Kategori: 2 lið

1. lið hevði tveir dystir hetta vikuskiftið, so tískil avgjørdu venjararnir at senda eitt styrkt 2. lið á vøllin móti CSC hendan sunnudagin. Dagin fyri hevði 1. lið spælt móti Kastrup BK, men allíkavæl vóru tað nakrir leikarar „ið gingu aftur‟ frá dystinum dagin fyri.

 

Tað var annars ein skelkaður flokkur, sum møtti til dyst hendan sunnumorgunin. Allir vóru á gosi um tað sum var hent nakrar tímar áðrenn inni í Sortedamssjónum, og snakkað var um, hvør kundi finna uppá at kvala ein svana. Um hetta mundi løgdu menn eisini merki til, at ein av okkara leikarum hevði meldað avboð á holdsport sunnumorgunin, um sama mundi, sum hesin neyðars svani mátti lúta fyri sínum banamanni! Um hetta var rein tilvild ella um hetta møguliga var orsøkin til, at áðurnevndi spælari ikki møtti upp, funnu vit ikki útav. Sigast skal tó, at maðurin ikki er sæddur á Kløvermarkini síðani. Anyway, nokk um svanar fyri hesaferð.

 

Í byrjanini sá út til, at tað vóru tvey javnt sterk lið, sum spældu móti hvørjum øðrum, men sum fyrri hálvleikur leið, fingu ÍF Føroyar yvirtakið, og orkan byrjaði somuleiðis at ganga undan hjá CSC. Sum vit so ofta fyrr hava upplivað móti CSC, so eru teir ikki serliga sterkir í mótgangi. Teir blivu skitnari sum dysturin leið, Móti endanum av fyrra hálvleiki løgdu vit okkum framum, tá John Hansen við einari sjáldsamari uttarusíðu, køliga útplaseraði málmannin. Hendan leiðslan var fult uppiborin, og helt hon sær fram til hálvleiks. CSC legdi fyri sum eitt ódnarveður í 2. hálvleiki, og royndu at pressa okkum høgt. Hetta riggaði eina løtu, men tá Johan setti eitt brotsspark í kassan til 2-0, samstundis sum orkan hjá CSC byrjaði at ganga undan, byrjaðu CSC leikararnir aftur uppá teirra ónodlir við nógvum skitnum takklingum og høgum albogum. Til endans gekk heilt galið, tá ein av teirra leikarum eftir stuttari tíð sendi tveir albogar í andlitini á okkara leikarum. Hetta vildi Ásfinnur ikki finna seg í, og tók tískil lógina í egnar hendur. Ein hørð takkling, og so mátti maðurin berast út. Restina av dystinum spældi síðan róliga av. Dysturin endaði 4-1, við einum máli afturat frá John, og einum heldur sjáldsomum headara frá Johannusi.

 

Teir ið mannaðu liðið vóru: Sjúrður Petersen – Ásbjørn Jøkladal, Teitur Tausen, Ásfinnur Sigvardsen, Johannus Mikkelsen – Tummas Justinussen, John Hansen, Jósup Henriksen – Johan Ellingsgaard, Sigurð Carlsson, Rói Jacobsen. Á beinkinum sótu Christian Høgni Jacobsen og Rani Christiansen.

2. manslið spældi sín fyrsta venjingardyst leygarmorgunin á Kløvermarkini. Mótstøðuliðið hendan morgunin var KFUM Sundby úr seriu 3.

Umstøðurnar at spæla fótbólt henda leygarmorgunin vóru ikki tær bestu. Carl herjaði Danmark, og hetta merktist á Kløvermarkini, har ið nógvur vindur var.

Vit høvdu vindin við okkum í fyrra hálvleiki. Hetta er oftast at meta sum ein fyrimunur, men nógvi vindurin meira darvaði enn gagnaði okkara spæli. Spælið hekk ikki ordiliga saman og spurdist ikki nógv burturúr.

Í seinna hálvleiki gjørdi venjarin nakrar broytingar, sum vístu seg at rigga væl. Brian kom inn á topp, meðan Ásbjørn bleiv settur inn á miðjuna fyri Teit, sum bleiv fluttur aftur í miðverjuna. Hetta vísti seg skjótt at rigga væl hjá okkum. Okkara spæl bleiv nógv betur, og vit skaptu eisini nógvar møguleikar. Jósup, Dánjal og Brian kundu allir havt skorað, um teir vóru eitt sindur neyvari. Tað eydnaðist okkum eisini at skora, men tað skuldi ein av teirra monnum til at gera arbeiðið. Eftir ein góðan túr móti baklinjuni leggur Ásbjørn ein góðan bólt innfyri, sum ein av teirra verjuleikarnum ikki klárar at stýra annan veg enn beint í egið mál.

Hóast KFUM fekk nakrar møguleikar, serliga í seinna hálvleiki, so var tað uppiborið, at okkara menn fóru avstað við sigrinum. Tær ferðirnar, tá ið KFUM vóru farligir, stóð antin verjan ella ein vælspælandi Jóan Petur fyri. Vert er at leggja til merkis, at hetta var debut-dysturin hjá okkara málmanni. Hann hevði tó tíðuligvís ikki lisið § 7. stk 4 í reglugerðunum hjá ÍF Føroyum, har tað greitt stendur, at:

“Debuterandi spælari skal altíð hava ein/eina kassa/rammu av øl við til dyst.”

§ 7. stk 5 sigur víðari:

“Um hetta ikki verður gjørt, skal spælarin, innan 48 tímar, koma við frágreiðing til venjaran. Her kann venjarin so velja at geva debuterandi leikara ein møguleika afturat. Venjarin er tó ikki tvungin til at geva nýggjan møguleika.”

Hóast sigurin, so var alt ikki gleði og gaman aftaná dystin. Danjal bleiv sparkaður í armin, og mátti lata seg útskifta. Seinni vísti tað seg, at hann hevði brotið armin, so hann verður tíðanverri ikki at síggja aftur á vøllinum tær næstu vikurnar.

Um mótstøðuliðið er ikki annað at siga enn, at sjálvt eftur Amager-standardi, so vóru teir óalmindiliga primitivir!

ÍF Føroyar stillaði við einari 4-1-4-1 uppstilling.

Jóan Petur Joensen – Høgni Hansen, Jákup Sørensen, Ásfinnur Sigvardsen, Johannus Mikkelsen – John Hansen, Danjal Viðoy, Teitur Tausen – Sigurð Carlsson, Jósup Henriksen, Johan Ellingsgaard.

Á beinkinum sótu: Ásbjørn Jøkladal, Bergur Strøm og Brian Hansen.