Kategori: Kvinnur

Udgivet den

Byrjaðu væl, men endaðu illa

 

Leygardagin 16. apríl kl. 11 var dystur millum ÍF Føroyar kvinnurnar og KFUM í Emdrup. Fótbóltslíkindini vóru góð, men føroyska liðið var eitt sindur skert. Føroysku kvinnurnar løgdu út við fínum fótbótsspæli. Emdrup hevði tó trýstið tað mesta av tíðini, men føroyska liðið vardi væl, og Emdrup kom ikki til teir stóru málmøguleikarnar. Tíðliga í fyrra hálvleiki skoraði Sára Samuelsen til 1-0 til okkara kvinnur. Hon fekk bóltin á miðjuni, vendi sær og fór sjálv rekandi fram eftir vøllinum. Hon royndi seg við einum skoti langt úti frá og málmaðurin megnaði ikki at halda bóltinum, og bólturin fór í málið. Beint áðrenn fyrri hálvleikur var lokin, megnaðu KFUM-kvinnurnar eftir horna at javna.

 

Seinni hálvleikur var ikki meira enn byrjaður, tá KFUM tvær ferðir fekk bóltin í málið til 3-1. Hetta tók av álvara luftina úr ballónini hjá føroysku kvinnunum, og tær fullu langt aftur á vøllin. KFUM høvdu trýstið tað mesta av tíðini, sum eftir var. Áðrenn dysturin varð lokin, skoraði KFUM til endaligu støðuna 4-1. Føroysku kvinnurnar fóru sera vónbrotnar heim. Tær spældu ein fínan fyrra hálvleik, men seinni hálvleikur var sera skuffandi.

 

Udgivet den

Føroysku kvinnurnar taptu sín fyrsta dyst

Sunnudagin, 10 apríl, spældu kvinnurnar sín fyrsta árliga landskappingardyst á heimavølli. Tað var Østerbro sum kom á vitjan á Kløvermarkini. Veðrið var av tí allar fagrasta og umstøðurnar fínar.

Sum teimum flestu kunnugt, er fyrsti dystur í kappingarárinum ofta rótutur og spælið ikki av tí allar besta, tá fleiri nýggir leikarar ofta koma til og summir fella frá. Soleiðis var eisini við hesum dystinum. Kvinnurnar hava fingið sera nógvar nýggjar leikarar hetta kappingarárið, og tað kann ein sjálvandi bert frøast yvir.

Føroysku kvinnurnar løgdu varliga út við at liggja heldur defensivt. Fyrri hálvleikur var sera rótutur og spælið hjá báðum liðunum koyrdi sera illa, og tað var nógv gýpparí, har bólturin bara skuldi burtur úr okkara hálvu. Men hóast Østerbro hevði bóltin meir í fyrra hálvleiki, komu tær ikki til nakran mál møguleika, har føroysku kvinnurnar hinvegin fingu fleiri góðar málmøguleikar, men vóru ov óneyvar. Liðini fóru til hálvleik uttan nakað mál, 0-0.

Seinni hálvleikur var ikki meir enn byrjaður, tá Østerbro koma til sín fyrsta møguleika í dystinum við einari langari sending niðan í vinstru síðu og har eitt innlegg síðani kemur. Men skotið fór við síðurnar av okkara máli. Lítla løtu seinni eydnast tað teimum, við júst sama uppspæli, at leggja seg á odda til 0-1.

Føroysku kvinnurnar verða nú meir offensivar og pressa tær tætt uppi í verjuni. Kempað og runnið varð eftir hvørjum bólti, og vit koma til fleiri møguleikar av tí sama, bæði heilt stórar og smærri, men bólturin vil ikki inn í málið. Dysturin endar 0-1 til Østerbro.

Eitt sera keðuligt tap, tá vit høvdu so nógvar málmøguleikar og kempaðu so væl og Østerbro vóru sum heild ófarligar .

Dagsins leikari bleiv Ása Klakstein, sum spældi ein branddyst og kempaði væl mitt á miðjuni allan dystin.

