Kategori: 2 lið

Leygardagur 9. apríl – Jægersborg BK vs. ÍF Føroyar II: 1-2 (0-0)

1-0: Jægersborg

1-1: Jóhan Petur (Ingi S.)

1-2: Kaj

Uppstilling:

Mathias

Bárður – Kaj – Svenn – Jóhannus

Pætur (c) – Ingi S.

Dánial – Óli – Dion

Johan

Bonkurin: Sigurð, Jóhan Petur, Ingi P.

 

Aftaná eina langa og góða pre-sesong, so var tað ein svangur og klárur hópur, ið fór at vitja Jægersborg. Liðið hevur ein greiðan málsetning um at stríðast við í oddinum í ár, og tískil var tað sera umráðandi at leggja út við einum sigri. Tíverri var tað ein ræðuligur grasvøllur, ið bíðaði í Gentofte, og hetta setti eisini sín keðiliga dám á dystin.

Tað var sera torført at spæla fótbólt á vøllinum, og hetta gjørdi, at talan bleiv um ein ikki serliga vakran dyst. Í fyrra hálvleiki vóru nógvar langar avleveringar frá báðum liðum, serliga í byrjanini. Sum hálvleikurin fór fram, so royndu okkara menn tó at spæla meira fótbólt og blivu tað betra liðið, men heimaliðið stóð gott og stríddist væl. Hetta gjørdi, at har var fáir málmøguleikar í fyrra hálvleiki.

Tann størsti (og næstan einasti) var longu innanfyri fyrstu 5 min, tá ið Dion driblaði seg til baklinjuna og legði bóltin inn til Johan, men har kom ein donsk stóratá fyri í evstu løtu. Johan fekk faktisk bóltin í málið miðskeiðis í hálvleikinum til stóra frøi fyri útiliðið, men tað bleiv tíverri kolldømt fyri off-side í uppspælinum. Dion og Ingi S. høvdu eisini hvør sína skotroynd, men har komu verjuleikarar fyri. Teirra málmaður bleiv sostatt ikki testaður, men tað bleiv Mathias brádliga í hinum endanum. Jægersborg komu fram til ein málmøguleika, sum var hampuliga stórur, men Mathias bjargaði trygt og gott.

Í hálvleikinum bleiv formatiónin á miðjuni broytt og hetta gjørdi, at føroyska spælið bleiv meira beinleiðis og vandamikið. Tíverri høvdu teir offensivu leikararnir truplar sømdir á vøllinum. Hetta sást, tá ið Óli bleiv spældur púra leysur av Johan, men noyddist at brúka so nógvar berøringar og tíð, at hann bleiv takklaður, áðrenn hann fekk skot uppá mál. Løtu seinni bleiv teirra málmaður so endiliga testaður, aftaná Dion royndi seg við langskoti. Faktiskt sá tað út sum, at tað bleiv mál og fleiri (ið hvussu er Bárður og venjarin) náddu at jubla, áðrenn málmaðurin júst fekk fingrarnar á bóltin út til hornaspark.

Mathias vildi tó ikki standa aftanfyri og stóð fyri einari kanónbjarging, tá ið ein hjá teimum rakti bóltin perfekt og hamraði til frá brotsteiginum av, sera vakurt og sterkt reagerað. Tíverri var onki at gera fáar minuttir seinni, tá ið ein teirra beint uttanfyri brotsteigin skýtur eitt lágt skot, sum rakar stongina og akkurát sníkjir seg inn hinumegna til 0-1.

Lukkutíð svaraði ÍF Føroyar skjótt aftur. Aftaná at hava havt kollektivar trupulleikar í 70 minuttir við at fáa fult tamarhald á bóltin, so vísti Jóhan Petur brádliga, at tað var ikki verri enn so. Ingi S. fær bóltin við brotsteigarmarkið og leggur bóltin út til Jóhan Petur, sum hegnisliga setur innarasíðuna á fyrstu ferð og leggur bóltin trygt í málið til 1-1, sera týdningarmikið og vakurt.

