Kategori: 1 lið

Fyrsta manslið hjá ÍF Føroyum spældi leygardagin á útivølli móti Hellas Bk. og endaði dysturin við einum 1-2 sigri til ÍF Føroyar.

Tað var einki serligt fótbóltsveður leygardagin, tað regnaði sera illa og grasvøllurin var tungur at spæla á, men tað sá ikki út til at ávirka leikararnar nakað serligt.

Dysturin byrjaði varliga, og tað mesta av spælinum gekk fyri seg á miðjuni og tað sást væl, at hetta vóru tvey lið, ið ikki hava fingið bestu byrjanina uppá kappingárið. Tað vóru nógvir nærdystir og fleiri feilavleveringar, men sum dysturin leið, blívu føroyingarnir meir og meir spælstýrandi. Til tíðir vísti ÍF Føroyar gott, skjótt og flótandi spæl og spældu vit okkum eisini fram til nakrar heilt góðar málmøguleikar, tó uttan at gangnýta teir. Men beint áðrenn hálvleik vísti Rókur nakrar snildir og snýtti fleiri leikarar áðrenn hann, stille og roligt, setti bóltin í kassan til 0-1. Eitt sera snilt mál.

Hellas royndi eisini at spæla seg fram til onkran møguleika, tó uttan at tað gjørdist vandamikið – ÍF Føroyar verjan stóð stinn og Mathias í málinum var tryggur, tá boð vóru eftir honum.

Í seinna háleiki var myndin hin sama, og menn stóðu nærum i kø fyri at missnýta málmøguleikar, og so hendi tað, sum vanliga hendur, tá ein ikki skorar uppá málmøguleikarnar. 7 min. vóru eftir av dystinum og Hellas, sum lítið og einki hevði at bjóða uppá í seinni hálvleiki, fær ein møguleika og teir taka av beinanvegin og so er støðan 1-1.

Nú legið ÍF Føroyar nógv fyri í eini roynd at fáa øll 3 stigini og 2 min. áðrenn tíð bragdaði. Eitt fríspark verður lyft inn í brotsteigin og við aftaru stong stendur John púra ódekkaður og hann er ísakaldur, tekur eitt trekk út frá og skorar trygt við nærmastu stong – stór frøði á monnum.

Dagsins leikari bleiv John Hammer við 7 atkvøðum og Bárður Danielsen fekk 4.

Hesir byrjaðu dystin: Mathias – Uni, John, Bárður, Jóhan – Erland, Emil, Tummas, Dion, Svenn – Rókur. Á bonkinum sótu: Rani, Sigurð & Steffan.

Skuffandi byrjan uppá nýggja kappingarárið                

Fyrsta manslið hjá ÍF Føroyum hevur leikt 5 dystir í nýggja kappingarárinum og hevur hetta givið liðnum 4 stig. Seinastu 2 dystirnir hava verið ímóti Heimdal og Vigerslev Bk. og niðanfyri eru dystarfrásøgnir frá dystinum.

Heimdal vann tryggan sigur

Fríggjakvøldið 29. august  spældi 1. manslið hjá ÍF Føroyum ímóti Heimdal úti á Østerbro. Um sjálvan dystin er ikki nógv at skriva heim um, vit fingu ongantíð sett okkum á dystin og endaði dysturin við einum lemjandi tapi uppá 4-0.

Hesir byrjaðu dystin: Mathias – John, Kaj, Bárður – Jóhan, Ólavur, Rani, Svenn, Rói – Rókur & Steffan. Á bonkinum sótu: Sigurð, Emil & Hanus.

Dagsins leikari gjørdist Van Gaal við 14 atkvøðum

Ein skuffandi javnleikur ímóti Vigerslev Bk.

Seinni dysturin var týskvøldið 2. septembur móti Vigerslev. Undan hesum dystinum lá Vigerslev á aftasta plássi uttan nakað stig, so vónirnar vóru góðar til dystin.