 

Næstu dysturin hjá føroysku kvinnunum er longu leygardagin, 16.apríl, kl. 11.00 móti KFUM á útivølli.

Udgivet den

Eitt nýtt ár farið av bakkastokki

Eitt nýtt ár er okkum um hendi, sum eisini vil siga, at eitt nýtt fótbóltsár er við at fara av bakkastokki. Vit, venjarar og nevnd, vilja ynskja øllum limunum í felagnum eitt gott nýggjár, og vónandi eru øll komin væl inn í tað nýggja árið. Vit gleða okkum at byrja venjingina aftur og vóna at síggja nógv nýggj sum gomul andlit í komandi ári.

Byrjað verður mikukvøldið 20. januar kl.19.00 í búrinum á Kløvermarkini.

 

Venjingarnar á graslíki verða:

Mánadag kl.17.30-19.00

Mikudag kl.19-20.30

 

Meldið tykkum til venjing á holdsport.

Udgivet den

Keðilig futsal byrjan hjá kvinnunum

Leygardagin spældu kvinnurnar fyrsta futsal dystin í nýggja kappingarárinum. Kvinnurnar møttu GVI í Valby høllini. Kvinnurnar vóru væl mannaðar til dystin. Nevnast kann, at fýra av leikaranum høvdu ikki roynt at leikt ein futsal dyst fyrr, og av somu orsøk, høvdu tvær ikki tikið skinnarar við, ”tí teir brúkar man ikki innandura”. Tá so okkara skiftu út, mátti skinnarar eisini skifta bein, og hetta tók eitt sindur av tíð hvørja ferð, so kvinnurnar spældu ein minni fleiri skift av dystinum. Hetta sást tó ikki aftur, tí tær, sum vóru eftir á vøllinum, kempaðu eyka hart.
GVI var omaná stóran part av dystinum, men kortini komu vit fram um 0-1 tíðliga í dystinum, eftir gott skot frá Sunnevu. GVI svaraði skjótt aftur, umvegis hondina á einum leikara ferð bólturin í mál. Okkara kvinnur royna at mótmæla til dómaran, men málið stendur við 1-1. GVI hevur bóltin meir og beint fyri hálvleik blívur 2-1 eftir eitt gott skot úti frá.
Í seinna hálvleiki royndu okkara at fáa útjavnandi málið, men tíverri fyri okkum fáa tær eitt mál móti dystar enda og vinna 3-1.
Liðið: Bjørt, Durita, Gunvá, Barbara, Sunneva, Lív og Simona.
Kvinnurnar spæla aftur sunnudagin 22. nov ímóti Amager FF í Valby høllini.

Udgivet den

Leikarin á bonkinum – Silja Højgaard

Lýs teg sjálvan sum fótbóltsspælara við 3 orðum: 

Viljasterk, kvik og manglandi teknikk – men hetta arbeiða vit uppá J

Svevur tú 8 tímar hvørja nátt?

Nei, tað geri eg tíverri ikki. Men viðhvørt eydnast tað mær at innheinta svøvnin seinni út á dagin.

Fleiri lutaseðlar ella hægri limagjald?

Hægri limagjald, einki at ivast í. Nú havi eg selt ómetaliga nógvar lutaseðlar gjøgnum Fimleikafelagið Støkk, og tað er ikki altíð so stuttligt.

Hvønn sang burdu øll havt hoyrt minst einaferð og hví?

I Am – Alla leið. Hetta er ein sera góður slagari, sum man aldrin blívur troyttur av.

Nær vaskaði tú skinnarnar seinast?

Tað var aftaná dystin ímóti Amager FF, sum var á Kløvermarkini. So tað er ca. 2 vikur síðani.

Besti leikari tú hevur leikt við?

Hetta er ein sera torførur spurningur at svara uppá, tá ið allar hava ymiskar eginleikar á liðnum. Men um eg bara skal nevna eina, so má tað vera Jacoba Langgaard, hon er ein góður spælari.

Besta ÍF Føroyar ball?