Ongin ivi var um, at ÍF Føroyar ikki vóru nøgdir við bert at fáa eina stigið, so teir fóru eisini eftir sigrinum. Dion var vandamiklasti leikarin gjøgnum allan dystin, og hann hevði fleiri góð langskot, ið tíverri ikki góvu mál. Men tað gjørdi onki, tí 83 minuttir inni í ársins kapping, tá syrgdi Kaj fyri, at tað ikki verður lætt hjá nøkrum øðrum at vinna hvørki Ársins Mál ella Ársins Detalju í ár: Kaj er við miðlinjuna fyrstur á bóltin aftaná langt útspark frá Jægersborg, soleiðis, at bólturin fer trillandi út av miðsirkulin á teirra hálvu. Líka sum við tiltiknu Howitzer kanónini ”Big Bertha” hjá týskarum á sinni, so sá man, at her bleiv lagt an til buldur og brak. 100 kg. av føroyskum gróti fer í fullari ferð ímóti bóltinum, og Kaj ger ikki mætari enn at bomba til frá uml. 45 metrum av, og hetta var málmaðurin als ikki klárur uppá, tí hann kundi bert til fánýtis tveita seg og samstundis hyggja eftir bóltinum fara syngjandi í netið til 2-1 – til óendaliga stóra gleði hjá føroysku monnunum. Sigursmálið var skotið. Seinastu minuttirnar bleiv sigurin koyrdur trygt heim.

Fyri at taka stutt samanum, so spældu verjuleikararnir ein sera góðan dyst, meðan teir offensivu høvdu tað meira trupult á vánaliga vøllinum. Teir royndu tó sum frægast, kempaðu og høvdu til tíðir eisini fínt spæl. Tað var ein strævin og trupul dystur, men tað skal ikki vera nakar ivi í, at ÍF Føroyar vunnu dystin uppiborið og kunnu hyggja frameftir við góðum treysti til næsta dyst.

Dagsins Leikari: Svenn fekk 3 atkvøður fyri ein sera góðan dyst í miðverjuni, men eisini her var tað Kaj, ið stjól yvirskriftirnar. Fyriuttan dreymamálið, so var Kaj eisini sera sterkur í miðverjuni allan dystin, og hetta gav honum heili 10 atkvøður.

 

Dagsins Detalja: Dómarin var sera spesiellur og fekk eisini gjørt vart við seg uppá fleiri (tragi)komiskar mátar. Her kann m.a. nevnast at ístaðinfyri fríspark til Pætur og gult kort til mótsøðuleikaran, so valdi hann at døma dómarakast. Tað var eisini áhugavert, tá ið hann mitt í dystinum valdi at geva Jóhannus undirvísing innanfyri anatomi og vísa hvar ryggur, øksl, nakki og armar eru á mannakroppinum. Stuttligt var tað eisini, at síggja dómaran og Dion kombinera seg frameftir, har teir báðir gjørdu dupulta 1-2 kombinatión, men tíverri rakti tann síðsta avlevering frá dómaranum ikki. Nevnast kann eisini bjargingina hjá Mathias og málið hjá Jóhan Petur, men har er kortini onki ið av álvara kann hótta málið hjá Kaj og jublisenuna eftirfylgjandi. Tað kundi sæð út sum, at Kaj royndi at sleppa sær úr troyggjuni, men tá ið hetta ikki lukkaðist, so valdi hann at tveita seg flatan á vøllin, og tað tók ikki nógv sekund áðrenn ein stórur bunki av ovurfegnum monnum lógu á Kaj. Himmalska lukkuligi venjarin slapp ikki inn á vøllin, men var so ágrýtin eftir at sleppa at mussa málhetjuna at tankarnar hjá Kaj helst eru farnir aftur til hansara tíð undir Mella. Av sonnum ein stórfingin og vøkur løta undir sólini í Gentofte.

                                    Vinardystir 2016                           

Leygardag 30/1 – ÍF Føroyar vs. Christiania: 5-1 (3xCHJ, Øssur, Emil)

Rani

Jákup S – Bárður – Teitur – Thomas

Uni – Erland – Emil – Hanus

Øssur – CHJ

Bonkurin: Mathias

                                                                                   

Leygardag 20/2 – Rødgaard XI vs. CHJ XI: 5-3 (3xKristin, Óli, Sigurð – 2xØssur, Johan)

Uppstilling:

Rani

Ingi S – Bárður D – Reidar – Ragnar

Heine – Emil – Joseph

Óli – Bogi – Kristin

Bonkurin: Høgni, Jákup S, Ingi P, Sigurð

                                                                                   

Leygardag 5/3 – ÍF Føroyar II vs. FC Nyhavn: 6-1 (Óli, Atli, Bogi, CHJ, Ragnar, Bárður)

Uppstilling:

Mathias

Bárður – Kaj – Svenn – Ragnar

Pætur – Ólavur

Óli – Bogi – Atli

CHJ

Bonkurin: Jóhannus, Joseph, Jákup T

                                                                                   