ÍF Føroyar setti seg á dystin frá byrjan og spældi seg eisini fram til onkran kjans, tó uttan at tað bleiv heilt vandamikið. Tá eini 10 min. vóru farnir av dystinum, endaði ein verjuvilla hjá okkum við, at ein Vigerslev leikari slepp at renna seg leysan í høgru síðu og úr spískum fekk  hann skotið bóltin í málið. Hetta var fyrsti verðuligi málmøguleikin hjá Vigerslev, so tað var ikki heilt í tráð við leikgongdini at Vigerslev kom uppá 0-1. Eftir málið setti ÍF Føroyar seg enn meira á dystin, meðan Vigerslev spældi uppá kontra. Vit spældu okkum fram til fleiri málmøuleikar, men vóru ikki nóg avgjørdir framanfyri málinum.  Tá eini 10 min. vóru eftir til  hálvleiks, fingu vit eitt fríspark beint uttan fyri brotsteigin. Rókur tók sær av sparkinum og sera hegnisliga skeyt hann bóltin í málið til 1-1 og stórur rómur á Kløvermarkini – hendan støðan helt sær til hálvleik.

Í seinna hálvleiki var myndin hin sama, ÍF Føroyar sat á spælinum og spældu seg fram til fleiri kjansir, men tann seinasti neyvleikin manglaði og tískil endaði dysturin 1-1.

Hesir byrjaðu dystin: Mathias – Uni, Kaj, Bárður, Jóhan – Rani, John, Hanus, Ólavur, Rói – Rókur. Á bonkinum sótu: Svenn, Emil & Steffan.

Dagsins leikari gjørdist Jóhan Viderø Gunnarsson við 7 atkvøðum.

1. lið spældi leygardagin móti Dragør. Eftir kærkomna sigurin týsdagin vóru vónirnar góðar, men samstundis vóru menn greiðir um, at mótstøðuliðið – ið hevði lagt væl frá landi við 6 stig í tveimum teimum fyrstu dystunum – helst var betri enn undanfarnu mótstøðulið. Og rætt var! Dragør legði høgt trýst á og við hjálp frá nógva viðvindinum løgdu teir eitt støðugt trýst oman móti málinum hjá Mathiasi. Tó so, vit royndu at koma fram til onkran málmøguleika, men tað var líkasum at síðsti neyvleikin restaði í. Longu tíðliga í 1. hálvleiki fáa Dragør hornaspark í okkara vinstru og vinstri bakkur, ið hevði fleiri vandamikil hornaspørk hendan dystin, ger ikki mætari enn at skjóta bóltin beint í netið. Enn einaferð hjálpti nógvi viðvindurin teimum væl. Hetta var sum at fáa eina kalda spann í høvdið! Gott nokk høvdu teir havt yvirvág, men málið kendist óneyðugt. Eftir hetta byrjaðu vit at koma meiri við í dystin og løtu seinni fáa vit fríspark nakað til vinstru miðskeiðis uttanfyri brotsteigarmarkið. Helst varð væntað, at frísparkið fór at verða sent inn í brotssteigin til stóru menninar Brian og Kaj, men Rókur ger ikki mætari enn at senda bóltin væl og elegant í málið til 1-1. Nú vóru vit við aftur! Men gakk. Stutt seinni gerst støðan 2-1 til Dragør. Okkara menn mettu greitt, at ein av leikarunum hjá Dragør gjørdi fríspark og hóast Rani gav dómaranum nøkur borgarlig – men tó sum altíð vælmeinandi og konstruktiv – orð við á vegnum, so læt hann seg ikki vika. Hálvleiksstøðan var 2-1

Menn fóru við góðum treysti út til seinna hálvleik. Mótvindur var blivin til viðvind og líkindini at fáa okkara spæl at koyra vóru harvið bøtt munandi. Men tað gongur ikki altíð sum ætlað. Tað var sum um at strævni 1. hálvleikur hevði tikið luftina úr monnum, og tí slapp Dragør framhaldandi at hava tað mesta av spælinum. Nakað mitt í 2. hálvleiki hendir so tað, ið ikki má henda. Í mótálopi verður teirra áleypari spældur leysur aftur um okkara verju og skjýtur bóltin í málið til 3-1. Hetta var nærum mønustingurin. Hóast hetta skapa vit sporadiskar málmøguleikar, men tíverri er tað einki, ið endar við máli og endaliga úrslitið gerst tískil 3-1 til Dragør. Eingin ivi var um, at betra venjingarstøðan hjá mótstøðuliðnum var ein av høvuðsorsøkunum til tapið, men tíbetur er hetta nakað, ið vit fáa bøtt um komandi tíðina, so tað fer helst at síggja heilt gott út, tá ið menn koma í betri venjingarstøðu. Næsti dystur hjá 1. liði verður longu komandi fríggjadag á útivølli móti Heimdal.