Nú havi eg bert upplivað eitt ÍF Føroya ball, sum var SummerAhoyDown. Hetta var eitt fantastiska gott ball við góðum fólki og gott lív í. Ballið var sera væl fyriskipað við góðum grill mati, kappingar/skattajagt, sangi og hugna. Síggi longu fram til næsta ÍF Føroya ball!

Hvat er ein góður kossur?

Tað má vera ein erligur kossur millum báðar partar.

Besta minnið av Kløvermarkini?

Uuuha tað er ringt at siga. Nú eru tað bert 4 mánaðir síðani, at eg trenaði fyrstu ferð á Kløvermarkini, so tær serligu løturnar hava ikki verið tær mongu enn. Men vit hava vunnið onkrar dystir, haft góðar og stuttligar venjingar og so er samanhaldið sera gott á liðnum. Men eitt sera gott minni fyri mítt viðkomandi er, tá ið eg legði upp til málið hjá Maluni á Dunga, og sigurin var í hús. Góð kensla, tí hvør hevði væntað at ein fimleikagenta fór at klára seg á einum fótbóltsvølli.

Hvør hevur best reyv á liðnum hjá tær?

Tað má vera liðskiparin Monika Sumberg Samuelsen. Hon er tann, sum heldur liðnum uppi og ger eitt einastandandi arbeiði bæði til venjingar og til dystir. Vit á liðinum hanga mest sum í reyvuni á henni, og tí verður hon klárt Mrs. allarbesta reyv.

Hvat kundi verði betri í ÍF Føroyum?

At nýggju limirnir hjá ÍF Føroyar kvinnur fingu eina limatroyggju. Annars haldi eg, at nevndin og onnur gera eitt framúr gott arbeiði.

Hvat er tað besta við ÍF Føroyum?

Samanhaldið í felagnum, og at man kemur at kenna nógvar føroyingar.

Hvat er tað besta skoritriksi?

Nú eri eg ikki serliga køn innan hetta økið, og lati tískil mannfólkini um hetta. J

Hvør ÍF Føroyar leikari er besti tummari?

Mær er fortalt, at Høgni Hansen er ein garvaður tummari.

Hvør krønika var tann besta á ársveitsluni?

Nú eri eg so nýggj í felagnum og havi av tí orsøk ikki verið við til nakra ársveitslu (enn).

Hvat er eitt tað mest flovisliga, sum hendi tær í summarferiuni?

 Tað má vera ein hending á Summarfestivalinum, har eg var so óheppin, at eg datt millum øll fólkini og gav vinkonuni skyldina. Men orsøkin var helst ein onnur. J hehe…

 Hvat skulu vit spyrja næsta leikara?

Hvør syngur best á tínum liðið?

Udgivet den

Skuffandi spæl og harvið tap

Í regninum leygardagin 17. oktobur leiktu okkara kvinnur móti FC Damsø heima á Kløvermarkini og máttu av vøllinum við einum 0-3 tapi. Damsø var betur hendan dagin og var sigurin tí fult uppiborin.

Kvinnurnar fingu ikki ta bestu byrjanina; í skiftirúminum fingu tær boðini um, at eitt avboð var komið um morgunin vegna sjúku. Hetta førdi við sær, at kvinnurnar ongan útskiftara høvdu. Sagt verður, at maður kemur í mans stað, og henda morgunin upplivdu kvinnurnar, at kvinna kemur í kvinnu stað. Alt fór at ringja runt, og hetta hevði við sær, at tær til síðst vóru tvær eyka.

Dysturin var bert 5 minuttir gamal, tá Damsø fær fyrsta málið. Eftir fríspark í høgru síðu fara tvær av okkara upp eftir sama bólti og órógva hvørja aðra soleiðis, at hvørgin rakar bóltin – ein hjá teimum kemur at standa frí og skorar til 0-1.

Kvinnurnar royndu sítt besta at koma til málroyndir, men á váta undirlagnum bar einki til og kvinnurnar fingu ongantíð spælið at koyra. Okkara høvdu nakrar farligar stikningar, men málmaðurin hjá teimum var vakin og kom gott út. Hjá Damsø sá alt út til at rigga og eftir gott uppspæl í teirra høgru síðu kemur ein flatur bóltur innfyri og við einari kaldari innarasíðu blivur tað til 0-2 stutt áðrenn hálvleik.