Sunnudag 13/3 – ÍF Føroyar II vs. Arctos: 8-1 (2xReidar, Niels, Høgni, Dion, Johan, Danial, Sigurð)

Uppstilling:

Heini

Jan – Teitur – Jákup S – Høgni

Dion – Ragnar

Ingi P – Johan – Kristin

Reidar

Bonkurin: Jógvan, Sámal, Sigurð, Danial, Niels

                                                                                   

Fríggjadag 18/3 – ÍF Føroyar II vs. CIK: 4-2 (2xDanial, Reidar, Jóhannus)

Uppstilling:

Heini

Ásbjørn – Kaj – Jákup S – Jóhannus

Svenn – Øssur

Danial – Jóhan Petur – Sigurð

Reidar

Bonkurin: Sámal, Thomas, Jákup T, Bárður

                                                                                   

Leygardag 19/3 – ÍF Føroyar vs. Hekla: 8-0 (2xJósup, 2xSteffan, 2xKristin, 2xDion)

Uppstilling:

Rani

Hanus – Teitur – Petur Pauli – Pætur

Erland – Ólavur

Tummas – Heine – Kristin

Steffan

Bonkurin: Mathias, Reidar, Jóhan, Dion, Jósup

                                                                                   

Leygardag 1/4 – ÍF Føroyar II vs. Sundby: 3-0 (Jósup, Danial, Sigurð)

Uppstilling:

Heini

Bárður – Svenn – Bartal – Ragnar

Pætur – Emil

Danial – Johan – Ingi S

Jósup

Bonkurin: Mathias, Thomas, Joseph, Sigurð

                                                                                   

Aftaná eitt keðiligt avrik seinasta dyst noyddist 2. liðið at koma upp á hestin aftur móti oddaliðnum úr Fremad Amager.

Fremad Amager høvdu ongan dyst tapt, áðrenn hendan dystin á Kløvermarkini, men tað var sanniliga tætt við hendan dagin. ÍF Føroyar valdu at spæla meira verjukent enn vanligt, og hetta gjørdi eisini, at oddaliðið høvdu torført við at spæla seg fram til málroyndir. Eftir tilvildarligt trunkaspæl í 16-metrinum hjá føroyingunum var veruligur vandi á ferð, men lukkutíð gjørdi Heini eina heilt framúrskarandi dupultbjarging.

Men hóast teir høvdu trupulleikar við, at sjálvir spæla seg fram til møguleikar, so fingu teir tíverri vandamiklar støður burturúr feilavleveringum frá okkara monnum. Hetta hendi nakrar ferðir, og til síðst endaði tað eisini galið. Ein maður hjá okkum spælir ein áloypara hjá teimum leysan, og hann spurtar so frá øllum og skorar trygt ímóti Heina til 1-0.

Beint áðrenn hálvleik var Johan tætt uppá at javna, tá ið ein tilvildarlig avlevering endaði á hansara vinstra fóti, men hann rakti bóltin alt ov væl (hansara egna frágreiðing) og hamrar tískil bóltin beint uppum málið.

Í hálvleikinum skifti ÍF Føroyar til ein meira álopskendan taktikk, sum hevði við sær, at hugburðurin fór frá at vera sera góður til einastandandi fantastiskur. Hóast Bartal aftaná 5 min. fekk gult kort, so var tað ÍF Føroyar, sum við 10 monnum høvdu bæði spæl og málroyndir. Fyrst var debutanturin Jákup T.J. sera tætt við at fáa mál, men leysur við málmanninum, bleiv hann taklaður í evstu løtu. Stutt eftir bleiv Jóhan Petur púra leysur fyri málmanninum, sum tó hevði eina góða bjarging – einki mál.

Johan og Dion komu eisini fram til vandamiklar støður, men tað var fyrst tá ið 10 minuttir vóru eftir, at ÍF Føroyar endiliga fingu vinning fyri sítt fantastiska stríð. Eftir innlegg frá Ragnari bleiv Johan skumpaður í ryggin, sum hevði við sær, at vit fingu straffi og verjuleikarin eitt gult kort. Her valdi Dion at taka ábyrgd og ísakaldur setti hann bóltin trygt í netið til 1-1.

Sami Dion var fáar minuttir seinni feldur í vandamiklari støðu. Hetta hevði við sær enn eitt gult kort og tískil vóru 9 mans móti 11 tað ið eftir var av dystinum. Hetta sást eisini væl og virðiliga, tí seinastu 5 minuttirnar hevði heimaliðið 3-4 møguleikar, ið allir kundu og burdu givið mál. Fyrst var ein dupultmøguleiki, har Johan bleiv takklaður í evstu løtu, og eitt skot hjá Joseph bleiv bjargað á strikuni. ÍF Føroyar komu eisini í eina støðu, har teir vóru 3 mans í yvirtal. Jákup T.J. bleiv tó ov grammur eftir at stjala yvirskriftinar og valdi at skjóta framvið málinum. Til allarseinast var Joseph leysur á vinstru síðu og hevði púra frítt skot, men bólturin fór tætt framvið málið.