Dagsins leikarar gjørdust Rókur og Ólavur, ið fingu 4 atkvøður hvør. Næstir teimum vóru Jóhan og John ið fingu 2 og Bárður og Kaj, ið atkvøddu fyri sær sjálvum (ella hvørjum øðrum) 😉

Byrjanarlið: Mathias – Bárður, John, Kaj, Jóhan – Rani, Ólavur, Rókur – Rói, Brian, Hanus

Eykamenn: Emil, Svenn og Ásbjørn

Týskvøldið leikti 1. lið sín næsta dyst í nýggja kappingarárinum. Fyrsti dysturin varð leiktur seinasta leygardag, og bleiv úrslitið 4-2 til Nørrebro United í einum dysti, har okkara lið ikki heilt rakti dagin. Tí máttu aðrir bollar í suppuna týskvøldið, tá grannarnir KFB stóðu fyri tørni, og sigast má, at okkara leikarar vóru klárir frá dystarbyrjan. Frá fyrsta bríksli settu vit okkum á dystin, og við til tíðir sera góðum spæli skaptu vit eisini onkrar kjansir, tó uttan at fáa mál. Hálvleiksstøðan var tískil 0-0.

Seinni hálvleikur helt áfram eins og fyrri við, at vit høvdu bóltin meira. Vit komu fram til onkrar hálvar málmøguleikar, men inn vildi bólturin ikki. Tó so, KFB høvdu eisini onkur innlegg og okkurt langskot, men saman við Mathias tók verjan sær av hesum.

Sum dysturin leið væntaðu nokk tey flestu, at dysturin mundi fara at enda 0-0. Men Sigurð vildi tað øðrvísi. Tá klokkan hevði rundað teir 89 minuttirnar fangar Mathias eitt innlegg. Við sínum ”falke-blikki” sær hann Sigurð longur frammi á vøllinum, og við einari frálíkari sending sendir hann Sigurð avstað. Sigurð fær fatur á bóltinum júst frammanvert miðstrikuna og setur ferð á. Komin fram at málinum eitt sindur til høgru, leggur hann hegnisliga bóltin yvir í handaru síðu á málinum. 1-0 til ÍF Føroyar og øll Kløvermarkin á gosi. Kanska hetta er at taka ov rívan til, men vit vóru í øllum førum fegnir. Og tá dómarin floytaði fyri seinastu ferð nakrar minuttir seinni, vóru 3 stig komin í hús.

Næsti dystur verður komandi leygardag á Kløvermarkini kl. 15.00 ímóti Dragør Bk.

Dagsins maður hendan dystin bleiv Rókur við 7 atkvøðum. Honum á baki komu Ólavur og Bárður við ávikavist 4 og 3 atkvøðum. Leggjast kann afturat, at Rókur eisini bleiv dagsins maður seinasta dyst.

Liðið: Mathias – Rani, Bárður, Kaj, Ásbjørn – Hanus, Ólavur, Svenn, Rói – Rókur, Brian

Eyka: Teitur, Sigurð, Helgi

NFC-ÍF Føroyar 0-11 (0-7)