Eftir nøkur álvarsom orð frá venjaranum í hálvleikinum, fóru okkara kvinnur inn aftur á vøllin uppsettar uppá at fáa nøkur mál. Spælið byrjaði at koyra betur og kvinnurnar komu eisini til onkran møguleika, men einki mál. Móti dystarenda satsa okkara offensivt, og kostaði tað í hinum endanum; tær fáa enn eitt mál og vinna uppiborið 0-3.

Kvinnurnar spæla aftur leygardagin, tá oddaliðið frá AB Tårnby kemur á vitjan á Kløvermarkini.

Liðið: Simona, Helena J, Helena W, Marjun, Lív, Sára, Monika, Steintóra, Sanna, Silja, Sunneva (Elin og Malan)

Venjari: Tórður

Dagsins leikari bleiv Simona

Udgivet den

Kvinnurnar úti fyri einum teprum 1-0 tapi

Gentofte – ÍF FØROYAR

Sum spildurnýggjur greinaskrivari á heimasíðuni fór eg at kanna eina ”gamla” dystarfrágreiðing frá 22. September, um hvussu ein slík skuldi skrivast. Tað fyrsta eg býti merkið í, er setningin ”Coach Hentze gav góð ráð til morgunábitið..?”.. Hetta kenni eg einki til, kom svong til borðtennisborðið uttanfyri ØK kl 9.30, so kommunikatiónin á kvinnuliðnum má helst blíva betri.

Til nakað annað, so er tað faktisk Monika, ið bleiv kárað dagsins leikari, ið skuldi skriva hesa frágreiðingina, men liðskiparin dugir ikki bara at sparka, eisini at forhandla; eg tók ábyrgdina á meg fyri at fáa shotgun í bilinum heimaftur. (Hóast eg langt síðan hevði fingið tað, men driver Marjun avgjørdi at taka tað aftur vegna gloymt handklæði??…. #heartless )

Nå MEN, leiðin gekk til Citybois-distriktið, Gentofte, leygardagin. Tað var av allar fagrasta veðri, fyri fyrstu ferð var hosutape í læknataskuni, ongir eiturkoppar í skiftirúminum, nýggjar gaggir at skoða og so ein fantastiskur kunstbani og góðir bóltar! Sikkurt eisini onkur morgunmatur/brunch, sum man ikki hevur fingið við!

Gentofte var eitt pláss frammanfyri okkum áðrenn dystin, so tað var lagt upp til ein spennandi dyst og eisini høvdu vit onkrir áskoðarir, ið vóru raskir at heppa. Vit spældu væl fyrstu 25 minuttirnar og stóðu væl á vøllinum, og síðan bleiv tað eitt sindur rótut, Gentofte skoraði eitt heldigt mál, eftir eina lítla misskiljing.

Eftir hálvleikin fóru kvinnurnar út aftur á vøllin at berjast víðari, vit løgdu betri út enn seinna part av fyrra hálvleiki, tó uttan at tað eydnaðist okkum at fáa bóltin í kassan. Simona rakti leikarirnir væl í útspørkum, rættiliga deiligt og vigtigt, og vit vunnu oftast bæði teirra og okkara útspørk. Liðini vóru tøtt og dysturin kundi farið báðar vegir. Teir størstu møguleikarnir vit høvdu, áttu Monika og Sára allarhelst, men ellars røsku Suðuroyingarnir megnaðu ikki at fáa bóltin inn, tíverri.