Dysturin endaði tískil 1-1, men tað var næstan ikki til at skilja, at einki sigursmál kom í endanum. Tó kann man ikki vera annað enn glaður og stoltur yvir, at oddaliðið ikki fekk eitt einasta bein til jørðina í øllum seinna hálvleiki ímóti sera vælleikandi og hartstríðandi føroyingum. Stórt rós til allar leikararnar.

 

Uppstillingin:

Heini

Bárður – Reidar – Jákup O. – Ragnar

Dion – Jóhan Petur – Bartal – Joseph – Johan

Jákup D.

 

Dagsins Leikari:

Aftaná so nógv imponerandi avrik var tað fyri einaferð skyld sera javnt í stríðnum um Dagsins Leikara, men við 4 atkvøðum megnaði Dion akkurát at sníkja seg framum Reidar og Ragnar.

 

Dagsins Detalja:

Mangir hildu, at okkara assist til teirra mál var Dagsins Detalja, men fyri at fokusera uppá nakað meira positivt, so fer heiðurin til Johan ístaðin. Ímóti endanum trýsta vit øgiligt á fyri at fáa sigursmálið, men brádliga fáa hinir eitt vandamikið kontraálop. Tá ið Johan, sum fremsti maður, sær hetta, ger hann ikki mætari enn í yvirtíðini at spurta eina hálva vallarlongd og í fullum spurti innheinta teirra mann og gera eina…ikki serliga yndiga glíðandi takling, men hóast fríspark og gult kort, so fekk hann støðgað teirra álopi. Ein fragd at síggja, hóast óndar tungur vildu vera við, at hatta var einasti spurturin hann hevði í øllum dystinum. Hetta eyðkendi tó tann stríðsandan, sum tryggjaði okkara monnum eina stigið.

10. Oktobur fór eitt illa skert 2. lið til Frederiksberg at spæla ímóti FA 2000. Tað vísti seg tó, at so gott sum allir høvdu fingið skeiva beinið úr songini hendan leygardagin, og har var enntá ein, sum ongantíð fekk nakað bein úr songini.

Jú minni sagt um hendan dystin, jú betri. Í fyrsta hálvleiki hevði Jóhan Petur eina góða roynd, men annars var tað ikki nógv, sum ÍF Føroyar høvdu at bjóða uppá hendan dagin. Hinvegin bjargaði Bartal tvær ferðir á strikuni, ímeðan Sjúrður eisini hevði úr at gera. Hálvleiksstøðan var tó bert 0-1, aftaná heimaliðið fingu eitt straffi aftaná hornaspark. Ringt var at síggja hví tað bleiv dømt, men teir skoraðu trygt uppá tað.

Í seinna hálvleiki vóru føroyingarnir betur við og høvdu enntá eisini eitt gott tíðarskeið við meira spæli og enntá eisini nøkrum hálvum royndum frá Johan og Jákup Dam. Hinir høvdu tó eisini ríkiligt av málroyndum, og Sjúrður noyddist at vísa klassan meira enn eina ferð. Tá ið uml. 20-25 min. vóru eftir, fekk danska heimaliðið tvey gul kort, soleiðis at teir bert vóru 9 leikarir á vøllinum. Paradoksalt nokk støðgaði hetta góðu gongdina hjá ÍF Føroyum. Teir 9 leikararnir vóru vandamiklari, og tá ið ÍF Føroyar royndu at satsa ímóti endanum, fekk heimaliðið tvey mál avtrat til endaliga úrslitið 0-3.

Hetta var ikki fyrsta tapið hjá 2. liðnum í ár, men fyrstu ferð at man ikki kann siga annað enn, at tapið væl og virðiliga var uppiborið.

 

Uppstillingin:

Sjúrður

Ásbjørn – Dánial – Jákup O. – Bartal

Jákup D. – Ragnar – Ingi S. – Jóhan Petur

Joseph

Johan

Bonkurin: Brian, Niels

 

Dagsins Leikari:

Fyri fyrstu ferð í ár var ongin hugur til ella tørvur á at atkvøða fyri Dagsins Leikara. Heiðurin fer sostatt til Bartal, sum spældi ein góðkendan dyst, og sum tríggjar ferðir bjargaði mál í evstu løtu.