Eftir at gongdin í landskappingini seinastu tíðin hevur verið heldur misjøvn var upplagt høvi at venda gongdini, tá ið steypadystur var á skránni í gjár. Mótstøðuliðið hesuferð var NFC úr Seriu 5, so útlitini til ein trivaligan sigur vóru avgjørt til staðar. Og lat okkum gera tað greitt beinanvegin: har var eingin slingur í valsinum! Í so máta var mótstøðan alt ov veik og frá fyrsta minutti skolaðu álopini oman móti málinum hjá NFC, og longu eftir 5 min var støðan 0-2 til okkara. Hálvleiksstøðan var 0-7. Gongdin í seinna hálvleiki var áleið tann sama sum í fyrra, men í mun til 1. hálvleik gekk heldur striltið at fáa gongd á aftur málskjótingina. Eftir at nakrar skiftingar vóru gjørdar kom endiliga hol á aftur og gjørdist endaliga úrslitið 0-11. Eitt úrslit, ið sagtans kundi verið væl størri, um vit vóru nakað neyvari frammanfyri málinum. Málskjúttar vóru Ólavur og Rókur ið fingu hattrick, Steffan og Dánial ið skutu tvey hvør og Hanus ið fekk eitt mál. 1. lið spælir aftur leygardagin og samstundis sum Medina rokkar inni í Kongens Have bjóða vit Østerbro IF vælkomnum á Kløvermarkini og so er bara at vóna, at stórsigurin hevur givið neyðuga sjálvsálitið til at venda gongdini seinastu landskappingardystirnar.

Teir ið mannaðu liðið vóru: Mathias – Pætur, Oddur, John, Jóhan – Erland, Ólavur, Rókur – Hanus, Steffan, Tummas. Á bonkinum byrjaðu Christian Høgni og Dánial.

Elektron stuðlar 1. liði

26. apríl, Bk. Rødovre – ÍF Føroyar (4-1) 

Dysturin hesaferð varð spældur í Rødovre. Bk. Rødovre lá nr. 2 og fyri at vera við í kappingini um uppflyting so var umráðandi hjá okkum at vinna dystin. Tað var heitt og strævið at spæla hendan dagin tí veðri var av tí allar besta. Har aftrat var vøllurin ikki so góður og tískil var tað trupult at fáa spælið at koyra. Tá tað er sagt, so vóru vit kanska ikki ordiliga klárir frá dystarbyrjan og komu kanska ongantíð ordiliga inn í dystin.

Bk. Rødovre fekk fyrsta málið. Bólturin kemur innfyri úr vinstru síðu og síðani verður hann saksa-sparkarður í málið. Eitt sera gott mál. Løtu seinni verður Christian Høgni spældur leysur inni í 16 metrinum og smekkar til og so var javnleikur aftur.

Spælið gekk síðani eitt sindur aftur og fram har Bk. Rødovre fyri tað mesta var omaná. Tey 3 málini teir fingu afturat var uppá deyðbóltsstøður. Støðan bleiv harvið 4-1 til Bk. Rødovre.

Í seinni hálvleiki fór Steffan í mál av tí at ein fingur hjá Heina fór úr lið. Steffan kláraði seg tó sera væl og kom væl út í fleiri hornaspørkum.

Liðið hesaferð: Heini – Jóhan G., Rasmus, Oddur, Bárður – Rói, Tummas, Erland, Emil – Christian Høgni, Steffan.

Á beinkinum vóru: Rasmus, Pætur og Jósup

30. apríl, VLI-ÍF Føroyar (4-1)

Dysturin hesaferð varð spældur á Frederiksberg. Mótstøðuliðið var VLI sum liggur niðanfyri okkum á stigatalvuni og fyri at vit skuldu verða við í kappingin um uppflyting var sera umráðandi við 3 stigum í dag.

Vit komu ikki væl frá byrjan. VLI vóru meira ágrýtnir enn vit og fingu eitt mál tíðliga í dystinum. Tað eydnaðist tó at javna stutt eftir við einum máli frá Steffani. Aftaná tað royndu vit at koyra meira á, men tó var tað VLI sum hevði leikliga yvirvág. Miðskeiðis í fyrra hálvleiki var eitt innkast kasta innfyri og aftaná eitt sindur av trunkaspælið endaði tað við at ein leikari gjørdist leysur uttan fyri 16 meturin og smekkaði til og so var 2-1 til VLI. Sum dysturin gekk satsaðu vit meira og meira og tað gjørdi sjálvandi at tað varð opið í hinum endanum. VLI fekk 2 mál uppá snarálop og dysturin endaði so statt 4-1 til VLI.

Næsti dystur verður mikudagin 7. mai, sum er ein steypadystur.