Fríða, okkara Xavi á miðvølllinum, byrjaði inni, men var tíverri illa fyri og mátti út. Hon kom tó innaftur at hjálpa til síðstu løtuna, sum ein rættur kríggjari. Vit elskaðu hana enn og meira tá ið hon diskaði upp við einum fastalávints-bolla-køku-manni við glasur og bommum eftir dystin í skiftirúminum – Takk Fríða <3 #kvindemedoverskud

Onki ball var hildið eftir dystin, kvinnurnar eru rættiliga seriøsar, men undirritaði er nábúgvi við onkran á 3.liðnum hjá monnunum, ið henda dagin vunnu 10-2, og man má siga at teir høvdu eitt púra svakt ball, til lukku við sigrinum og ein heilsan til hann sjálvan ovast, uttast í J: koyr hurðina aftur næstuferð tit fara at ”syngja” kór ti Backstreet Boys kl 03.00 😉

Liðið: Simona, Turið, Monika, Gunvá, Helena, Steintóra, Fríða, Malan, Silja, Helena, Sára (Sunneva, Marjun, Elin)

Venjari: Tórður

Vit gleða okkum til næsta dyst. #lovefootball

Udgivet den

Kvinnurnar koyra á!

4. umfar – Fremad Valby vs. ÍF Føroyar 0-1

Enn eina ferð var lagt upp til ein tættan dyst, tá ið okkara kvinnur møttu Fremad Valby í Valbyparkini leygarmorgunin.

Stigatalvan áðrenn dystin: Fremad Valby 7 – vit 6.

Útlitini til dystin vóru góð! Coach Hentze hevði givið damunum góð ráð til morgunábitið og helmingurin bleiv koyrdur til dyst. Tó kom fyrsta avbjóðingin longu áðrenn dystarbyrjan – hvar var rætta skiftirúmið? Tá ið koordinatarnir vóru innstillaðir rætt, taktikkurin klárlagdur og einari effektivari upphitin á 15 minuttir, stóðu kvinnurnar klárar at herja á – og tað gjørdu tær í 90 minuttir!

Einasta málið í dystinum kom, tá fyrri hálvleikur var hálvrunnin. Tá velur teirra, framúr góði, málverji at lofta bóltinum, leggja bóltin niður og síðani taka hann upp aftur – indirekta fríspark!! Fríða trillar bóltin til Maluna, sum setir bóltin trygt í netið til 1-0!

Fyrri hálvleikur er annars javnur, bæði liðini hava málmøguleikar við m.a. skotum á tvørstongina. Liðini kempa hvør í sínum lagi við góðum fótbóltsanda. Hetta kann tó ikki sigast um seinna hálvleik, har mótstøðuliðið verður meira og meira trýst, og tær velja at brúka ljót orð og tacklingar í staðin fyri at hugsa fótbólt – teirra illsinnishirs gav okkum stríðsmegi.

Har køvdi eingin eldhugan – lå lå lå lå lå låååå lå

Dagsins gysari kom, tá Gunvá kom í ein nærdyst við eina á mótstøðuliðnum, sum rakti plett, um nakkin á Gunvá var bólturin – og vekk var hon! Gunvá vaknaði við aftur løtu seinni – lidt rundtosset! Hon mátti av tí sama út á bonkin at sita restina av dystinum fyri at koma seg. Hon hevur tað gott í dag 😉

Liðið leygardagin var: Simona, Durita, Monika (C), Sunneva, Turið, Helena J, Gunvá, Malan, Fríða, Silja og Unn. (Helena W, Sanna, Steintóra).

Dagsins leikari gjørdist Malan.

Kvinnurnar liggja nú á einum 4. plássi við 9 stigum, 4 stig aftanfyri oddaliðið.

 

Komandi dystur verður á Kløver leygardagin kl 13, tá ið vit taka ímóti CBS Sport damunum, ið liggja á 8. plássi við 4 stigum fyri 4 leiktar dystir.

Udgivet den

Góða gongdin hjá ÍF Føroyar kvinnunum heldur fram.

Leygardagin vóru kvinnurnar aftur í eldinum og vunnu ikki minni enn 3-1 á Østerbro IF. Dysturin var leiktur á Kløvermarkini í frálíkum fótbóltslíkindum.

Í fyrra hálvleiki stóðu ÍF Føroyar kvinnurnar væl á vøllinum og pressaðu óført, men torført var at fáa spælið at koyra. Sigast skal eisini, at Østerbro IF hevði meginpartin av spælinum í fyrra hálvleiki.