 

Dagsins Detalja:

Hóast Sjúrður royndi at stjala hendan heiðurin við nøkrum undirhaldandi aktiónum, so kann tað bara vera talan um ein persón ið hevur uppiborið at blíva framstillaður í hesum teiginum. Fýra ferðir er viðkomandi blivin úttikin til dystarhópin í ár, og at hann longu fyri aðru ferð megnaði at ikki møta upp til dyst er snøgt sagt imponerandi, serliga tá ið talan hesaferð var um ein leygardagsdyst. Men um ikki annað, so hevur hesin dulnevndi Jacob F. Svennsen vaskað klæðini sum umbering og gevur eisini kvajebajer næstu ferð, hann møtir til dyst. (um hann møtir upp, væl at merkja!)

3. oktobur fór 2. liðið til Tårnby fyri at útbyggja sigursrøðina. Tíverri valdu menn at gera tað ringt fyri seg sjálvar.

Hóast ÍF Føroyar sótu á nærum øllum í fyrra hálvleiki, so var hálvleiksstøðan onkursvegna 0-3 til heimaliðið. Joseph og Johan høvdu hvør sítt skot, ið streyfaði yvirleggjaran, Jákup Dam og Johan komu í fleiri vandamiklar støður har bert tað síðsta manglaði, og Joseph var enntá bert ein lítlan hálvan metur frá at skora frá miðjuni av. Men í seinnu helvt av hálvleikinum hendir eitt óskiljandi kollektivt kollaps. Uppá bert 10-15 minuttir gera persónligir feilir og óhepni, at Tårnby fáa trý sera lætt mál forerandi, tískil 0-3 í hálvleikinum.

Í seinna hálvleiki leggur venjarin ein støðugt meira offensivan takktikk, og menn eru eisini sera ágrýtnir eftir at gera skaðan góðan aftur. Longu aftaná fáar minuttir verður Reidar snýttur fyri straffi og ikki langt aftaná hevur John eitt skot á yvirleggjaran, sostatt triðju ferð yvirleggjarin forðar einum føroyskum máli. Innanfyri síðsta hálva tíman kemur so endiliga hol á.

Málið til 1-3 kemur aftaná Johan roynir at skjóta á mál frá høgru síðu. Hann rakar ikki bóltin serliga væl, men miseydnaða skotið verður ístaðinfyri til eitt innlegg, har Reidar í besta Falcao-áðrenn-2014-stíli tveitir seg fram og takklar bóltin í málið.

2-3 málið kemur aftaná Ragnar fær tíð og pláss á høgru síðu. Hann leggur bóltin inn til Joseph, sum stendur beint uttanfyri 16-meturin og plaserar bóltin trygt í málið.

Stutt aftaná kom ein mildt sagt kontroversiel støða. Eitt innlegg inn í 16-meturin hjá Tårnby rakar hondina hjá einum verjuleikara hjá teimum, áðrenn Johan fær prikað bóltin í málið. Tá ið dómarin floytar visti man sostatt ikki um hann dømdi fyri mál ella brótsspark, men av óskiljandi orsøkum valdi hann at geva fríspark til heimaliðið ístaðinfyri.

Lukkutíð skuldi hvørki dómari ella yvirleggjari forða einum sterkum comeback frá ÍF Føroyum. Í síðsta minutti endar ein bóltur fyri føturnar hjá Inga P. á vinstru síðu uttanfyri 16-meturin. Hann trekkir inn og til stóra frøði fyri bæði leikarar og venjara, so ger hann ikki mætari enn at hamra bóltin inn í longsta horn.

Síðsta trýstið gav tíverri onki sigursmál, so tað var við blandaðum kenslum, at menn fóru heim við einum 3-3 úrsliti. ÍF Føroyar var klárt betra liðið, men eisini sera sterkt komið aftur. Eina stigið kann eisini vísa seg at verða týdningarmikið.

 

Uppstillingin:

Rani

Hanus – Reidar – Jákup O. – Jóhannus

Jákup D. – Svenn – John – Ragnar

Joseph

Johan

Bonkurin: Bárður, Niels, Ingi P.

 

Dagsins Leikari:

8 atkvøður ella meira merkir at man gevur øl til næsta dyst. Ilt er at siga um hetta var ein faktorur, tí John spældi enn ein branddyst, men fyri aðru ferð í ár fekk hann júst 8 atkvøður og bleiv sostatt ein tryggur vinnari.