Liðið hesaferð: Mathias – Jóhan G., John, Oddur, Bárður – Erland, Ólavur, Tummas, Rókur – Christian Høgni, Steffan

Á beinkinum vóru: Hanus, Emil og Rói

Mánadagin, 2. Páskadag, leikti 1. lið dyst á Kløvermarkini. Dysturin var móti Husum Bk., ið lá 2 stig frammanfyri okkara lið áðrenn dystin. Tískil kundu vit við einum sigri yvirhála mótstøðuliðið á stigatalvuni.

Hetta – kann eg tó avdúka – hendi ikki, og sostatt hevur 1. lið ikki fingið júst ta byrjan uppá seinnu helvt, sum vit vónaðu. Hesaferð møttu vit einum liði, ið fram um fleiri onnur lið, veruliga góvu alt tað teir høvdu. Sjálvt um teir ikki skaptu nógvar kjansir, so kláraðu teir at stressa okkara leikarar so mikið nógv, at spælið, sum okkara menn kunnu avrika, ongantíð heilt kom til sín rætt.

Okkara lið kom annars á odda miðskeiðis í 1. hálvleiki. Tummas fekk bóltin stutt uttanfyri brotsteigin hjá mótstøðuliðnum eitt sindur úti í høgru síðu. Við einum ógvuliga góðum skoti høggur hann til bóltin, sum brestur á tvørtræið og kemur beint út til Christian Høgna, sum við høvdinum stútar bóltin í kassan. 1-0 til okkum og menn vóru væl nøgdir. Hendan støðan helt sær fram til hálvleiks.

Seinni hálvleikur var á leið 15 minuttir gamal, tá ið Husum Bk. javnaðu. Ein mótstøðuleikari kom at standa leysur frammanfyri málinum, og við eitt sindur av hepni fekk hann lirkað bóltin í málið til støðuna 1-1.

Tað gekk tó ikki leingi, so lá bólturin aftur í málinum hjá mótstøðuliðnum. Hesaferð var tað Steffan, ið var málskjútti. Christian Høgni dróg framvið fleiri leikarum í vinstru síðu, og komin fram at baklinjuni leggur hann bóltin skrátt útfrá til Steffan, sum ósvikaliga tryggur setti bóltin í netið til 2-1.

Stutt eftir hetta fingu vit eitt straffi, sum tó ikki bleiv umsett til mál.

Husum Bk. løgdu ongantíð árarnar inn, og tað eydnaðist teimum eisini at javna. Eftir innlegg úr teirra vinstru síðu fekk tað innskifta langa spjótið, sum spældi í teirra álopi í seinna hálvleiki, skallað bóltin framvið Heina til støðuna 2-2, sum eisini bleiv endaliga úrslitið. Eitt úrslit, sum undirritaði metir, at mótstøðuliðið skulu vera meira nøgdir við enn okkara menn.

Dagsins maður bleiv enn einaferð Erland Berg Danielsen við 4 stemmum. Honum á baki kom Christian Høgni við 3 stemmum; Tummas, Steffan og Jóhan G. fingu 2 stemmur, meðan Heini fekk eina stemmu.

Liðið hesaferð: Heini – Jóhan G., John, Oddur, Bárður – Hanus, Erland, Tummas, Rói – Christian H., Steffan.

Á beinkinum vóru: Emil, Jóhan E. og Rasmus.

Leygardagin upprann endiliga dagurin, har kappingin byrjaði aftur. Aftaná venjingardystir og venjing í yvir 2 mánaðir, vóru menn spentir at sleppa at spæla ein ”ordiligan” dyst aftur. Kappingin hjá 1. liði fylgir leistinum hjá hægri deildunum, har fyrra helvt av kappingini verður spæld í heyst-hálvuni og seinna helvt í vár-hálvuni. Tískil var kappingin komin í helvt áðrenn dystarbyrjan leygardagin. Status áðrenn dystin var, at okkara lið lá á einum 6. plássi, 6 stig frá 1. plássinum í deildini.