Í steðginum komu greið boð fra venjaranum um, at nú skuldi tað vera, og at tað gott kundi bera til. Við undanvindi fóru kvinnurnar við góðum treysti inn til seinna hálvleik.

Tá 10 min vóru leiktir av seinna hálvleiki, løgdu Østerbro IF seg á odda. Málið kom eftir fríspark, nakað uttan fyri brotsteigin. Eftir hetta fluttu IF Føroyar kvinnurnar seg longur fram á vøllin og megnaðu at skora til 1-1. Eftir gott spæl og avlevering frá Silju, var bara eftir hjá Unn at skjóta bóltin i málið. Síðani fingu kvinnurnar brotsspark, eftir at ein Østerbro leikari hevði hondina á bóltinum. Malan setti bóltin trygt í netið til 2-1. Seinasta málið kom tá 10 min vóru eftir av dystinum. Simona gúppaði bóltin fram til Unn, sum hegnisliga lobbaði bóltin uppum málmannin.

Allar kvinnurnar kempaðu sera væl og stóðu saman sum lið, og vunnu við hesum ein greiðan 3-1 sigur.

Liðið var mannað av: Simonu, Helenu J., Helenu W., Gunvu, Sunnevu, Moniku, Unn, Maluni, Lív og Silju.

Á bonkinum vóru: Sanna, Sára og Elin.

 

Dagsins leikari gjørdist Unn.

 

Kvinnurnar spæla dyst aftur leygardagin í Valby.

 

 

 

Udgivet den

Kvinnurnar eru í gongd

Eftir heldur keðiliga byrjan, megnaðu kvinnurnar saman við Tórður Hentze at vinna næsta dystin í kappingini. Mánakvøldið vunnu tær 1-0 á KFUM. Dysturin var spældur í Emdrupparkini.

Málið kom tá fyrri hálvleikur var 7 minuttir gamal. Tað var aftaná eitt gott útspark frá Simonu, sum Gunvá hegnisliga tók ímóti á miðjuni og síðan spældi til Silju, sum so ger eina klassa avlevering til Maluna, sum skýtur bóltin upp í høgra hjørnið. Eitt fantastiska flott mál!!

Fyrsti hálvleikur var rættiliga javnur, bæði liðini royndu at spæla sítt spæl. Í seinna hálvleiki var tað meira KFUM sum hevði bóltin, men okkara kvinnur kempaðu óført og spældu upp til sítt besta og vunnu harvið dystin.

Verjan saman við Simonu spældu ein branddyst (hvis je sjálv skal siga tað ;)) og megnaðu at halda málið reint.

Alt í alt ein góður dystur frá okkara kvinnum, og trý deilig stig at fáa á kontoina.

Liðið henda dystin var mannað av: Simonu, Turið, Sunnevu, Moniku, Helenu W., Silju, Gunvu, Fríðu, Helenu J., Maluni og Unn. À bonkinum: Steintóra og Sanna.

Dagsins leikari gjørdist Monika við 12 stemmum og Gunvá fekk 1.

Kvinnurnar spæla aftur leygard. á Kløvermarkini, har tær taka ímóti Østrebro IF.

Udgivet den

Nýggjur kvinnuvenjari settur

Eftir at Annika Godtfred i farnu viku boðaði frá, at hon gavst sum venjari hjá kvinnunum hevur leitað verið eftir einum avloysara. Hesin er nú funnin og er Tórður Hentze nýggi maðurin í heita sessinum. Tórður, ið er 28 ára gamal, hevur drúgvar royndir sum fótbóltsleikari úr heimligu kappingini, har ið hann hevur leikt 98 dystir í næstbestu deildini umboðandi B36, AB, HB og B71.

Tórður venur liðið fyrstu ferð komandi týsdag og vit í felagnum eru sera fegin um, at tað eydnaðist at finna so skikkaðan avloysara, nú Annika tíverri mátti gevast mitt í kappingarárinum. Vit gleða okkum at bjóða Tórði vælkomnum á Kløvermarkina og ynskja honum blíðan byr í starvinum.