 

Dagsins Detalja:

Um Joseph var sindur hepnari, so hevði hann vunnið heiðurin trygt, aftaná hann frá miðjuni av var ein lítlan hálvan metur frá at fáa mál. Ístaðinfyri gongur heiðurin til tríggjar havnamenn, ið væl og virðiliga fóru á ein skógtúr. Hetta hendi tó ikki á vøllinum, men áðrenn sjálvan dystin. Ein súkklutúrur ið eigur at taka uml. 20 minuttir endaði við at vara ein lítlan tíma fyri Johan, John og Svenn. Áðrenn teir langt um longi møtti upp til dystin, høvdu teir enntá bæði sæð skóg, markir og kýr, so himmalin viti, hvar á Amager teir hava verið, og hvør av teimum valdi leiðina.

Aftaná heldur trivaliga byrjan aftaná summarsteðgin tykist tað endiliga at vera komið rætt lag á hjá 2. liði aftur. Hesaferð gekk tað út yvir Østerbro IF, ið blivu sendir heim frá Kløvermarkini við einum 3-2 tapi.

Østerbro IF byrjaðu annars dystin væl, høvdu meira spæl og royndu at trýsta høgt, tó uttan at blíva ordiliga vandamiklir. Hinvegin gav hetta eyka pláss til offensivu leikararnar hjá ÍF Føroyum har bæði Johan, Dion og Jákup D. gjørdu um seg frá byrjan av. Júst hetta gav eisini skjótt úrslit. Fyrsta málið kom aftaná gott gjøgnumbrot og innlegg úr høgru síðu frá Dion. Teirra málmaður fær hondina á bóltin, men fær ikki sligið bóltin longri út enn til ein lúrandi Johan, sum ísakalt temur bóltin og plaserar hann trygt í málið til 1-0.

Tað var tó ikki longi, man slapp at njóta leiðsluna. Fyrst gjørdi eitt bólttap í uppspælinum, at maður hjá teimum bleiv púra leysur við okkara málmann, har Heini heldigvís bjargar í stórum stíli. Men stutt aftaná verður ein maður hjá teimum aftur leysur við Heina, hesaferð takkað verið einari høgari avlevering frá 40-50 metrum. Verjan er ikki klár, avleveringin liggur perfekt, og Heini kann einki stillað upp, 1-1.

Lukkutíð vaknaði alt liðið meira av hesum, og tað vardi ei heldur leingi til vit svaraðu aftur. Fyrst er tað Johan, sum brýtur ígjøgnum og frá baklinjuni av leggur bóltin yvir málmannin og inn til Jákup, men bólturin verður stútaður júst framvið málið. Jákup skuldi tó ikki bíða leingi aftrat fyri at fáa sítt mál. Miðskeiðis í fyrra hálvleiki avgerð Dion at taka sakina í egnar hendur, og frá egnaru hálvu sigur hann pent farvæl við alla verjuna hjá Østerbro. Fyrst brúkar hann bæði teknikk, skjótleika og megi fyri at sleppa framvið 4-5 monnum, og síðani brúkar hann gott yvirblikk til at finna ein púra leysan Jákup Dam, sum stendur á rætta stað, og bert skal seta vinstrafótin á fyri at skora til 2-1. Eitt reint út sagt framúrskarandi einmansavrik frá Dion og samstundis fyrsta (men als ikki síðsta!) málið hjá Jákup fyri ÍF Føroyar hesa hálvuna.

Aftaná at hava verið vitnir til hetta avbera vakra málið, vóru tveir aðrir mans ið gjørdu av, at teir ikki vildu standa nakað aftanfyri. ÍF Føroyar vinna bóltin langt aftur á egnari hálvu. Tá bólturin so endar hjá John tætt við miðjarsirkulin, eru tað bert hann og Johan til at manna álopið. Tað skuldi tó vísa seg at vera meira enn ríkiligt. John velir at spæla bóltin víðari fyrstu ferð til Johan við eini SERA einfaldari avlevering við innarasíðuni av kattepoten og Johan fer sostatt spurtandi avstað við bóltinum, umringaður av tveimum verjuleikarum. Her ger Johan ikki mætari enn at brádliga støðga upp við bóltinum, fyri so at lobba bóltin hegnisliga yvir málmannin frá eini 20 metrum. 3-1 til ÍF Føroyar, og lagið er gott.

