvi, Áslakur, Jaspur – Bergur J, Karl, Nónklett, Djóni – Strøm og Sivertsen.

Eyka: Jan Schwartz, Ósa og Jákup Andrias.

BK. Viktoria – ÍF Føroyar: 1-0(1-0)

Okkara menn blivu teppibumbaðir í fyrra hálvleiki úti í Fælledparkiniog kundu bert takka málverjanum Hanus úr Norðskála fyri at halda Míttland boysunum inni í hitanum. Men kollektivi traðkaði í karakter í seinna hálvleiki, boysarnir komu sterkt aftur og vóru um reppi at fáa bæði eitt og tvey mál.

Fyrri hálvleikur var merktur av nógvum feilum og álopini regnaðu oman yvir ÍF Føroyar máli. Onkur kundi mistonkt Míttland boysarnir fyri at hava verið á festivalinum sum vit ikki nugu nevna navnið hjá, men tað høvdu teir sjálvandi ikki. At bert tað eina máli kom, var bert málverjanum og hepni at takka og heldigvís spentu boysarnir bogan betri í seinna hálvleiki.

Karl og Helgi fingu betri tak á miðvøllinum og sum heild mannaðu menn seg upp. Størsta kjansin í seinna hálvleiki hevði Helgi, men fleiri aðrir góðir vóru eisini. Um miðjan seinna hálvleik sendi Sylvi eitt gott fríspark innfyri og tætt undir málinum skallaði Jónas á tvørtræðið umvegis eina góða bjarging frá málverjanum. Lukkutíð stakk bólturin út til Helga, hildu vit og konfetti regnið var næstan farið í gongd, men liðskiparin setti kryllin ov niðarliga á bóltin, sum reyk omanfyri úr stuttari frástøðu. Sylvi hevði eitt fríspark á trýkantin og Jákup Andrias bleiv jarðlagdur í brotsteiginum, men tað var bert dómarin, ið ikki metti at talan var um brotsspark.

Hanus úr Norðskála stóð ein rimmar dyst og fekk heili 10 stemmur, tað vita vit øll hvat merkir, meðan Sylvi fekk tvær og Høgni og Helgi fingu hvør sína.

Liðið: Hanus úr Norðskála – Ove, Høgni, Sylvi, Bergur J – Trúgvi, Helgi, Karl, Jónas – Strøm, Jákup Andrias. Eyka: Eyðfinn, Kenneth og Jaspur.

Næsti dystur er á Summer ShakeDOWN degnum 17. Mai kl. 11.15 á Kløver.

NFC-ÍF Føroyar 0-11 (0-7)

Eftir at gongdin í landskappingini seinastu tíðin hevur verið heldur misjøvn var upplagt høvi at venda gongdini, tá ið steypadystur var á skránni í gjár. Mótstøðuliðið hesuferð var NFC úr Seriu 5, so útlitini til ein trivaligan sigur vóru avgjørt til staðar. Og lat okkum gera tað greitt beinanvegin: har var eingin slingur í valsinum! Í so máta var mótstøðan alt ov veik og frá fyrsta minutti skolaðu álopini oman móti málinum hjá NFC, og longu eftir 5 min var støðan 0-2 til okkara. Hálvleiksstøðan var 0-7. Gongdin í seinna hálvleiki var áleið tann sama sum í fyrra, men í mun til 1. hálvleik gekk heldur striltið at fáa gongd á aftur málskjótingina. Eftir at nakrar skiftingar vóru gjørdar kom endiliga hol á aftur og gjørdist endaliga úrslitið 0-11. Eitt úrslit, ið sagtans kundi verið væl størri, um vit vóru nakað neyvari frammanfyri málinum. Málskjúttar vóru Ólavur og Rókur ið fingu hattrick, Steffan og Dánial ið skutu tvey hvør og Hanus ið fekk eitt mál. 1. lið spælir aftur leygardagin og samstundis sum Medina rokkar inni í Kongens Have bjóða vit Østerbro IF vælkomnum á Kløvermarkini og so er bara at vóna, at stórsigurin hevur givið neyðuga sjálvsálitið til at venda gongdini seinastu landskappingardystirnar.

Teir ið mannaðu liðið vóru: Mathias – Pætur, Oddur, John, Jóhan – Erland, Ólavur, Rókur – Hanus, Steffan, Tummas. Á bonkinum byrjaðu Christian Høgni og Dánial.

Elektron stuðlar 1. liði

ÍF Føroyar-KB: 1-2 (0-1)

Enn einaferð var veðrið við okkara monnum, men tíverri var hepni ikki. Dysturin var domineraður av Mítt Land boysunum, men málini fullu tíverri ikki í teirra lut.

Tað vóru treystir boysar, sum fóru inn á vøllin hesuferð og kanska var tað tí at mótstøðuliðið hesferð lá á aftasta plássið við ikki so mikið sum einum stigi.

Okkara byrjaðu væl og Áki hevði ein góðan møguleika, meðan aðrir menn eisini royndu at bjóða seg til og allan fyrra hálvleik høvdu Mítt Land boysarnir greiða yvirvág í spælið. Tó skuld tað, freistast man at siga, enn einaferð verða mótstøðuliðið í skeyt fyrsta pílin. Eftir horna valdi Bárður at at hoppa upp og ólukkutíð smasha bóltin í besta volleyball stíli og dómarin var eirindaleysur, vísti Bárði ostaflísina og peikaði á brotssparksblettin og so var 1-0 hóast Hanus av Norðskála í málinum var ógvuliga tætt við at fanga bóltin.

Menn vóru ikki falnir í fátt í hálvleikinum og komu væl út til seinna hálvleik og tað skuldi vísa seg at geva úrslit tá Dánial sendi eitt fríspark millum vinir og fíggindar, sum streyk beint í mál uttan at nakar nært við bóltin. Men tíverri so var hetta tað einasta málið okkara fingu og tá Kaj fekk gula korti seint inni í seinna hálvleiki bleiv tað eitt sindur meir javnt og 6 minuttir fyri leiklok megnaði KB enn einaferð at leggja seg á odda. Eftir eina misskiljing kom vinstri vongur at standa púra fríður og hann sveik ikki og okkara máttu enn einaferð av vølli við tap í sekki, men sum hjá Liverpool… Næstuferð verður tað!

Mítt Land boysarnir hesa vikuna: Hanus úr Norðskála – Heini, Kaj, Høgni, Bergur J – Trúgvi, Helgi, Bárður, Ingi, Dánial – Áki

Næsti dystur verður mitt undir konkurrentsfestivalinum Frigg, so tað passar boysunum fínt. Hann verður í Fælledparkini ímóti Viktoria leygardagin kl. 11.15.

Dagins leikarar gjørdust Bárður og Kaj, meðan Danial skeyt føroyska málið.