Dysturin var úti í Brønshøj ímóti BK Fix, sum lá næstaftast í deildini. Um sjálvan dystin er tó ikki so nógv at skriva heim um, og áskoðararnir, sum vóru møttir upp at stuðla, fingu ikki nógv fyri pengarnar, sum man tekur til. Sjálvt um okkara menn høvdu bóltin sera nógv og vóru klárt spælistýrandi, so spurdist ikki so nógv burturúr. Onkrir hálvir møguleikar vóru tað nærmasta vit komu fram til. Mótstøðuliðið royndi at kontra og onkuntíð var vandi á ferð, men verjan saman við Mathias høvdu tó rímiliga gott tak á dystinum. Dysturin endaði tí 0-0, og tað vóru Fix-ararnir –  útfrá gleðisrópunum tá dómarin bríkslaði fyri seinastu ferð – meira nøgdir við enn vit.

Dagsins maður bleiv stríðsmaðurin og bóltsnillingurin Ólavur í Ólavsstovu við 4 stemmum. Sjálvt um centimetrarnir ikki eru teir heilt nógvu hjá hesum manninum, so smæðist hann bestemt ikki burtur inni á einum fótbóltsvølli. Honum á baki komu verjuspælararnir Jóhan, John, Oddur og Bárður við 2 stemmum hvør, meðan Matthias og Rókur fingu hvør sína stemmu. Stemmurnar lýsa eisini dystin sera væl, har teir meira verjukendu menninir fingu stemmurnar hesaferð.

Til síðst kann nevnast, at tað vóru ikki bara vit, sum fingu eina trilvandi byrjan. Bæði oddaliðini leiktu eisini javnleik, og tískil er frástøðan upp til oddin óbroytt. Næsti dystur hjá 1. liðnum verður komandi leygardag á Kløvermarkini kl. 15.00. Hesaferð verður mótstøðuliðið Sundby Bk, sum liggur á einum deildum 1. plássi. Vit vóna, at nógvir áskoðarar møta upp at heppa á okkara lið.

Liðið: Mathias – Jóhan G., John, Oddur, Bárður – Hanus, Tummas, Ólavur, Rói – Rókur, Chriastian Høgni.

Á beinkinum vóru: Erland, Rasmus, Jósup

Veðrið var av tí besta, tá ið 1. manslið enn einaferð skuldi leika ein venjingardyst fram móti kappingarbyrjan tann 3. apríl. Mótstøðuliðið hesuferð var B1908 sum somuleiðis leikar í Seriu 1 og tað var longu frá byrjan greitt, at hetta mótstøðuliðið helst hevði meiri at bjóða uppá enn undanfarnu mótstøðulið. Fyrsta korterið ella so blivu føroyingarnir lagdir undir stórt trýst og hetta endaði eisini við, at B1908 legði seg á odda 0-1. Eftir hetta fingu føroyingarnir justerað nøkur smáting og vit ótu okkum meiri og meiri inn í dystin. Yvirtakið ger eisini, at vit fáa vent eini 0-1 støðu til 3-1 áðrenn Jógvan Ósá bríkslar til hálvleiks. Føroysku málini skutu Rókur, ið fekk tvey, og Rói eitt.

Endaði 1. hálvleikur væl, ja so er synd at siga tað sama um byrjanina av 2. hálvleiki! Einans eitt korter inn í seinna hálvleik er 3-1 leiðslan longu vend til 3-5. Hetta fáa vit tíverri ongantíð veruligan broytt upp á og hóast onkra hissini royndir frameftir vøllinum so endar dysturin við 3-5 tapi, sum harvið eisini er fyrsta tapið í venjingardystunum higartil í ár. Hetta eiga vit ikki at taka so tungt, tí sjáldan føra alt ov nógvir sigrar í venjingardystunum til eina góða kapping.

Komandi venjingardystur – og seinasti áðrenn kappingarbyrjan – er sunnudagin 23. mars móti grannunum av Christiania, CSC.

Teir ið mannaðu liðið vóru: Mathias – Jóhan, John, Oddur, Bárður – Rói, Tummas, Ólavur, Hanus – Christian Høgni, Rókur. Á bonkinum sótu: Ásfinnur, Rasmus, Svenn, Teitur, Jósup, Steffan.

Elektron stuðlar 1. mansliði