Tíverri kann ikki sigast tað sama um lagið hjá hinum ella um dómaraavrikið. Fyrst royna hinir at framprovokera kort til Johan við at provokera hann. Seinni lukkast tað teimum at fáa framprovokerað eitt gult kort til Joseph eftir eina glíðani takkling, har hann rakar bóltin. Til síðst er ein á mótstøðuliðinum, sum fulstendiga óneyðugt rennir eftir Jákup O. og bæði skumpar og hóttir hann. Hetta fekk hann sjálvsagt eisini kort fyri, men onkursvegna fekk Jákup eisini gult kort fyri at vera offur, so ÍF Føroyar endaði fyrra hálvleik og byrjaði seinna við 9 monnum.

Í seinna hálvleiki var tann defensiva konsentratiónin tó væl betri, og tað var ikki nógv teir sloppu fram til av møguleikum. Hinvegin var tætt uppá at vit øktu til 4-1. Serliga fekk Ingi P. ein møguleika, har hann fekk so nógv pláss og tíð einsamallur við teirra málmann, at tað gjørdist torført at bestemma seg fyri, hvat man skuldi gera. Tíverri kom málmaðurin til síðst út og fekk bjargað skotinum, so onkuntíð kann ein málmøguleiki faktiskt gerast OV stórur! Jákup D. var eisini tætt uppá nakrar ferðir at fáa sítt seinna mál, m.a. við einum skoti á yvirleggjaran aftaná gott gjøgnumbrot, men til síðst byrjaðu Østerbro eisini at nærkast einum máli. Faktiskt fingu teir heili tveir gyltar møguleikar tá ið 10-15 min. vóru eftir, men fyrst var tað yvirleggjarin ið bjargaði okkum, og seinni var tað Heini, sum kom framúrskarandi væl út og fekk bjargað einum vandamiklum fríleypara. Til síðst fingu teir tó mál, men tá vóru bert fáir minuttir eftir, og tað var síðstu ferð teir komu í nánd av føroyska málið. Sostatt ein 3-2 sigur til ÍF Føroyar aftaná eitt sera gott avrik.

 

Uppstillingin:

Heini

Bárður – Jákup O. – Teitur – Ásbjørn

Dion – Svenn – John – Jákup D.

Joseph

Johan

Bonkurin: Bartal, Andras, Ingi P.

 

Dagsins Leikari:

Dion var ein støðug hóttan allan dystin og bæði spældi og stríddist væl. So tað var heilt uppiborið, at hann fór avstað við heili 8 atkvøðum og heitinum Dagsins Leikari, ein tangering av metinum fyri hesa hálvuna.

 

Dagsins Detalja:

Dómarin var sera raskur til at seta seg sjálvan í keðiligt fokus og Ingi P. sleppur nokk eisini at hoyra fyri handan málmøguleikan eina tíð aftrat, men hatta er slíkt, sum ofta er komið fyri, og ofta fer at koma fyri aftur. Ein glíðandi takkling frá Joseph, hinvegin, TAÐ er ikki nakað man sær til hvønn fótbóltsdyst! Sum leikari er hann elegantur sum fáur, men at gera glíðandi takklingar… (Indsæt: Smiley ið heldur sær fyri eyguni) Tað minti ikki sørt um ein, sum roynir seg við glíðani takkling fyri fyrstu ferð nakrantíð, og undirritaði hevur eisini ein illgruna um, at tað nokk ei heldur er langt vekk frá sannleikanum 😉 Men sigast skal, at hann rakti bóltin!

Sunnudagin 20/9 fór eitt vælmannað 2. lið hjá ÍF Føroyum til Fælledparkina á Østerbro at vitja Heimdal. Hóast sunnudagsdystir sjáldan eru vælumtóktir, so var tað ein samling av frískum og væluppløgdum monnum ið møtti til dystin (við einum undantaki, men meira um tað seinni) uppsettir uppá at fáa slettað tey seinastu vónbrotini.

Tað tók sína tíð at finna bæði skiftingarrúm og vøll. Undir upphitingini fekk liðskiparin ein lítlan skaða, men tá ið man dugir allar Rocky filmarnar orðarætt, so veit man eisini, at skaðar og pína eru faktorar, ið einki hava at siga, tá ið tað stendur á.

ÍF Føroyar settu seg eisini á dystin frá byrjan av. Heimdal fekk ongantíð tíð ella pláss til at sleppa at spæla fótbólt, ímeðan bæði føroyska verjan og miðjan koyrdu bóltin væl runt. Har frammi stríddist og spældi Johan sum altíð fyrimyndarliga væl, ímeðan einmannsherurin úr Klaksvík var ein trygg og góð spælistatión heilt har frammi. Tað tók ei heldur so langa tíð áðrenn Steffan fekk hol á, hetta eftir innlegg frá Jóhannusi, har Steffan var grammari og giftigari enn danska verjan. Málið til 2-0 var ikki heilt ólíkt. Ingi P. heldur seg vera og spælir eina smarta og góða hælavlevering út til Jóhannus, sum enn einaferð sendir eitt gott innlegg innfyri og enn einaferð megnar verjan hjá hinum ikki at forða Steffan í at fáa mál.

Hálvleiksstøðan var sostatt 2-0 og í seinna hálvleiki var eisini allatíðina ein ávísur klassamunur. Afturvendi Jákup O. helt saman við hinum í verjuni mótstøðuliðnum frá teimum heilt stóru málmøguleikunum, og um tað so onkuntíð var eitt sindur av vanda á ferð, so var eisini nýafturvendi Heini ein sera tryggur síðsti skansi. Teir mitt á miðjuni hildu áfram við at dominera, og vengurnar fingu fleiri gjøgnumbrot, sum kundu elvt til mál, so tað var ikki annað enn uppiborið, tá ið 3-0 málið kom miðskeiðis í seinna hálvleiki. Hetta kom eftir, at Pætur sendi eitt perfekt hornaspark innfyri, har risin úr Vági sjálvsagt var hægstur og stútaði bóltin í netið. Sigast skal, at tað var umvegis ein verjuleikara, men vit eru fitt í felagnum og velja at geva Reidari málið.

Málið gjørdi tó okkara menn nakað ókonsentreraðar, tí lítið bil seinni ger ein feilavlevering frá verjuni, at ein dani fær bóltin mitt á okkara hálvu, og hann høggur bóltin flott í málið til 3-1. Nakað veruligt trýst kom tó ongantíð frá Heimdal. Ístaðinfyri vóru tað ÍF Føroyar, ið fingu fleiri góðar málmøguleikar. Har manglaði tó antin neyvleiki, ella stóð málmaðurin framúr væl fyri. Lukkutíð var Ingi S. fyrstur á bóltinum eftir, at málmaðurin hevði bjargað einum stórum møguleika, so frá einum spískum vinkli fekk Ingi við vinstrafóti skotið bóltin í netið til 4-1 og endaligu støðuna.

Til allarsíðst var tó ovmikið av dramatikki. Mangt kundi bent á, at dómarin hevði latið seg inspirera av Mike Dean og Diego Costa í dystinum móti Arsenal dagin fyri. Ímóti endanum ger ein á mótstøðuliðinum eina regulera svínastriku ímóti Johan, sum uttan iva skuldi givið reytt kort. Dómarin velur ikki at døma, fyrr enn Steffan reagerar uppá áðurnevndu svínastriku, har dómarin so velur at geva Steffan reytt kort fyri sína gerð. Ein keðiligur endi uppá ein annars sera góðan dyst, men tað týdningarmiklasta er, at tey 3 stigini og góða lagið komu trygt við heim aftur úr Fælledparkini.

Uppstillingin:

Heini

Ásbjørn – Jákup O. – Reidar – Jóhannus

Ingi S. – Pætur – John – Jákup D.

Johan

Steffan

Bonkurin: Hanus, Ingi P.

 

Dagsins Leikari:

Inntil víðari í ár hevur tað hvørja ferð verið talan um sannførandi vinnara, men aftaná fleiri sera góð avrik í dagsins dysti, var væl meira spenningur í enn áður. Tað skuldi tó vísa seg, at tvey mál, eitt framúr gott avrik og eitt reytt kort, var nógmikið til, at Steffan, við 5 atkvøðum, vann tann tætta dystin og harvið heiðurin. Steffan fekk 5 atkvøður, ímeðan Pætur var í hølunum við 4.

 

Dagsins Detalja:

Tað er áður komið fyri, at avboð koma í síðstu løtu til sunnudagsdystir og hetta var tíverri ikki nakað undantak. Fyri ikki at útstilla nakran, verður viðkomandi nevndur undir dulnevni. Avboð kom sostatt frá Jacob F. Svennsen, og hetta var kl. 06.48 sunnumorgunin! Lukkutíð var hr. Svennsen so frægur at greiða frá, hví hann var forðaður í at koma til dyst. Hetta kom heilt einfalt av tí, at hann fekk vitjan og ikki kundi stinga av. Ein kundi freistast til at seta spurnartekin við slíka informatión kl. 06.48 ein sunnumorgun, men størri gestablídni skal man so leita leingi eftir og minnir ikki sørt um eina Gevalia reklamu, ”når du får uventede gæster”. J